Səudiyyə Ərəbistanının Kralı Selman bin Əbdüləziz əl-Saud kral tacını oğluna verməyə hazırlaşır. Baki-xeber.com xəbər verir ki, bu barədə “Daily Mail” qəzeti kral ailəsinə yaxın bir mənbəyə istinadən xəbər yayıb.
Bildirilir ki, Səudiyyə Ərəbistanının Kralı Selman bin Əbdüləziz əl-Saud öz siyasi səlahiyyətlərini gələn həftə 32 yaşlı oğlu şahzadə vəliəhd Məhəmməd bin Salmana verəcək.
“Daily Mail” qəzetinin, kral ailəsinə yaxın bir mənbəyə istinadən xəbər yayıb. Mənbənin sözlərinə görə, Kral Selman bundan sonra siyasətdə Böyük Britaniyanın Kraliçası kimi rol oynayacaq və yalnız "Müqəddəs məbədlərin qoruyucusu" adından istifadə etəcək.
Bu arada, Səudiyyədə həbs olunan nazirlər, varlı şahzadələr və iş adamları ilə bağlı yeni xəbərlər yayılıb. Onlar bahalı otellərdə məhbus edilib. Iddialara görə, paytaxt Riyadda 7 ulduzlu Ritz Carlton otelində saxlanana şahzadə Əlvalid bin Təlal intihara cəhd edib. Onun intihar cəhdinin qarşısı son anda alınıb və otaqda intihar etmək üçün istifadə edə biləcəyi bütün əşyalar çıxarılıb. Təlalın ağır işgəncələrə məruz qaldığı iddia edilir.
Qeyd edək ki, Valid bin Talal, 18 milyard dollarlıq şəxsi sərvəti ilə dünyanın ən zəngin 45-ci adamı kimi tanınır.
Bundan başqa, Səudiyyə Ərəbistanında korrupsiya iddiaları ilə həbs edilmiş biznesmen və kral ailəsi nümayəndələrinə "pullarını verib azad olmaq" təklifi edildiyi bildirilir. Bu barədə "The Guardian" qəzeti yazıb. Məqalədə deyilir ki, hazırda 200-dək şahzadə, nazir, zabit və varlı biznesmen ölkənin beşulduzlu otellərində "dustaq" edilib. Onların əksəriyyəti Riyaddakı Ritz-Carlton otelində saxlanır.
Bu "dustaqlarla" davam edən danışıqlardan xəbərdar mənbələr "Financial Times" qəzetinə deyiblər ki, onlara yığdıqları sərvətin 70 faizini qaytarmaq şərtilə azadlığa buraxılmaq təklifi edilib.
Qəzet yazır ki, "məhbus şahzadələr" bu şərtə razılaşsalar, milyardlarla dollar ölkənin tükənmiş xəzinəsinə qayıda bilər.
Səudiyyə Ərəbistanının baş prokuroru deyib ki, o hazırda 100 milyard dollarlıq vəsaitin mənimsənməsinə dair təhqiqat aparır. O da xəbər verilir ki, ölkə boyunca 1700 bank hesabı dondurulub.
Şahzadələrin və başqa zənginlərin həbs edilməsi əmrini kral Salman şahzadə vəliəhd Məhəmmədin təklifi ilə verib. Həbs edilənlərin arasında Citigroup və Tvitter şirkətlərində böyük paya malik şahzadə Əlvalid bin Təlal da var. O kral Salmanın qardaşı oğludur və ölkədə planlaşdırılan islahatları dəstəklədiyini bildirib.
"Middle East Broadcasting" mərkəzinin rəhbəri Valid əl-İbrahim də həbs edilib. O, eyni zamanda əl-Ərəbiyyə televizya kanalının sahibidir. Bu arada nəhəng Saudi Binladin tikinti şirkətinin sahibi Bəkr bin Ladenin də həbs olunduğu xəbər verilib.
"The Guardian" yazır ki, bahalı otellərdə məhbus edilmiş biznesmenlərə aktivlərini dövlətə təhvil vermək təklif edilib. Bu da xəbər verilir ki, topladıqları sərvəti qaytarmaqdan başqa biznesmenlər həm də vəliəhd Məhəmməd bin Salmana sədaqət andı içməlidirlər.
“Financial Times” yazır ki, həbs edilənlərin çoxu daşınan və daşınmayan əmlaklarını verib azad olunmaq istəyir. Qeyd edilir ki, əsas pullular Ritz otelində saxlanır. Hakimiyyətə yaxın adamlardan biri FT-yə deyib ki, onlara aydın şərt qoyulub: "Yediyinizi qusun və evinizə gedin".
FT yazır ki, kral ailəsinin üzvləri neftin baha olduğu vaxtlarda xəzinədən milyonlarla dollar təqaüd alıblar.
Tənqidçilər bunu da vurğulayırlar ki, hakimiyyəti zəbt etmiş Məhəmməd bin Salman potensial rəqiblərini pulsuz qoymaq istəyir. Bu da xəbər verilir ki, kral ailəsinin və biznesmenlərin heç də hamısı həbs edilməyib. "Financial Times" yazır ki, həbs edilənlərin həbsxanada yox, dəbdəbəli otellərdə saxlanması onlarla dil tapmaq cəhdindən xəbər verir. Vəzifəli rəsmilərdən biri mətbiuata deyib ki, vəliəhd şahzadə yaxın qohumlarını zindana ata bilməzdi və məhz bu səbəbdən onları bahalı otellərdə saxlayır.
"The Guardian" yazır ki, Səudiyyə Ərəbistanında son zamanlar ictimai islahat cəhdləri edilir. Məsələn, qadınlara maşın sürmək icazəsinin verilməsi, habelə dini polisin səlahiyyətlərinin məhdudlaşdırılması bu qəbildəndir.
Ötən ay Məhəmməd bin Salman "The Guardian" qəzetinə demişdi ki, o, Səudiyyəni mötədil İslama qaytarmaq istəyir.
Bundan başqa vəliəhd şahzadə, habelə ölkənin neft asılılığından azad edilməsini planlaşdırır.
Məqalədə deyilir ki, Səudiyyə Ərəbistanı əhalisinin 70 faizi yaşı 30-dan az olanlardır. Növbəti onillik ərzində 5 milyon səudun işləmək yaşı çatacaq, lakin krallıqda hazırda bu qədər iş yerləri yoxdur.
Ötən il Səudiyyə Ərəbistanının büdcə kəsiri 79 milyard dollar olub və neft qiymətlərinin aşağı olması ölkəni resessiyaya salıb.
TAHİR
