NATO baş katibi Yens Stoltenberq Norveçdə keçirilən təlim zamanı hədəf lövhəsi olaraq Türkiyə prezidenti Rəcəb Tayyib Ərdoğan və Türkiyə Cümhuriyyətinin qurucusu Atatürkün fotolarının seçilməsi ilə bağlı Türkiyədən üçüncü dəfə üzr istəyib.
Baki-xeber.com xəbər verir ki, Stoltenberg Ərdoğanla telefonla danışıb. O, NATO təlimində "Atatürk və Ərdoğan düşmənçiliyinə" görə təkrar üzr istəyib. Stoltenberq skandalla bağlı araşdırma aparıldığını və məsələyə səbəb olan norveçli müqaviləli texniki işçinin dərhal işdən kənarlaşdırıldığını söyləyib. Stoltenberq bənzər hadisələrin təkrarlanmaması üçün bütün zəruri tədbirləri götürəcəyini və son qalmaqalın NATO-Türkiyə münasibətlərinə mənfi təsir etməyəcəyinə ümid etdiyini deyib.
Qeyd edək ki, bu gün hakim Ədalət və İnkişaf Partiyasının toplantısında çıxış edən Ərdoğan NATO-nun Norveçdə keçirilən təlimlərində Mustafa Kamal Atatürkün fotolarının düşmən hədəfi kimi göstərilməsinə görə Alyans rəhbərliyinin üzrxahlığını qəbul etməkdən imtina etdiyini bildirib.
“Dünən NATO təlimlərində yol verilən hörmətsizliyin şahidi oldunuz. Elə səhvlər var ki, səfeh yox, alçaq adamlar edir. Bu cür mövzu adi üzrxahlıqla bağlana bilməz”, - deyə R.T.Ərdoğan bildirib.
Qeyd edək ki, NATO-nun Norveçdə keçirilən təlimi zamanı hədəf lövhəsi olaraq Türkiyə prezidenti Rəcəb Tayyib Ərdoğan və Türkiyə Cümhuriyyətinin qurucusu Atatürkün fotoları seçilib. Türkiyə prezidenti R. T. Ərdoğan hadisə ilə əlaqədar təlimdə iştirak edən 40 türkiyəli hərbçinin geri çağırıldığını açıqlayıb. NATO-nun rəsmi açıqlamasında R. T. Ərdoğanın fotosunu hədəf kimi qoyan zabitin artıq işdən azad edildiyi bildirilib. Atatürkün fotosunun isə texniki işçi tərəfindən seçildiyi, onun da işdən kənarlaşdırıldığı açıqlanıb. NATO baş katibi Yens Stoltenberq Norveçdə keçirilən təlim zamanı hədəf lövhəsi olaraq Türkiyə prezidenti Rəcəb Tayyib Ərdoğan və Türkiyə Cümhuriyyətinin qurucusu Atatürkün fotolarının seçilməsi ilə bağlı Türkiyədən üzr istəyib. NATO-nun Müttəfiq Qüvvələr Komandanlığı isə Türkiyə Silahlı Qüvvələri Baş Qərargahına üzrxahlıq məktubu yollayıb.
Baki-xeber.com
