Azərbaycanın turizm üçün əlverişli məkanlarından biri də Dağlıq Qarabağ və ətraf rayonlardır ki, artıq bu ərazilərimizin də xeyli hissəsi düşmən işğalından azad edilib. Digər ərazilərimizin isə işğaldan azad edilməsi istiqamətində müzəffər ordumuz düşmənlə çarpışır.
Qarabağın işğaldan azad edilməsinin Azərbaycanın turizm sənayesinin inkişafına güclü təsir göstərəcəyi şübhəsizdir. Ekspertlər qeyd edirlər ki, Qarabağda sağlamlıq, istirahət turizmindən tutmuş, ekoturizmə, arxeoturizmə qədər turizmin bir çox sahəsini inkişaf etdirmək tam mümkündür.
“Torpaqlarımızı tam işğaldan azad etdikdən və qələbə qazandıqdan sonra Qarabağda böyük memorial komplekslər, muzeylər yaratmaq lazımdır”
Azərbaycan Sağlamlıq və Termal Turizmə Dəstək Assosiasiyasının prezidenti, “Milenium Konqres” turizm şirkətinin rəhbəri, turizm mütəxəssisi Ruslan Quliyev baki-xeber.com-a bildirdi ki, Qarabağ turizmin inkişafı, turizm sənayemizin daha da şaxələndirilməsi üçün böyük potensiala malikdir. O vurğuladı ki, ermənilər işğal altında olan torpaqlarımızda qanunsuz olaraq yaratdıqları turizm infrastrukturunu beynəlxalq tədbirlərdə xüsusi təqdim ediblər. “Ermənilər beynəlxalq tədbir və sərgilərdə Qarabağı ayrı stend kimi göstərirdilər. Hətta Qarabağı Ermənistan xəritəsində göstərirdilər. Biz, təbii ki, buna etirazımızı bildirirdik.
...Əsas marşrutlar içərisində Qarabağ və Naxçıvan marşrutu mövcuddur. Sovet dövründə də ümumittifaq əhəmiyyətli marşrutlar içərisində Qarabağ marşrutu çox populyar idi. Şuşada balneoloji mərkəzlər mövcud olub, orada kanat yollarının çəkilməsi üçün 42 il öncə verilmiş anonslar da var idi. Əfsuslar olsun ki, biz o günü görmədik. Unikallıq ondadır ki, bu bölgədə dini, ekoloji, aqroturizm, eləcə də turizmin digər növləri üçün əlverişli imkanlar var. Təkcə Zəngilanda çoxlu sayda termal su mənbəyi mövcuddur. Zəngilan rayonunun Mincivan qəsəbəsində, Araz çayının sol sahilində “Ocaq çinar” deyilən, müqəddəs sayılan bir çinar ağacı var. Şəfa şəhərlərinin qalıqları, Məmmədbəyli türbəsi və s. böyük turizm potensialı olan məkanlardır”.
R.Quliyev bildirir ki, Xudafərin körpüsü, Azıx mağarasına da gələcəkdə turist marşrutu ola bilər. Onun sözlərinə görə, mədəni-tarixi abidələrimiz dağıdılsa da, onların bərpasından sonra həmin istiqamətlərə turların təşkili mümkündür. “Gələcəkdə İranla bu sahədə əməkdaşlıq olacaq. Türk birliyinin burada müasir İpək yolu layihəsi mövcuddur. Azərbaycana daxil olmaq üçün Qars-İğdır-Naxçıvan marşrutu, İran ərazisindən dəmir yolu xəttinin çəkilməsi mümkün ola bilər. Burada marşrutlar təyyarə ilə nəzərdə tutulsa da, dəmir yolunun çəkilməsi turpaketin maya dəyərini də aşağı salacaq. Hazırlanacaq baş fəaliyyət planının içərisində turizm də çox böyük yer alacaq. Bu da Azərbaycanda daha çeşidli turizm xidmətlərinin təklif olunmasına gətirib çıxaracaq. Qarabağ bölgəsində turizmin inkişafı böyük marağa səbəb olacaq. Çünki postsovet məkanında da insanlar Qarabağ bölgəsinə davamlı axın edirdilər. Azıx mağarası bəşəriyyət üçün unikal abidədir. Bu mağara dünyada 7 möcüzədən biri hesab olunur. Bizim Qarabağ bölgəsində UNESCO-nun irs siyahısına düşəcək abidələrimiz var. Orada quruculuq-bərpa işlərinin keçirilməsi müəyyən zaman alsa da, Qarabağın turizm potensialından istifadə Azərbaycana iqtisadi baxımdan böyük qazanc gətirəcək”.
R.Quliyev, həmçinin, qeyd etdi ki, torpaqlarımız tam olaraq işğaldan azad edildikdən sonra bu torpaqlarda memorial komplekslər, muzeylər yaratmaq vacibdir: “Torpaqlarımızı tam işğaldan azad etdikdən və qələbə qazandıqdan sonra Qarabağda böyük memorial komplekslər, muzeylər yaratmaq lazımdır, bununla həm tariximizi təbliğ etmiş, həm də uzun illərdir dünyaya ixrac edilən yalançı erməni təbliğatına bir daha zərbə vurmuş olarıq. Turistlər gəlib hər şeyi gözləri ilə görəcəklər və bu torpaqların gerçək tarixi haqqında geniş məlumatlar alacaqlar.
Belə muzeylər Minskdə, başqa şəhərlərdə var, mən özüm o muzeyləri görmüşəm. Həm Birinci Qarabağ savaşı, həm hərb tariximizlə, həm də soyqırımlar tariximizlə bağlı muzeylər yaratmalıyıq. Mübariz İbrahimovun düşməni məhv etdiyi və ordumuz tərəfindən azad edilən və hazırda Milli Qəhrəman Mübariz İbrahimovun adını daşıyan postu da həm yerli, həm də beynəlxalq əhəmiyyətli bir ziyarət yerinə çevirə bilərik. Bu həm də gənclərin vətənpərvərlik ruhunu artırmaq üçün bizə lazımdır. Bütövlükdə, Qarabağın turizm potensialı yüksək qiymətləndirilir. Sovet dövründə də bu ənənə var idi, Qarabağ ümumittifaq turizm marşrutuna daxil olmuşdu. Sanatoriya-kurort şəraiti orada çox yüksək səviyyədə idi” - deyə R.Quliyev qeyd etdi.
İradə SARIYEVA
