Emənistanda hakimiyyət və müxalifət arasında münasibətlərin getdikcə daha gərgin mərhələyə daxil olması müşahidə olunur. Bu hal parlamentdə özünü bir daha qabarıq şəkildə büruzə verib. 8 il əvvəl Serj Sarkisyanın Respublikaçılar Partiyasının siyahısından deputat olan, amma sonradan baş nazir Nikol Paşinyanın partiyasına keçən deputat Şirak Torosyan iclas zamanı bəyan edib ki, baş nazir Paşinyanın xarici siyasəti balanslaşdırılmış və uğurludur.
O, iclasda Paşinyandan uğurunun sirrini açmağı xahiş edib: “Balanslı xarici siyasət həm də çətin və mürəkkəbdir. Onun uğurunun sirri nədir?”.
Sualdan ruhlanan Paşinyan Ermənistanda nüvə reaktorunun tikintisi ilə bağlı çevik danışıqları misal çəkərək, mahir diplomatiyasından danışıb: “Biz strateji qərara gəldik ki, növbəti nüvə reaktorumuz kiçik modul tipli reaktor olacaq. Biz çoxtərəfli müzakirələr apardıq və bu qərarı verdik. İndi növbəti sual budur: bunu kiminlə edəcəyik? Mən bunu niyə deyirəm? Çünki mən Moskvaya gələndə mənə deyirlər ki, belədir, qərara alınıb ki, biz bunu Rusiya ilə tikək. ABŞ-la memorandum imzalayırıq, sonra Moskvaya gedirik, deyirlər ki, “memorandum imzalayıblar, bəs Moskvaya niyə gediblər? Tərəfdaşlığı evliliklə, evliliyi isə tərəfdaşlıqla qarışdırmaq olmaz”. Torosyandan fərqli olaraq, müxalif “Hayastan” fraksiyasının deputatları Paşinyanın diplomatiyasının gizli səhifələri ilə maraqlanıblar. Məsələn, Paşinyan 44 günlük müharibədən əvvəl ATƏT-in Minsk qrupunun təklifini niyə dərc etməyib? Müharibədən əvvəl onlar nə təklif edirdilər ki, bu erməni lider tərəfindən rədd edildi? Paşinyan açıq-aşkar bildirib ki, həmin təkliflər dərc edilməyəcək: “İndi müxaliflər yeni nəsə tapıblar. Onların eyni dırmıq üzərində addım atmaq vərdişlərinə heyran oldum. İndi yeni bir şey tapdılar. ATƏT-in Minsk Qrupu həmsədrlərinin 2019-cu il təklifi. Onlar artıq bu dırmıq üzərində addım atıblar. Memorandumlar dərc olunmur”. Parlamentin müxalif “Hayastan” fraksiyasının üzvü Artur Xaçatryan Paşinyanın bəyanatlarına istinad edərək sual edib: “Əgər o, məğlubiyyəti qələbə hesab edirsə, onda hakimiyyətin mühakimə olunduğunu iddia etdiyi hərbçilər niyə bu məğlubiyyətə görə məsuliyyət daşıyırlar? Bəs Paşinyanın partiyası niyə 44 günlük müharibəni araşdırmaq üçün parlament komissiyası yaratdı?” Nikol Paşinyan bu suala cavabda növbəti dəfə ölkənin strateji müttəfiqi Rusiyanı ittiham edib: “2022-ci ildə biz anlayanda ki, KTMT bizim qarşımızda öhdəliklərini yerinə yetirməyib, yerinə yetirməyəcək, məhz o vaxt müstəqil olduq, çünki anladıq ki, ümidlərimizi özümüzə bağlamalıyıq. Anladıq ki, sizin qurduğunuz təhlükəsizlik sistemi bir köpükdür, bu, sadəcə olaraq, dövlətimizin yaradılmasına mane olan bir vasitədir. 2021 və ya 2022. Nə qədər acı olsa da, həqiqətlə üz-üzə qalmalıyıq: Qarabağdan Ermənistanın tərəqqisinə və inkişafına mane olmaq üçün bir ip kimi istifadə olunub, indi ifşa olunmuş üç nəfərlə yanaşı, onlar dövlətin yaranmasının qarşısını almaq üçün orada idilərmi? Onlar Ermənistanda dövlətin yaradılmasına mane olurdular”. Qeyd edək ki, burada Paşinyan ölkənin sabiq üç prezidentindən bəhs edir. Nikol Paşinyan Zəngəzur dəhlizi ifadəsinə də toxunub. Ona xatırladıblar ki, Azərbaycan bu termini işlətməkdə davam edir. Paşinyan qeyd edib ki, belə bir termin Vaşinqton sənədlərində yoxdur: “Biz nə vaxtsa belə bir ifadədən ibarət sənəd qəbul etmişikmi? Bizdə olmayıb. Sadə bir sual verdim və dedim ki, nədən danışdığımıza aydınlıq gətirməyə dəyər. Məsələn, Azərbaycanda Horadiz-Zəngilan yolunu belə adlandırırlarsa, bunun bizə aid olub-olmadığını özümüzdən soruşmalıyıq. Ermənistanda bu adı Ermənistan müəyyən edir, Azərbaycanda da bu sənədin adı müəyyən edilib. Çünki biz bir-birimizin ərazi bütövlüyünü, sərhədlərin toxunulmazlığını tanıdıq, 8 avqustdan sonra belə bir fikir yarandı ki, məsələlərə başqa cür yanaşmaq, başqa cür baxmaq lazımdır”.
Nikol Paşinyan çıxışı zamanı “Daşnaksütyun” və ümumilikdə müxalifətə qarşı bir sıra digər sərt ittihamlar da səsləndirib. Proses “Hayastan” blokundan olan deputat Qeqam Manukyanın Qarabağ münaqişəsinin nizamlanması üzrə danışıqlar prosesi ilə bağlı özü ilə gətirdiyi kitabları nümayiş etdirməsi ilə başlayıb. O, onları hədiyyə kimi təklif etməyib, əksinə hökumət başçısını həm Qarabağ məsələsi, həm də sonuncunun partiyanın maliyyələşdirilməsi ilə bağlı bəyanatları və partiyaları maliyyələşdirən donorların siyahısının dərci ilə bağlı tənqid edib. Buna cavab olaraq Nikol Paşinyan oxunmamış kitabları çamadanda gətirməyi “yaxşı hiylə” adlandırırb. “Siyasi partiyalar haqqında” qanuna gəlincə, o qeyd edib ki, əgər bu sizə haradasa qapanıb partiya toplantısı keçirmək imkanı verirsə, bu, pisdir: “Gizli görüş nə deməkdir? “Gizli” – “terrorçu” demək istəmirəm. Tsağkadzorda və ya bir yerdə qurultay keçirmək nə deməkdir ki, heç kim nə baş verdiyini görməsin”. Qeqam Manukyan bəyan edib ki, Paşinyan heç bir suala cavab verməyib, donorların siyahılarını parlamentə açıqlamayıb, saxta donorların təfərrüatları isə media vasitəsilə ictimaiyyətə məlum olub: “Qanunları elə dəyişdirin ki, Nikol Paşinyan bütün partiyaların bütün qurultaylarında iştirak etsin”. Manukyan sonda xatırladıb ki, Ermənistan sülh sazişində əlindən gələni Azərbaycana verib. Spiker mikrofonu söndürməyi əmr etdiyi üçün Manukyan cümləsini tamamlaya bilməyib. Paşinyan bunlara istehza ilə cavab verib: “Siz məni yalan danışmaqda ittiham etdiniz. Mən də eyni şəkildə cavab verəcəm. Küçələrə, meydanlara çıxın, inqilabınızı edin. Bu yumşaq kreslolarda niyə oturursunuz? İnqilabınız hanı, kütləniz haradadır? Utanmırsınız? Səfərlərə çıxın. Öz hesabınıza? Hər şey belə dəhşətlidirsə, niyə burada oturursunuz? Baqramyan küçəsindəki izdiham haradadır?”. Donorlar mövzusuna qayıdaraq, o, bildirib ki, rəhbərlik etdiyi partiyanın donorlar siyahısı Azdararda dərc olunub: “Mən “Daşnaksütyun”un siyahısını görmək istəyirəm. Onlar barədə heç bir məlumatınız yoxdur. Siz siyasi fəaliyyətlə yox, daha çox sui-qəsd fəaliyyəti ilə məşğul olduğunuz üçün başqa ölkələrin büdcəsindən sizə pulla dolu çamadanlar gətirirlər”.
Nahid SALAYEV
