Bir ildən artıqdır ki, cəmiyyətimiz pandemiyadan əziyyət çəkir və insanlar bir sıra problemlərlə üzləşirlər.
Pandemiya ilə bağlı tətbiq edilən məhdudiyyətlərə görə əksər halda vətəndaşlar dövlət məmurlarının qəbuluna düşə bilmirlər. Məlumatlara görə, pandemiya ilə əlaqədar olaraq dövlət idarələrində və özəl sektorda vətəndaş qəbulu dayandırılıb. Vətəndaşlar şikayət edirlər ki, qəbulun dayandırılmasına anlayışla yanaşırlar, amma bir çox halda onların telefon zənglərinə, onlayn müraciətlərinə cavab verilməməsini isə heç cür anlaya bilmirlər. Elə vətəndaşlar var ki, hansısa idarəyə, quruma günlərlə zəng vurur, amma ona cavab belə verən olmur.
Pandemiya şəraitində vətəndaşların müraciətlərinə necə baxılmalıdır ki, onlar narazı qalmasınlar?
Ekspertlərin sözlərinə görə, vətəndaşların narazılıqları haqlıdır, dövlət idarələri və özəl sektor dildə deyil, əməldə onlayn şəkildə aktiv işləməli və telefon zənglərinə operativ cavab verməli, vətəndaşın problemlərini həll etməlidirlər.
“Bürokratik əngəllər çox olur”
“Novoye vremya” qəzetinin baş redaktoru Şakir Ağayev bizimlə söhbətində bildirdi ki, bu olduqca aktual və insanları narahar edən məsələlərdən biridir və bunun həlli vacibdir. “Olduqca aktual bir məsələni vurğulayırsınız. Bir çox idarə və müəssisə pandemiya dövründə vətəndaşları bu şəkildə narazı salır. Düzdür, bəzi idarə və müəssisələr pandemiyadan əvvəl də vətəndaşların şikayət və müraciətlərinə düzəməlli baxmırdılar, süründürməçiliyə yol verirdilər, vətəndaşların qəbulu məsələsində bürokratik əngəllər törədirdilər. Çox təəssüflər olsun ki, pandemiya bəzi idarə və müəssisələr üçün vətəndaşların qəbulu məsələsində bir bəhanə olub və vətəndaşların qəbulunda ciddi problemlər yaranıb. Bəli, pandemiyadır, hər kəs vəziyyəti başa düşür, amma pandemiya olmasına baxmayaraq, həyat davam edir, ölkənin bütün qurumları işləyir, idarə və müəssisələr fəaliyyət göstərirlər, bu halda onlar vətəndaşların müraciətlərinə biganə yanaşmamalıdırlar. Həyat dayanmayıb, həyat sönməyib ki. Həyat davam edirsə və biz pandemiya şəraitinə uyğun işləyiriksə, təbii, məmurların da işi vətəndaşların onlara ünvanladıqları ərizələri araşdırıb, şikayətlərini dinləyib, problemləri həll etməkdir. Amma çox təəssüf ki, bir çox məmur, idarə və müəssisə rəhbərləri bu fürsətdən istifadə edib, vətəndaşların şikayətlərinə biganə yanaşırlar. Bu bir paradoksdur, bir yerə məktub göndərmək istəyirsən, deyirlər poçta müraciət edin, poçt gətirsin, deyirsən vətəndaş gətirəcək, “vətəndaşdan qəbul olunmur” cavabını verirlər. Bunu necə yanaşmadır, anlamıram, poçt işçisinin xəstə olmadığı alnına yazılıb? Belə bürokratik əngəllər çox olur”.
Ş.Ağayevin sözlərinə görə, vətəndaşların qəbulu ilə bağlı idarə və müəssisələr addımlar atmalıdırlar. Marketlərdə, digər yerlərdə olduğu kimi, vətəndaşların ara məsafələri saxlamaqla, məhdud sayda da olsa, qəbullara buraxılmalı olduqlarını deyən Ş.Ağayevin qeyd etdiyinə görə, onsuz da vətəndaşın telefonla və onlayn şəkildə müraciətlərinə operativ cavab verilmir, bu halda isə karantin şərtləri daxilində yalnız canlı qəbul olmalıdır: “Qurumlar vətəndaşları qəbul etməli və gün ərzində müəyyən limit çərçivəsində onlar qəbul edilməli, dinlənilməli və problemləri həll edilməlidir. Heç şübhəsiz, vətəndaş idarə və müəssisələrə daxil olarkən onun hərarəti ölçülməli, bütün gigiyenik-sanitar qaydalara uyğun olaraq, onun qəbula buraxılması təmin edilməlidir. Bir variant budur ki, vətəndaşı bu şəkildə qəbul edib, onun şikayətini dinləmək, həllinə kömək etmək olar. İkinci variant isə onlayn qaydada ola bilər. Dövlət qurumları, özəl sektor xüsusi “WhatsApp” xidməti göstərməli və vətəndaşlar elan edilən nömrəyə öz şikayətlərini, problemlərini video şəklində göndərməlidirlər. Yəni vətəndaş təqdim edilən nömrəyə öz şikayəti, onu narahat edən məsələ ilə bağlı video göndərməli, bunun əsasında məsələ araşdırılmalıdır. Bu işi sosial şəbəkələr vasitəsilə həyata keçirmək olar. Vətəndaşı qəbul etməyin yolları çoxdur, sadəcə, buna istək lazımdır, istək olan yerdə yol tapmaq asandır. “Pandemiyadır, biz zəngləri, şikayətləri qəbul etmirik” kimi məsələ yoxdur”.
Ş.Ağayev deyir ki, həm dövlət, həm də özəl sektorun bəzi rəhbərləri pandemiyadan sui-istifadə etməməli, öz fəaliyyətini bu şərtlərə uyğun qurmalıdırlar: “Hər bir vətəndaşın müraciətinə baxılmalı, şikayətləri araşdırılmalı, həll edilməlidir ki, onların dövlətin apardığı siyasətdən narazılığı olmasın. Amma bəzi idarələr və nazirliklər pandemiyadan sui-istifadə edib, vətəndaşları süründürməçiliyə məruz qoyurlar. Çoxu heç əvvəl də vətəndaşı normal şəkildə dinləmirdilər. İndi də pandemiyanı bəhanə edərək problemləri həll etmək istəmirlər. Bu gün dünya təcrübəsində pandemiya dövründə vətəndaşların qəbulu ilə bağlı çox nümunə var, bunlardan istifadə etmək olar” - deyə Ş.Ağayev vurğuladı.
İradə SARIYEVA
