Rusiya dövlət başçısı Vladimir Putin Türkiyə prezidenti Rəcəb Tayyib Ərdoğanla görüşmək üçün Ankaraya səfərə edib. Baki-xeber.com xəbər verir ki, Ərdoğan və Putin arasında mətbuata qapalı keçirilən görüş bir saata yaxın davam edib.
Görüşdən sonar prezidentlər mətbuat konfransı keçirib.
Türkiyə ilə Rusiya arasındakı əlaqələrin inkişafı hər sahədə davam edir. Bu siyasi ahəng bəşəri, ticarət, enerji və turistik əlaqələrə də əks edir. Bunu Türkiyə prezidenti Rəcəb Tayyib Ərdoğan Ankarada rusiyalı həmkarı Vladimir Putin ilə görüşdən sonra keçirilən mətbuat konfransında deyib.
Putin ilə regional problemlərdən də danışdıqlarını deyən Ərdoğan vurğulayıb ki, ABŞ prezidenti Trampın Qüdsü İsrailin paytaxtı elan etmə qərarı bütün dünyada əks-səda doğurub. Müsəlman, xristian və məntiqli yəhudilər də xəyalqırıxlığı yaşayır.
Ərdoğan Suriyada nizamlanma prosesini müzakirə etmək üçün rusiyalı həmkarı ilə Soçidə görüşmək niyyətində olduğunu bildirib. "Bölgədəki mühüm məsələləri müzakirə etdik. Bu gün Suriya ilə bağlı məsələyə, son görüşümüzdə qəbul edilən qərarlara toxunduq və Soçidə daha bir görüşün keçirilməsinə dair razılığa gəldik. Əsas məsələlərdən biri Qüdslə bağlı vəziyyətdir. ABŞ müsəlmanları, xristianları və hətta yəhudiləri də məyus edən qərar qəbul edib. İsrail bunu Fələstinə təzyiq etmək imkanı kimi görür”, deyə Ərdoğan qeyd edib.
Ərdoğan S-400 zenit-raket mövzusuna da toxunub və "Bizim müvafiq orqanlarımız lazımi işləri görəcək və bu həftə işi başa çatdıracaq", — deyə bildirib.
Putin isə Suriya məsələsində Türkiyə ilə sıxı əməkdaşlığın davam etdiyini və bu torpaqların böyük hissəsinin terrorçulardan təmizləndiyini söyləyib.
Putin Suriyada həll yolu üçün Ərdoğanın cəhdlərini təqdir etdiyini bildirib, Qüds məsələsində isə ABŞ rəhbərliyini "sülh prosesinə zərər verən qərar" qəbul etdiyinə görə tənqid edib: “Qeyd etmək istərdim ki, danışıqlar işgüzar və konstruktiv şəraitdə baş tutdu. Biz ikitərəfli əməkdaşlıq, o cümlədən strateji ticarət-iqtisadi və hərbi-texniki layihələrin həyata keçirilməsini müzakirə etdik, beynəlxalq və regional gündəliyin aktual məsələləri ilə bağlı fikir mübadiləsi apardıq”.
Putin bəyan edib ki, ABŞ prezidenti Donald Trampın Yerusəlimi İsrailin paytaxtı kimi tanımaq qərarı Yaxın Şərqdə vəziyyətin nizamlanmasına kömək etmir: “Həm Rusiya, həm də Türkiyə hesab edirlər ki, ABŞ rəhbərliyinin Yerusəlimi İsrailin paytaxtı kimi tanımaq və səfirliyini oraya köçürmək qərarı Yaxın Şərqdəki vəziyyətin nizamlanmasına kömək etmir. Bu, əksinə, Yaxın Şərqdə onsuzda mürəkkəb vəziyyəti daha da gərginləşdirə, Fələstin-İsrail sülh prosesinə xətt çəkə bilər”.
Qeyd edək ki, Putin Türkiyəyə səfərindən əvvəl Suriyanın Lazkiyə şəhərinə gözlənilməyən səfər reallaşdırmış və bu ölkədə yerləşən rus hərbi dəstələrin çəkilməsi üçün təlimat vermişdi.
