Tibb Universitetinin dərslik problemi...

Aydın Əliyev: “Tibb üzrə dərslik vəsaitləri baxımından ciddi çatışmazlıqlar var”

img

Son zamanlar ölkədə fəaliyyət göstərən ali məktəblərin xeyli bir qisminin kitabxanalarında dərslik, ədəbiyyat qıtlığı mövcud olduğu bildirilir. Azərbaycan Tibb Universitetinin (ATU) kitabxanasında da ciddi dərslik çatışmazlığı hökm sürdüyü barədə fikirlər var. Mütəxəsislər bildirir ki, dərslik çatışmazlığı tələbələrin gələcəkdə yaxşı həkim kimi yetişməsinə çox ciddi əngəl törədir.

Doğrudanmı ATU-nun kitabxanasında dərslik çatışmazlığı var? Varsa, bu çatışmazlıq nədən qaynaqlanır? Problemin aradan qaldırılması üçün hansı işlər görüləcək?

Problemlə bağlı ATU-nun və mütəxəssislərin mövqeyini öyrənmək məqsədilə hər iki tərəfə müraciət etdik və ATU-nun mətbuat xidmətinə sorğu göndərdik. Bu ali təhsil müəssisəsindən nə zaman sorğumuza cavab verilsə təqdim edəcəyik.

  • “Bu kitabxanada köhnə tibb ədəbiyyatı çoxluq təşkil edir”

Problemi qaldıran mütəxəssislərdən olan həkim-radioloq Aydın Əliyev “Bakı-Xəbər”ə şərhində bildirdi ki, Azərbaycan Dövlət Tibb Universitetində müasir tələblərə cavab verən dərsliklər sarıdan ciddi qıtlıq mövcuddur. “O sahədə, əlbəttə, çox ciddi problem var. Bunu işıqlandırsanız, ictimailəşdirsəniz çox yaxşı olar. Tibb üzrə dərslik vəsaitləri baxımından ciddi çatışmazlıqlar var. Bu kitabxanada köhnə tibb ədəbiyyatı çoxluq təşkil edir. Müasir dünya standartlarına uyğun, tibb sahəsinin inkişaf etdiyi ölkələrdə istifadə olunun və dünya üzrə əsas rəhbər kimi nəzərdə tutulan tibbi ədəbiyyatın, dərsliklərin çox ciddi şəkildə çatışmazlığı var. Bu əslində çox ciddi məsələdir. Çünki bu gün ölkədə həkimlərin bilik səviyyəsindən və s. narazılıqlar var, Onların da bir qisminin əsasında məhz bu kimi məsələlər durur. Lap gedib yerində də maraqlana bilərsiniz, tələbələrlə də söhbət edə bilərsiniz. Onlar da bunu təsdiqləyər”.

Nə üçün bu problemi kökündən həll etmirlər? Sualımıza cavab olaraq A.Əliyev bildirdi ki, bütün dünyada ən vacib məsələlərdən biri ali məktəblərdə dərslik məsələsidir. “Bu gün orta məktəblərdə dərs vəsaitlərinin elə də çatışmazlığı yoxdur. Onların səviyyəsinin necə olduğunu bilmirəm, amma ən azından orta məktəblərdə dərslik təminatı var. Amma ali məktəblərdə ümumiyyətlə dərs vəsaitlərinin, ədəbiyyatın çatışmazlığı çox-çox ciddi problemdir. Çünki gənc mütəxəssislər əsasən ali məktəblərdə yetişir və nəzəri bilgiləri əsasən orda əldə edirlər. Onlarda bilgi çatışmazlığı gələcəkdə onların işlədikləri sahədə müxtəlif ixtisaslar üzrə axsamalara, keyfiyyətsizliyə və sairə gətirib çıxaracaq. Bu, bildiyimiz kimi, bir ölkənin gələcəyini təhlükə altına atan çox ciddi starteji məsələdir”.

Probelmin həlli yollarına gəlincə, A.Əliyevin fikrincə, bu sahəyə ciddi maliyyə vəsaiti ayrılmalıdır ki, yeni dərsliklər hazırlansın, dərsliklər başqa dillərdən ana dilimizə tərcümə olunsun. Problemin hələ də mövcud olmasını maliyyə çatışmazlığı ilə bağlayan mütəxəssisin sözlərinə görə, dərslikləri hazırlamaq üçün Azərbaycanda çox güclü mütəxəssislər var və pul ayrılarsa bu dərsliyi onlar hazırlayar. “Sovet hökuməti dağılanda biz tələbə idik və onda da çox ciddi tibbi dərslik çatışmazlıqları mövcud idi. Kitabxanada köhnə ədəbiyyat vardı. Təəssüflər olsun ki, bizdə belə məsələlərə əhəmiyyət vermirlər. O qədər lazımsız yerlərə pul ayrılır ki, adam təəccüblənir. Bu vəsaiti tibb ədəbiyyatının, yeni dərsliklərin hazırlanmasına yönəltmək olar. Bu pulla yeni tibb ədəbiyyatını təmin etmək olar. Kimin marağı var, bu nə üçündür, mənim üçün də qaranlıqdır. Tibbi mütəxəssislərə gəlincə, bizdə tibb və qeyri-tibb üzrə çox savadlı kadrlar da var. Onlar çox gözəl dərsliklər yaza bilərlər, dünya səviyyəli tibbi ədəbiyyatı tərcümə edə bilərlər. Amma həmin şəxslərə maliyyə vəsaitləri verilməlidir. O adamların o qədər maddi imkanı yoxdur ki, bu işə o qədər vaxt sərf etsin. Bu alimin bir ədəbiyyatı yazması üçün onu maliyyə vəsaiti ilə təmin etmək lazımdır. Çünki işini-gücünü atıb o işlə məşğul olacaqsa, o, dövlət tərəfindən maliyələşdirilməlidir. Düzdür, düz deyil? Nə qədər savadlı, bilikli, nə qədər fədakar adam olsa da, hər şeyi kənara qoyub bu işlə məşğul olmaq onun fiziki imkanı xaricindədir. Bu işdə çox diqqət, aylar, illər tələb olunur”- deyə A.Əliyev qeyd etdi.

İradə SARIYEVA  

Peşə etikası

Son xəbərlər