Elmi-Tədqiqat Ağciyər Xəstəlikləri İnstitutunda çalışanların maaşları verilmir. Bu barədə mətbuata institut əməkdaşları tərəfindən edilən müraciətdə bildirilib. Əməkdaşlar iddia ediblər ki, artıq 15 gündür əməkdaşların maaşları verilmir.
Buna səbəb kimi isə institutun sabiq direktoru Həqiqət Qədirovanın işdən azad olunduğu gün Elmi-Tədqiqat Ağciyər Xəstəlikləri İnstitutunun elektron məlumat bazasını qəsdən silməsini göstərirlər.
Səhiyyə Nazirliyi: “O İnstitut TƏBİB-in balansındadır”
Sabiq baş həkimin həqiqətən də məlumat bazasını məhv edib-etmədiyini aydınlaşdırmaq üçün Səhiyyə Nazirliyi ilə əlaqə saxladıq. Nazirliyin mətbuat xidmətindən bildirdilər ki, Elmi-Tədqiqat Ağciyər İnstitutu Tibbi Əraziləri İdarəetmə Birliyinin (TƏBİB) nəzdindədir və bu səbəbdən də iddialara bu qurum aydınlıq gətirə bilər: “O İnstitut TƏBİB-in balansındadır. Onlarla bağlı suallara o qurum cavab verir”
Məsələ ilə bağlı TƏBİB-ə sorğu göndərdik, Elmi-Tədqiqat Ağciyər İnstitutu ilə isə əlaqə saxladıq. İnstitutdan bildirdilər ki, Elmi-Tədqiqat Ağciyər Xəstəlikləri İnstitutunda aparılan struktur dəyişikliyi ilə əlaqədar elektron imzanın alınması və təsdiqlənməsi prosesi ilə bağlı əməkhaqlarının ödənilməsində texniki gecikmə yaranıb və problem həll olunacaq. İnstitut əməkdaşı bütün sorğulara TƏBİB-in cavab verəcəyini bildirdi. “Bütövlükdə, TƏBİB ətraflı açıqlama yayacaq. Bizdən asılı olmayan səbəblər var. Bizim müəssisənin rəhbərliyi dəyişdi. Asan imza deyilən bir məsələ var və Asan imza məsələsi həll olunduqdan sonra əmək haqqı veriləcək”.
Sabiq baş həkimin məlumat bazasını məhv etməsi ilə bağlı iddialara gəlincə, institut əməkdaşı bildirdi ki, deyilənlər həqiqəti əks etdirmir: “Xeyr, belə bir hal baş verməyib. Deyilənlər yalandır, sabiq baş həkim məlumat bazasını silməyib”.
“Elmi-Tədqiqat Ağciyər Xəstəlikləri İnstitutu” PHŞ: “Yaxın günlərdə əməkdaşların əmək haqlarının ödənilməsi nəzərdə tutulub”
TƏBİB-in isə “Elmi-Tədqiqat Ağciyər Xəstəlikləri İnstitutu” PHŞ-ın adından redaksiyamıza təqdim etdiyi cavabda qeyd edilir ki, yaxın günlərdə əmək haqlarının ödənilməsi nəzərdə tutulub: “Struktur dəyişikliyi fonunda Elmi-Tədqiqat Ağciyər Xəstəlikləri İnstutu Publik Hüquqi Şəxs olduğuna görə vergi xidmətindən reyster çıxarışı yeni direktorun adına dəyişdirilməlidir. Sənədləşmə prosesi müəyyən vaxt tələb etdiyi üçün əmək haqlarının ödənilməsində texniki gecikmə yaranıb. Yaxın günlərdə əməkdaşların əmək haqlarının ödənilməsi nəzərdə tutulub”.
Elektron məlumat bazasını sildiyi iddia edilən Elmi-Tədqiqat Ağciyər Xəstəlikləri İnstitutunun sabiq direktoru Həqiqət Qədirova işdən azad olunduğu gün İnstitutun elektron məlumat bazasını qəsdən silməsi barədə yayılan məlumatlara mətbuat vasitəsi ilə aydınlıq gətirib və barəsində səsləndirilən iddiaların yalan olduğunu deyib: “Hamısı boş sözlərdir. Nə elektron baza silmək? Maaş da verilir, hər şey də qaydasındadır. Bu nə söhbətdir insanlar danışırlar?
Oradan heç bir elektron baza silməmişəm. Bilmirəm, niyə haqqımda bu qədər sözlər yazırlar. Deməli, bəzi adamlara orda lazım olmamışam. İşləyənləri çox yerdə istəmirlər. Bütün bunlar həqiqət deyil. Maaşı mən verə bilmərəm, onu rəhbərlikdən soruşun”.
İradə SARIYEVA
