Azərbaycan hər il sürəti artan qlobal internet şəbəkəsi ilə ayaqlaşa bilmir. Bu ilin iyul ayında Azərbaycan mobil internetin sürətinə görə digər ölkələr arasında 2 pillə geriləyib və 31,21 MB/S sürətlə 60-cı pillədə qərarlaşıb. Bu barədə “Speedtest Global Index” xəbər verib.
Məlumatda deyilir ki, ötən ay Azərbaycan sabit genişzolaqlı internetin orta sürətinə görə dünyada 121-ci yerdə qərarlaşıb ki, bu da iyun ayı ilə müqayisədə 3 pillə geriləmədir. İyulda ölkədə sabit genişzolaqlı internetin orta sürəti 20,89 MB/S olub.
Dünyada qlobal internet sürəti artdığı ərəfədə Azərbaycanda bu hal geriləyir. İnternet sürətinin geriləməsi beynəlxalq hesabatlarda da öz əksini tapır.
Maraqlıdır, ölkəmizdə internetin sürəti nə zaman düzələcək?
“Kəndlərin əksəriyyətində normal 3G və 4G mobil internet xidməti göstərilmir, yüksək sürətli nə mobil internet, nə də fiber optika var”
Azərbaycan İnternet Forumunun prezidenti Osman Gündüz bildirdi ki, bizdə son zamanlarda internetin sürətinin yaxşılaşdırılmasında irəliləyişlər var: “Çox güman ki, siyahıda olan ölkələrin bəzilərində vəziyyət yaxşılığa doğru dəyişdiyi üçün bizdə geriləmə olub. Əslində, bizdə sürət həmin sürətdə qalıb. Çünki bizdə son dövrlərdə internetin sürətində müsbətə doğru xeyli addımlar atılıb. İstəyir “Aztelecom”, istərsə də “Baktelecom” aşağı sürətlərin dayandırılması, yuxarı sürətə keçdiklərini açıqlayıblar. Hətta bununla bağlı problem də yaşanmışdı. Rəqəmsal İnkişaf Nəqliyyat Nazirliyi özəl provayderlərlə iş birliyi ilə həm Bakı ətrafında, həm də regionlarda artıq fiber optik (FTTx) infrastruktur qurulur. Yəni ADSL-dən (Assimmetrik Rəqəmsal Abunəçi Xətti) imtina olunur və GPON (“Gigabit Passive Optical Network” – Gigabit tutumlu Passiv Optik Şəbəkə) texnologiyası vasitəsilə şəbəkə çəkilir. Həmin GPON-la çəkilən infrastruktur bəzi yerlərdə tamamlandığına görə, qurumlar daha sürətli internet təqdim edirlər”.
Ekspertin sözlərinə görə, problem regionlarda, xüsusilə kəndlərdə daha çox müşahidə edilir: “Region mərkəzlərində bu istiqamətdə işlər görülsə də, bütövlükdə, əhalinin böyük əksəriyyətinin yaşadığı kəndlərdə fiber optik internetlə bağlı problem var. Burada yüksək sürət əldə etmək mümkün deyil. Kəndlərin əksəriyyətində normal 3G və 4G mobil internet xidməti göstərilmir. Yəni yüksək sürətli nə mobil internet, nə də fiber optika var. Kəndlərdə vəziyyət belə olduğuna görə, toplam ölkə üzrə internetin orta statistik göstəricinə təsir edir. Bununla bağlı nazirlik 2 illik proqram elan edib. Həmin müddətin artıq yarısı gedib. Nazirlik bütün ölkə üzrə yeni bir fiber optik internet infrastrukturun yaradılmasını hədəfləyir. Bu istiqamətdə müəyyən işlər aparılır. Ancaq görülən işlər ləng gedir. Elə rayon var ki, kəndlərində infrastruktur qurmağa başlayıblar, dirəkləri yerləşdirib, kabelləri çəkiblər, amma internet verə bilmirlər. Hesab edirəm, nazirlik özü monitorinq aparmalıdır ki, kimlərlə işləyir, hansı podratçılarla iş qurur”.
Günel CƏLİLOVA
