NATO Rusiyanın arsenalında beynəlxalq müqavilələrlə qadağan edilmiş raket komplekslərinin olduğunu aşkarlayıb. Baki-xeber.com xəbər verir ki, alyans bununla bağlı bəyanat yayaraq Rusiyanın Orta Mənzilli Raketlərin Ləğvinə dair Müqaviləni (INF Müqaviləsi) (INF) pozduğunu və bunun ciddi narahatlığa səbəb olduğunu bildirib.
NATO-nun açıqlamasında, INF-nin ABŞ və Rusiyanın qurudan atılan qanadlı və ballistik raketlərini yox edərək 30 ildir Avropa-Atlantika məkanında təhlükəsizliyi təmin etmək baxımından önəmli rol oynadığı, sabitliyə töhfə verdiyi və risqi azaldaraq qarşıdurmanı önlədiyi ifadə edilir.
Müqaviləyə sadiq qalmağın vacibliyi vurğulanan bəyanatda NATO-nun razılaşmanı qorumaqda qərarlı olduğu bildirilir. Açıqlamada ABŞ-ın sazişin müddəalarına uyğun hərəkət etdiyi, Rusiyanın isə buna əməl etməməsinin dərhal müzakirə edilməsi vacib olan ciddi bir problem olduğu deyilir: "Alyans ciddi narahatlıq yaradan bir Rusiya raket sisteminin varlığını təsbit edib. NATO, Rusiyanı bu narahatlıqları aradan qaldırmaq üçün şəffaf şəkildə davranmağa və texniki məsələlər üzrə ABŞ-la fəal dialoq aparmağa çağırır”
Xatırladaq ki, 1987-ci ilin dekabr ayında Vaşinqtonda yüksək səviyyəli Sovet-Amerika görüşü zamanı yaxın və orta mənzilli raketlərin ləğvinə dair müqavilə imzalanıb. SSRİ-nin rəhbəri Mixail Qorbaçovla ABŞ prezidenti Ronald Reyqan tərəfindən imzalanan Orta Mənzilli Raketlərin Ləğvinə dair Müqavilənin (INF Müqaviləsi) şərtlərinə uyğun olaraq, SSRİ 826 ədəd orta mənzilli, 926 ədəd yaxın mənzilli, ABŞ isə 689 orta və 170 yaxın mənzilli raketi ləğv etməli idi. Orta mənzilli raketlər üç il ərzində, yaxın mənzilli raketlər isə il yarım ərzində ləğv olunmalı idi. SSRİ-də nüvə döyüş başlığı 2500 ədəd, ABŞ-da isə 1320 ədəd ləğv olunmalı idi. Bu proses üzərində ciddi beynəlxalq nəzarət qoyulmalı idi. Lakin müqavilənin icrası vəziyyətinə görə tərəflər indiyə kimi bir-birini ittiham edir.
