Birləşmiş Millətlər Təşkilatının (BMT) Baş Assambleyası Türkiyə və Yəmənin təklifi ilə yeni Qüds layihəsini müzakirəyə çıxarıb. Baki-xeber.com xəbər verir ki, ABŞ-ın təhdidləri fonunda 172 ölkənin iştirakı ilə keçirilən toplantıda Donald Trampın Qüdsü İsrailin paytaxtı kimi tanımasına dair qərarının qəbuledilməz olması barədə qətnamə qəbul edilib.
Səsvermənin nəticələrinə əsasən, 128 dövlət sənədin lehinə, 9-u əleyhinə səs verib, 35 dövlət isə bitərəf qalıb. Qətnamənin əleyhinə ABŞ, İsrail, Qvatemala, Qonduras, Marşal Adaları, Mikroneziya, Nauru, Palau, Toqo səs verib.
Sənədə əsasən, müqəddəs Qüds şəhərinin statusu, demoqrafik tərkibi və xarakterinin dəyişdirilməsini nəzərdə tutan istənilən qərar və addımlar hüquqi qüvvəyə malik deyil və ləğv edilməlidir.
Qətnamə həmçinin tələb edir ki, bütün dövlətlər BMT TŞ-in qətnamələrinə zidd olan tədbir və addımları qəbul etməməyə çağırıb.
İsrailin BMT-dəki daimi nümayəndəsi Danni Danon, "Bu toplantının keçirilməsi belə utanc vericidir. Qüds İsrailin paytaxtıdır. Bu həqiqəti müzakirə edə bilməzsiniz. Bugünkü təklif dəstəkləyənlər fələstinlilərin iplərini çəkdiyi kuklalarıdır ", - deyə bildirib.
Bundan əvvəl Vaşinqton administrasiyası BMT-nin üzv ölkələrini açıq şəkildə təhdid etmişdi. Tramp layihəni dəstəkləyən ölkələrə ABŞ-ın maliyyə yardımını kəsəcəklərini açıqlayıb. ABŞ-ın BMT-dəki daimi nümayəndəsi Nikki Heyli isə Amerikaya qarşı mövqe tutan ölkələrin qeydiyyatının aparılacağını deyib.
BMT Baş Assambleyasında çıxışı zamanı Tramp qərarını tənqid edən Türkiyənin xarici işlər naziri Mövlud Çavuşoğlu isə, ABŞ-ın dünyanı təhdid etməsinin qəbuledilməz olduğunu deyib: "Üzv ölkələrin şərəfi satılıq deyil, ölkələrin səslərini satın ala biləcəyini düşünmək etik deyil. Biz qorxmadıq. Güclü ola bilərsən, ancaq bu o demək deyil ki, sən haqlısan...
Türkiyə heç vaxt Qüdsü tək qoymayacaq. Fələstin heç vaxt yalnız qalmayacaq...."
ABŞ-ın nümayəndəsi Nikki Heyli isə bildirib ki, ABŞ öz səfirliyini Qüdsə köçürəcək: “Heç bir səsvermə bizim bu qərarımızı dəyişməyəcək”.
İsrail baş nazirinin dəftərxanasından bildirilib ki, İsrail BMT Baş Assambleyasının Qüdsə dair qərarını qəbul etmir və bir çox ölkənin yəhudi dövlətini dəstəkləməsindən məmnundur. “Qərara qarşı çıxış edən dövlətlər arasında baş nazir Binyamin Netanyahunun səfər etdiyi Avropa, Afrika və Latın Amerikası ölkələri var”, - deyə məlumatda bildirilir.
“İsrail ABŞ prezidenti Donald Trampa Qüdsə dair birmənalı mövqe nümayiş etdirdiyinə görə təşəkkür edir və İsrail - həqiqətlə birgə səs vermiş ölkələrə minnətdarlığını bildirir”.
