Xaqani Cəfərli: "Rusiyanın, bütün postsovet ölkələri kimi, Azərbaycan ərazisində də zərərsizləşdirilmiş təsir mərkəzləri və təsir agentləri var"
Rusiya ilə Azərbaycan arasında münasibətlər rəsmi səviyyədə “strateji tərəfdaşlıq” kimi təqdim olunsa da, Ukrayna müharibəsindən sonra geosiyasi vəziyyət kəskin dəyişib. Moskva Cənubi Qafqazda təsirini qorumaq üçün müxtəlif təzyiq alətlərindən istifadə edir. Azərbaycan Ukraynaya yardımlar göstərdiyi, Türkiyə və Qərblə əməkdaşlığı gücləndirdiyi üçün Rusiya tərəfindən risqlər nəzərə alınmalıdır.
Rusiya hələ də bizim Ukraynadakı obyektlərimizi vurur. Düşmənçilik səngimir.
Rusiya birbaşa Azərbaycanın öz ərazilərində təxribatlara başlaya bilərmi və bu özünü hansı formalarda göstərə bilər?
Baki-xeber.com saytına məsələni şərh edən politoloq Xaqani Cəfərli bildirdi ki, Rusiya postsovet respublikalarının suverinliyinə hörmət etmək istəmir: "Azərbaycanla Rusiya arasında yaşanan gərginliyin əsas səbəbi budur. Rusiya Ukraynaya qarşı 3 il yarımdan artıq davam edən müharibədə çox ağır itkilərə məruz qalıb və bu itkilər davam edir. Belə bir vaxtda Rusiyanın hansısa ölkəyə, xüsusilə də Azərbaycana qarşı hərbi təxribatı mümkün deyil. Buna cəhd edərsə, bu, Rusiyanın özü üçün daha ağır nəticələrə səbəb olar. Kremldə bunu çox gözəl anlayırlar və buna görə Azərbaycana qarşı hərbi müdaxilə ehtimalı ən aşağı səviyyədədir.
Ancaq bu o demək deyil ki, Rusiya təxribatlarından əl çəkəcək. Məsələn, Moskva Azərbaycanda milli münasibətlər müstəvisində təxribat yaratmaq niyyətindən imtina etməyib. Son günlər bu çox açıq müşahidə olunur. Ancaq Rusiyada çox yaxşı anlayırlar ki, Azərbaycanın ən zəif vaxtlarında, 1993-1995-ci illərdə bu heç bir nəticə vermədiyi üçün, bu gün də bir nəticəsi olmayacaq. Buna görə də Rusiyanın daha çox dövlət-vətəndaş qarşıdurması yaratmağa cəhd edə biləcəyi ehtimalı var. Rusiyanın, bütün postsovet ölkələri kimi, Azərbaycan ərazisndə də zərərsizləşdirilməmiş təsir mərkəzləri, təsir agentləri var. Bunların vasitəsilə dövlət-vətəndaş qarşıdurması yaratmağa cəhd edə bilər.
Digər tərəfdən, Ruisya Ukrayna ərazisində Azərbaycanın enerji infrastrukturuna qarşı həyata keçirdiyi müharibənin çoğrafiyasını genişləndirməyə cəhd edə bilər.
Ümumiyyətlə, caynaqları sökülmüş, amma qolları kəsilməmiş Rusiyanın hər cür təxribatlara əl ata biləcəyi ehtimalına dövlət də, cəmiyyət də həmişə hazır olmalıdır.
Nəticə olaraq qeyd edək ki, Rusiya hazırda Ukrayna müharibəsi ilə çox yükləndiyi üçün Azərbaycana qarşı açıq hərbi hücuma gedə bilməz. Amma dolayı yollarla - Ermənistan, informasiya müharibəsi, iqtisadi təzyiq və daxili təxribat vasitəsilə təsir göstərməsi mümkündür".
Akif NƏSİRLİ
