Yəməndə bir müddətdir davam edən vətəndaş müharibəsinin tərəfləri arasında qarşıdurmalar daha da intensivləşib. Baki-xeber.com xəbər verir ki, bu gün keçmiş prezident Ali Abdullah Saleh və İranın dəstəklədiyi üsyançı qrup Husilər arasında qarşıdurmada paytaxt Sənada İran səfirliyinə artilleriya zərbəsi endirilib.
Səfirlik binasına hücumdan qısa müddət sonra bu dəfə Husilər keçmiş dövlət başçısı Salehin yaşadığı evi vurub.
Məlumatlara görə, səhər saatlarında Salehin evinə girən husilər, öncə evdə olan bütün silahları götürüblər, sonra isə evə yerləşdirdikləri partlayıcıları işə salıblar. Başqa bir məlumata görə, isə Salehin bir qrup şəxslə avtomobillə şəhərdən çıxarkən dayandırıldığını və başına güllə ilə vurularaq öldürüldüyü bildirilir. Qeyd edilir ki, Saleh öz məmləkəti Sanxana gedirmiş. Digər bir məlumata görə üsyançılar Salehi Səudiyyə Ərəbistanına yola düşərkən öldürüb.
Sosial mediada Ali Abdullah Salehin öldürüldüyü yerdən kadrlar da yayılıb. Kadrlarda naməlum silahlı şəxslərin eks-prezidentin cəsədini odeyalın arasında necə apardıqları görünür.
Hadisədən sonra Husilərə yaxın radiolar Saleh öldürüldüyünü bəyan edib. Onun lideri olduğu partiya da keçmiş prezidentin öldüyünü təsdiqləyib. “O, respublikanın müdafiəsi uğrunda şəhid olub” deyən Ümumi Xalq Konqresinin lideri Faiqə Əl-Seyyid, Salehin paytaxt Sənanın cənubunda qətlində Husi üsyançılarını günahlandırıb.
Hadisədən sonra Yəmən prezident Abdurabbu Mənsur Hadi dərhal müxtəlif qollardan paytaxt Sanaya girilməsi barədə təlimat verib. Bununla bağlı açıqlama verən prezidentin köməkçisi onun “Keçmiş prezident Əli Abdullah Salehə bağlı güclərlə birləşərək Husilərə qarşı bir neçə cəbhə açın və Sanaya daxil olun" təlimatı verdiyini ifadə edib.
Salehin ölümü alyansın dağılmasından iki gün sonraya təsadüf edir. Yəməndə Səudiyyə Ərəbistanı tərəfindən dəstəklənən rəhbərliyə qarşı birlikdə mübarizə aparan Husilər və Saleh tərəfdarları arasında son vaxtlar anlaşılmazlıq yaranıb, bu anlaşılmazlıq qarşıdurmaya çevrilib.
Şənbə günü Saleh Husi militantlarını qınayıb və Səudiyyə Ərəbistanı ilə əlaqələrin bərpa edilməsini tövsiyə edib. Tərəflər üç il bundan əvvəl səyləri birləşdirib, Səna ətrafındakı əraziləri ələ keçirərək, beynəlxalq ictimaiyyət tərəfindən tanınan prezident Əbdu Rabu Mənsur Hadini ölkədən qaçmağa və Səudiyyə Ərəbistanının başçılığı ilə hərbi müdaxilə haqda müraciət etməyə vadar edib.
Bu yaxınlarda tele-müraciəti zamanı Saleh Yəmənin limanlarının mühasirəsinə son qoymağa çağırıb və bunun müqabilində “yeni səhifə açmağa” və onlarla müsbət yolla davranmağa” çağırıb.
Salehə sadiq döyüşçülər və Husilər arasında ilk toqquşma keçən həftə Saleh üsyançıları Sənadakı böyük məscidə və onun qardaşı oğlu - xüsusi təyinatlı qüvvələrin nüfuzlu komandiri Tarik Salehə hücum etməkdə ittiham etməsindən sonra baş verib.
Qeyd edək ki, 75 yaşlı Saleh Yəməni 30 ildən artıq bir müddət idarə etdikdən sonra 2012-ci ildə siyasi təzyiqlər nəticəsində hakimiyyətdən devrilib. Lakin buna baxmayaraq, o, İranın dəstəklədiyi Husilərlə alyans yaradaraq, səhnə arxası hakimiyyətini saxlamaqda davam edirdi.
