İranda bir neçə gün əvvəl başlayan 2009-cu ildən bu yana ən böyük kütləvi nümayişlər davam edir. Baki-xeber.com xəbər verir ki, bu gün isə minlərlə hökumət tərəfdarı küçələrə çıxıb.
İran dövlət televiziyası səhər müxtəlif şəhərlərdə on minlərlə hakimiyyət tərəfdarının yürüş üçün küçələrə axışdığını bildirib.
Rejim lehinə nümayişlər dini lider Ayətullah Əli Xamneyinin hadisələrlə əlaqədar “İranın düşmənlərinin” müharibə yaratmağa cəhd göstərdiyi barədə açıqlamasından dərhal sonra başlayıb.
Ölkədə son günlərdə keçirilən rejim əleyhinə aksiyalar və küçələrdəki nümayişlərə etiraz etmək üçün İran hakimiyyətinin xalqa çağırışlarından sonra rejim tərəfdarları Ahvaz, Abadan, Gorqan, İylam, Ərak, Hurrəm Abad, Kirmanşah, Buşehr şəhərlərində “rejimə dəstək” mitinqi keçirib.
Nümayişçilər “Liderimiz biz hazırıq!”, “Lənət olsun ABŞ-a”, “Lənət olsun Səudiyyə Ərəbistanına” və “Lənət olsun fitnəçi və riyakar” şüarları səsləndiriblər.
Digər tərəfdən İran lideri Əli Xamneyə bağlı Təbliğat qurumu tərəfindən cümə günü keçiriləcək rejimə dəstək mitinqinin təxirə salındığı bildirilib.
Müxalifət də paytaxt Tehran, İsfahan, Hamədan, Hürrəmabad, Buşəhr, Ahvaz, Abədan kimi şəhərlərdə gecə saatlarında etiraz aksiyaları keçirib və rejim əleyhinə şüarlar səsləndirib. Məşhəd Süleyman şəhərində silah səsləri eşidilib və təcili maşınlar xəstəxanalara yaralıları dayışıb. Hadisələrdə ölənlərin olub-olmadığı hələ də məlum deyil.
Sosial şəbəkəyə əks edən kadrlarda yüzlərlə etirazçının küçələrdə olduğu görünür. İsfahan əyalətinə bağlı Kəhdəricanda polis mərkəzinə girməyə cəhd edən beş etirazçının atəş açılaraq öldürüldüyünə dair hadisənin görüntüləri də ortaya çıxıb.
Bu arada müxalifət ən azı 23 nəfərin öldüyü ölkədə ölümlərin hansı şəhərlərdə olduğunu göstərən xətirə yayıb. Ölənlərdən ikisinin tələbə olduğu müəyyənləşdirilib.
Qeyd edək ki, Məşhəd şəhərində cümə axşamı günü hər hansı bir siyasi partiyanın dəvəti olmadan toplanan bir qrup ölkədəki iqtisadi vəziyyətə etiraz etmək məqsədilə nümayiş keçirmişdi. Sonradan rejim əleyhinə etirazlara çevrilən nümayişlər ölkənin müxtəlif şəhərlərində davam edir.
