Azər Həsrət: "Düşünürəm ki, görülən və görülməsi nəzərdə tutulan işlər olduqca vacibdir"
Türkiyənin rəsmi dövlət qurumları bir neçə gün öncə Azərbaycan əleyhinə materialları ilə tanınmış "kurultay.com.tr" adlı internet qəzetinin fəaliyyətini dayandırıb. İnternet qəzetinin baş redaktoru, eyni zamanda "Azadlıq" qəzetinin Ankara təmsilçisi Aydın Taşın jurnalist vəsiqəsi də ləğv edilib.
Verilən məlumata görə, internet qəzetin fəaliyyətinin dayandırılmasına səbəb Azərbaycan xalqı və dövləti haqqında həqiqətə uyğun olmayan, qərəzli informasiyaların yayımıdır.
Məlumata görə, Türkiyədə bu cür fəaliyyəti davam etdirən, həmçinin "erməni diasporu və bəzi xarici dairələr tərəfindən idarə olunan, təlimatlandırılan və Azərbaycana qarşı yönəldilən digər media orqanları və jurnalistlərə" qarşı da ciddi tədbirlərin həyata keçirilməsinə başlanıb. Artıq onlardan bir neçəsinə bu fəaliyyəti ilə bağlı ciddi xəbərdarlıq edilib.
Xatırladaq ki, bir müddət əvvəl Azərbaycan Prezidentinin ictimai-siyasi məsələlər üzrə köməkçisi Əli Həsənov Türkiyəyə səfər edərək aidiyyəti qurumların rəhbərləri və səlahiyyətli nümayəndələri ilə görüşüb. Görüşlərdə daxili siyasi məsələlər, o cümlədən xaricdən idarə olunaraq hər iki ölkənin əleyhinə fəaliyyət göstərən qruplarla bağlı ciddi müzakirələr aparılıb.
Hazırda Türkiyədə anti-Azərbaycan şəbəkənin neytrallaşdırılması ilə bağlı həyata keçirilən tədbirlər də aparılmış müzakirələrin nəticəsi olduğunu deməyə əsas verir.
Diqqətçəkən məqam qardaş ölkədə erməni diasporunun təsiri altında olan və bu istiqamətdə Azərbaycan əleyhinə fəaliyyət göstərən media resursları və jurnalistlərin olmasıdır. Türkiyədə belə bir şəbəkənin mövcud olması barədə bizim media ekspertləri nə düşünür?
Media eksperti Azər Həsrət qəzetimizə açıqlamasında bildirdi ki, belə bir şəbəkənin olması danılmaz faktdır: "Ermənilərin Türkiyədə sayı az olsa da, onların mediaya təsir imkanları böyükdür. Xüsusilə də özlərinə məxsus media orqanları və saytları var. Düzdür, fəallıqları çox nəzərə çarpmasa da, şəbəkə şəklində fəaliyyət göstərirlər. Xüsusilə də Türkiyənin aparıcı KİV-nə təsir imkanları mövcuddur. Azərbaycan müstəqillik qazanandan sonra həmin şəbəkəyə qarşı Türkiyədə bir qədər loyal münasibət olub. Ancaq mövcud situasiya və Azərbaycanın Türkiyəyə bəslədiyi münasibət qardaş ölkənin həmin fəaliyyətlərə qarşı sərt addımlar atmasını zəruri edir. Bu baxımdan da düşünürəm ki, görülən və görülməsi nəzərdə tutulan işlər olduqca vacibdir".
Məhəmmədəli QƏRİBLİ
