Rusiya, İran və Türkiyə Suriya üzrə əməkdaşlığın prioritet sahələrini müəyyənləşdirən birgə bəyanat qəbul ediblər. APA-nın TASS agentliyinə istinadən verdiyi xəbərə görə, bunu Rusiya prezidenti Vladimir Putin bəyan edib.
”Sənəddə Rusiya, Türkiyə və İran arasında Suriyada gələcək əməkdaşlığın prioritet sahələri müəyyən edilib, qarşıya konkret vəzifələr qoyulub", - deyə Rusiya dövlət başçısı jurnalistlərə bildirib.
V.Putin bildirib ki, dövlət başçıları terrorizmə qarşı birgə mübarizədə əhəmiyyətli uğurların əldə olunmasını qeyd ediblər, İŞİD, “Cəbhət ən-Nüsrə” və digər terror qruplaşmalarının birdəfəlik məhv edilməsi üçün səyləri artırmağa hazır olduqlarını təsdiqləyiblər.
Üç ölkə lideri həmçinin Soçidə Suriya Milli Dialoq Konqresinin keçirilməsinə dair razılığa gəliblər. “Məmnuniyyətlə qeyd edirəm ki, İran və Türkiyə prezidentləri Suriya Milli Dialoq Konqresinin keçirilməsi təşəbbüsünü dəstəkləyiblər”, deyə V.Putin qeyd edib. Onun sözlərinə görə, Suriyanın müxtəlif siyasi partiyaları, etnik və dini qruplarını bir araya gətirmək planlaşdırılır. “Bir daha vurğulamaq istəyirəm - Suriyanın taleyini suriyalılar həll etməlidir. Həm hökumət, həm də müxalifət tərəfdarları", - deyə Putin vurğulayıb.
Baki-xeber.com xəbər verir ki, Almaniyanın “Der Tagesspiegel” qəzeti isə görüşdən əvvəl yazıb ki, Ərdoğan, Putin və Ruhani Soçidə sammitində ABŞ-ı bir kənara itələyib Suriyanın gələcəyinə dair qərarlar qəbul edəcəklər.
Zirvədə qazanan tədəfin Suriya prezidenti Bəşər Əsədin olacağını xatırladan qəzet, Soçiyə dəvət edilməyən ABŞ-ın artıq uduzan tərəf olduğunu yazıb.
ABŞ-ın Ankaradakı keçmiş səfiri Erik Edelman isə bildirib ki, ABŞ-ın Suriyada həyata keçirmək üçün "əks strategiyası" yoxdur. Edelman vurğulayıb ki, Rusiya və İran heç bir maneə ilə qarşılaşmadan Suriyada istədikləri rejimi quracaqlar.
