Səudiyyə Ərəbistanının ən varlı şahzadəsi Əl Vəlid bin Talalın atası oğlununn korrupsiya əməliyyatları çərçivəsində həbsinə etiraz olaraq aclıq aksiyası keçirir.
Baki-xeber.com xəbər verir ki, Əl Vəlidin atası, 86 yaşlı Talal bin Əbduləziz oğlunun həbs olunmasını qəbul edə bilmir. Talal bin Əbduləziz, şahzadə Məhəmməd bin Salmanın başlatdığı korrupsiya əməliyyatlarından sonra noyabrın 10-dan aclıq aksiyasına başlayıb. Indiyə kimi 10 kq arıqlayan Talal, xəstəxanaya yerləşdirilib, ancaq həkimlərin cəhdlərinə baxmayaraq aksiyasını dayandırmır.
Qeyd edək ki, Talal bin Əbdüləziz eyni zamanda Kral Abdullahın ögey qardaşıdır. Şahzadə Talal kral ailəsi arasında “Azad Şahzadələr” kimi tanınan islahatçı qrupun lideri olub və 1958-ci ildə insan hüquqları sahəsində irəliləyişləri nəzərdə tutan konstitusiya monarxiyasına əsaslanan konstitusiya hazırlayıb. Bundan əlavə, o, seçilmiş üzvlərdən ibarət məsləhət komitəsi yaratmağa çalışıb, lakin onun bu cəhdləri kral və dini liderlər tərəfindən qəbul edilməyib. Hətta o, hazırladığı konstitusiya mətninin şəriətə zidd olduğunu ifadə edən bir fətva ilə üz-üzə qalıb. 1961-ci ildə isə onun pasportu ləğv edilib, Misirdə yaşayan şahzadə özünü sosialist kimi tanıtmağa başlayıb və kral hakimiyyətini tənqid edib.
Onu da xatırladaq ki, şahzadə Məhəmmədin başlatdığı korrupsiya əməliyyatları çərçivəsində aralarında Talal bin Əbdüləzizin oğlunu da olduğu yüzlərlə şahzadə, iş adamı və keçmiş nazir həbs edilib.
Son günlər Əl Vəlid bin Talalın sərbəst buraxılması üçün hökumətin ondan 6 milyard dollar istədiyi barədə xəbərlər dolaşır. 62 yaşlı şahzadə 18 milyard dollarlıq sərvətlə dünyanın 57-ci ən varlı adamı kimi tanınır.
