Hazırda dünyanın bir çox ölkəsində elektrik mühərrikli nəqliyyat vasitələrindən istifadə olunur. Xüsusən də ictimai nəqliyyat üçün elektrikli avtobuslardan istifadə edən ölkələrin sayı getdikcə artır. Bu isə, öz növbəsində, başadüşüləndir. Çünki bunun bir çox müsbət cəhəti var.
Belə ki, elektrik mühərrikli nəqliyyat vasitələri ekologiyanı çirkləndirmir, ətraf mühit üçün olduqca faydalıdır. Nəzərə almaq lazımdır ki, son illərdə havanın çirklənməsi pik həddə çatıb. Ənənəvi avtobuslar yerinə elektrikli avtobusların şəhərdə fəaliyyət göstərməsi isə havanın təmizliyinin qorunmasında da müstəsna rol oynayır.
Qeyd edək ki, 2020-ci ildə Bakı Nəqliyyat Agentliyi 2022-ci il yanvarın 1-dən şəhər nəqliyyatında elektrikli və sıxılmış təbii qaz mühərrikli avtobusların istismara buraxılacağı barədə açıqlama yaydı. Ancaq hələ də qeyd olunan nəqliyyat vasitələri yoxdur. Ümumiyyətlə, Bakıya elektrikli avtobuslar nə zaman gətiriləcək?
“Bakı Nəqliyyat Agentliyi birdən-birə qazla işləyən avtobusları alıb gətirdi, məlum oldu ki, qazdoldurma məntəqələri kifayət qədər deyil”
Nəqliyyat eksperti Elməddin Muradlı bildirdi ki, Azərbaycanda elektrikli avtobuslar əslində 2022-ci il üçün nəzərdə tutulurdu: “Yəni bu il üçün ki, Bakı şəhərinə dizel mühərrikli avtobusların gətirilməsi və istismarı dayandırılsın. Yalnız elektrikli və qazla işləyən avtobuslar gətirilsin. Amma Baş nazir bu qərarı bir il də uzatdı. 2022-ci il ərzində də, gələn ildən də sıxılmış qazla işləyən avtobuslar və elektrikli avtobuslar gətirilə bilər”.
Ekspertin sözlərinə görə, sıxılmış qazla işləyən avtobuslar üçün normal şərait yoxdur. Bakı Nəqliyyat Agentliyi birdən-birə qazla işləyən avtobusları alıb gətirdi. Məlum oldu ki, qazdoldurma məntəqələri kifayət qədər deyil: “Ona görə neçə il yüzlərlə avtobus elə Bakı Nəqliyyat Agentliyinin həyətində yatıb qaldı ki, doldurma məntəqələri kifayət etmir. Birdən-birə elektrik avtobuslarına keçid əlverişli deyil. Elektrikli avtobuslarla bağlı bir çox problemlər də ortaya çıxır. Məsələn, bu yaxınlarda Parisdə iki elektrikli avtobus ayrı-ayrı vaxtlarda yandı. Bununla bağlı Paris meriası qərar verib ki, həmin avtobusların istismarı dayandırılsın. Hələ birinci növbədə şəxsi minik avtomobillərinin elektrik mühərrikli olması arzuolunandır ki, bunun üçün infrstruktur yaradılsa, gələcəkdə ictimai nəqliyyatın digər növləri üçün də bu şərait yaradılar”.
Günel CƏLİLOVA
