Acgöz məmurların günahı üzündən Lerikin dağ kəndi olan Daster də öz ağır günlərini yaşayır. Kənd sakinlərinın rahatlığı çoxdan əlindən alınıb. Azərbaycan dövlətinin dinamik inkişaf etdiyi bir vaxtda dasterlilər sosial problemlər əlindən dədə-baba yurdunu tərk etmək məcburiyyətində qalıblar. Çoxdandır səlahiyyət sahibləri dasterlilərin yaşım tərzi ilə maraqlanmır, hər il də burada yeni bir sosial problem üzə çıxır. İndi bu dağlar diyarında sovet vaxtı tikilən əksər evlər boşdur.
Son illər kənd adamların həyatına daha çox ağrı-acı qatan ictimai nəqliyyatın, bankomatın, eləcə də “mavi” qazın yoxluğudur. Kənd sakini Aydın Cabbarov deyir: - Bütün sahələrdə dövlətin qayğısından uzaq düşmüşük. Yalançı, rüşvətxor məmurların yaratdığı süni maneələri hələ demirəm. Xoş, rahat günlərimiz gedib, bir-birindən çətin sosial problemlər, cansıxıcı güzəran əl-qolumuzu sındırıb. Mən özüm yaşlı adamam, dövlətin pensiyasına möhtacam. Kənddə, ona yaxın ətrafda bankomat quraşdırılmayıb. Məhz buna görə də aylarla pensiyamdan istifadə edə bilmirəm. 30 ildir ictimai nəqliyyatın üzünə həsrətik. Məcburən bir yana çıxanda ara sürücülər bizi soyurlar. Son illər evlərdə yandırmağa yanacaq tapa bilmirik. Bu kənd sakinləri hər şeydən daha artıq narahat edir. Əvvəllər meşədən odun gətirə bilərdik. Elə bizim yerli məmurlar onu da camaata çox bildilər. Meşəyə girmək qadağandır, məmurların qoyduğu qaydalara görə odun qızıl qiymətə qalxdığı üçün ona yaxın düşə bilmirik. Bu yandan isə 10 ildir Dasterə qazın verilməsi yalan vəddən başqa bir şey deyildir...
Bax, belə dasterlilər uzun illərdi ağır həyat yaşayırlar. Vəziyyət rayon rəhbərləri heç narahat etmir. Ümid qalır yalnız ölkə rəhbərliyinə. Ən azı aparılan düzgün siyasət nəticəsində hər gün çiçəklənən Azərbaycana ölü bir kənd yaraşmır...
Zəfər ORUCOĞLU Azərbaycan Jurnalistlər Birliyinin üzvü
