Bu gün xaricdə 500-dən artıq azərbaycanlı alim çalışır. APA-nın xəbərinə görə, bunu Azərbaycan Alimlərinin I Qurultayda çıxışı zamanı Azərbaycan Milli Elmlər Akademiyasının prezidenti Akif Əlizadə deyib. O bildirib ki, həm ölkədə, həm də onun hüdudlarından kənarda fəaliyyət göstərən alimlər dövlətin, xalqın maraqları, onun intellektual potensialının inkişafı naminə öz qüvvələrini səfərbər etməlidirlər.
A. Əlizadə qeyd edib ki, Azərbaycanda çalışan 5000-dən artıq gənc alim və mütəxəssisin də üzərinə məsul vəzifələr düşür: "Gəncliyin müasir tələblərə cavab verən yüksək ixtisaslı kadrlar kimi yetişdirilməsi Azərbaycan elmi qarşısındakı əsas vəzifələrdəndir. Azərbaycan elmində, o cümlədən akademiyada mühüm problemlərdən biri də gənc mütəxəssislərin elmə cəlb edilməsidir. Özəl sektorda əməkhaqqı yüksək olduğundun fəal gənclər elmdən daha çox, ora meyl edirlər. Buna görə də gənclərin elmə axınını gücləndirmək üçün institutlarda imkanlar yaradılmalıdır ki, onlar əlavə maddi dəstək əldə edə bilsinlər. Gənc mütəxəssisin elmdə qalmaq qərarına təsir edən əsas səbəblər sırasında yeniliyin axtarışına maraq, aparılan tədqiqatların perspektivi, işlədiyi elmi kollektivin mənəvi ab-havası, müasir avadanlıqla təchiz edilməsi, beynəlxalq əməkdaşlıq imkanlarının olması dayanır. Bir sözlə, istər Azərbaycan Elmlər Akademiyasında, istərsə də respublikanın başqa elmi tədqiqat qurumlarında gənclər siyasəti ciddi şəkildə müzakirə edilməli və bunun əsasında həm akademiyaya, həm də bütövlükdə elmə gənc alimlərin cəlb edilməsi siyasətinin başlıca prinsipləri hazırlanmalıdır”.
