Deputat Etibar Əliyev məktəb direktorunun təyinatı ilə niyə razılaşmır?..

img

Təhsil Nazirliyi yanında İctimai Şuranın üzvü, millət vəkili Etibar Əliyev “Facebook” sosial şəbəkəsindəki şəxsi profilində 165 və 210 nömrəli məktəblərdə direktor təyinatı ilə bağlı narahatlığını əks etdirən yazı paylaşıb.

Deputat, Təhsil Nazirliyi yanında İctimai Şuranın üzvü kimi, ciddi narahatlıq yaradan iki məsələyə İctimai Şura üzvlərinin münasibət bildirməsini xahiş edib: “Təəssüf ki, həmkarlarımın adından Təhsil Nazirliyinin cavabı İctimai Şuranının açıqlaması kimi təqdim olundu. Təəssüflər olsun ki, İctimai Şura adından heç bir araşdırma aparılmadan və mənimlə məsləhətləşmədən Təhsil Nazirliyinin istəyinə uyğun açıqlama verilib. Əgər rəsmi açıqlama verilirsə, mənim iştirakım niyə təmin olunmayıb?

Qoyduğum məsələnin məğzi budur: Akrobatik sıçrayışla məktəb direktoru yerinə gətirilmə əməliyyatlarının arxasında nə durur? Bu işdə hansı qruplaşmalar mövcuddur? Orta təhsildə nə üçün bu qədər narazılıqlar mövcuddur və get-gedə dərinləşir?

Məsələn, necə olur ki, Bakı şəhəri üzrə Təhsil İdarəsində məsul vəzifə tutan, əvvəllər isə iki məktəbdə direktor işləmiş bir biznesmenin bütün müavinləri "imtahan" verərək direktor təyinatı (10-dan çox) alırlar? İctimai Şura bu tip sualları Nazirliyin rəhbərliyinə verməlidir və izahat almalıdır. İctimai Şuranın varlıq fəlsəfəsi də bunu tələb edir.

Düşünürəm ki, biz İctimai Şura olaraq nöqsan və neqativlərin qarşısında durmalıyıq, bununla məşğul olanların yanında və müdafiəsində yox...”.

  • Etibar Əliyev: “Məktəb direktorlarının təyinatında çox ciddi nöqsanlar var”

Məsələ ilə bağlı millət vəkili, Təhsil Nazirliyi yanında İctimai Şuranın üzvü Etibar Əliyevlə əlaqə saxladıq. O “Bakı-Xəbər”ə açıqlamasında qeyd etdi ki, məktəb cəmiyyətin güzgüsüdür. Məktəblərdə baş verən neqativ hallara nəinki millət vəkilləri, adi vətəndaşlar da öz mövqelərini bildirməlidir: “Nəzərə almaq lazımdır ki, məktəb bütün dövrlərdə hər bir xalqın gələcəyi olub. Məktəbi kiminsə şəxsi ambisiyasına qurban vermək olmaz. Məlum məsələ ilə bağlı narazılığımı bildirdim ki, direktorların təyinatında çox ciddi nöqsanlar var. Bu fikrimin üstündə də dururam.

Bakı Şəhər Təhsil İdarəsi ilə Təhsil Nazirliyinin direktorların təyinatı ilə bağlı mövqeyi mənim üçün maraqlı deyil. Bu məsələ ilə bağlı məndə kifayət qədər məlumatlar var. Sizin qəzet vasitəsilə həmin qurumlara demək istəyirəm ki, ictimai dinləmə təşkil edə bilərlər. İctimai dinləmədə mən öz fikrimi deyə bilərəm və buna da mən hazıram”.

E.Əliyev onu da əlavə etdi ki, məktəblərin indiki vəziyyəti ilə razı deyil: “İstəmirəm uşaqlarımızın gələcəyi qaranlıq olsun. Danılmaz faktdır ki, məktəb bütün dövrlərdə həm tərbiyə funksiyası yerinə yetirib, həm sağlamlıq, həm də uşaqlara bilik verib. Məktəb şagirdlərin fiziki hazırlığını inkişaf etdirir, hərbi dərslərə onların müəyyən bacarıqlarını inkişaf etdirir, ali məktəbə hazırlaşdırır”.

Millət vəkilinin sözlərinə görə, ümumtəhsil məktəblərinə direktor vəzifəsinə təyinat təcrübəsi, şəxsi bacarıq və keyfiyyətləri əsas götürülməklə təlimlərə cəlb olunduqdan sonra müvafiq imtahan və müsabiqələrdən keçən şəxslər​ təyinat almalıdır. Ancaq bəzi direktorlar imtahan və müsahibələrdə iştirak etmədən direktor olur. Belə halların sayı çoxdur.

  • Kamran Əsədov: “Etibar Əliyev konkret bu məsələdə haqlı idi, çünki…”

Təhsil eksperti Kamran Əsədov qeyd etdi ki, Təhsil Nazirliyi yanında yaradılan və iki ildən bir formalaşan İctimai Şura bu il əvvəlki illərlə müqayisədə fərqli fəaliyyət göstərməyə başlayıb. Şura üzvləri işləməyə daha meyllidirlər, tədbirlər keçirirlər: “Lakin bunların çoxu görüntü xatirinədir. Deputat Etibar Əliyev Şuranın üzvü olmasına baxmayaraq, ciddi məsələlərə toxundu. İctimai Şuradan ona münasibət bildirilməsini istədi. Daxillərində vahidliyi qoruya bilmirlər. Özü bir komanda ola bilməyən qurumdan ciddi nəsə gözləyə bilmərik. Üzvlər arasında ciddi konflikt hiss olunur. Onlar daha çox nazirliyin SMM xidmətini yerinə yetirməklə məşğuldurlar. Təhsildə baş verən neqativlərə yox, tədbirlərdə əl çalmaq, bəy tərifi demək funksiyasını yerinə yetirməyə meyllidirlər. Kimsə hər hansı məsələni tənqid edəndə ona qarşı kütləvi hücuma keçirlər. İctimai Şura əslində həmin quruma nəzarət edən təşkilatdır. Ölkə Prezidentinin dəfələrlə vurğuladığı ictimai iştirakçılar burada əsas faktordur. Amma biz bunu görə bilmirik.

Müəllimlərin işə qəbulunda, yerdəyişməsində də müəyyən problemlər olur. İnsanlar öz problemlərini aidiyyəti qurumlara çatdırmaqla bağlı kömək istəyirlər. Amma biz bu məsələdə Şuranın fəaliyyətini görə bilmirik. Etibar Əliyev konkret bu məsələdə haqlı idi. Çünki Təhsil Nazirliyi ikinci dəfə açıqlamasını İctimai Şura vasitəsilə yaydı. Əslində bu, Şuranın açıqlaması deyildi. Onlar bu məsələdə də yenidən SMM xidmətlərini işə saldılar. İnsanlar, xüsusən son bir ildə təhsildə çoxalan neqativlərdən narahatdırlar. Artıq məktəblərdə vəziyyət o həddə çatıb ki, qız uşaqları bir-birini bıçaqlayır. Bunlar ciddi məsələlərdir”.

K.Əliyev hesab edir ki, Etibar Əliyevin sosial şəbəkədə yazdığı ittiham deyil, konkret faktlar idi: “Onlar isə direktor təyinatının kifayət qədər uğurlu olduğunu açıqlayırlar. Əslində belə deyil. Guya 165 nömrəli məktəbə təyin olunan direktor uğurlu seçim olub. Hansı uğurlu seçim? O məktəbin göstəricilərinə baxanda seçimin uğurlu olduğunu görə bilmirik. İllər ərzində məktəbin nəticələrində ciddi irəliləyiş olmayıb. Kifayət qədər tanınmış, nüfuzlu deputat, Şuranın üzvü Etibar Əliyev bu neqativləri deyirsə, bu onu göstərir ki, onlar daxillərində məsələləri müzakirə etməyiblər. Müzakirə olunsa belə, sağlam nəticə olmayıb. Artıq bu onu göstərir ki, Şuranın daxilində sağlam mühit yoxdur. Bu qurum, sadəcə, Təhsil Nazirliyinin bəy tərifini deməklə məşğuldur”.

Günel CƏLİLOVA

Peşə etikası

Son xəbərlər