Azər Həsrət: "Bu dövlətlərin münasibətlərinin rəsmən strateji tərəfdaşlıq səviyyəsinə çatdırılması zamanın tələbinə çevrilir"
Prezident İlham Əliyev Laçın şəhərində 28 May - Müstəqillik Gününə həsr edilmiş konsertdən əvvəl çıxışı zamanı bildirib ki, bu gün bizim üçtərəfli əməkdaşlığımızın yeni səhifəsi açılır. Prezident burada Azərbaycan-Türkiyə-Pakistan əməkdaşlığını nəzərdə tuturdu.
Qeyd edək ki, bu üç dövlət arasında üçtərəfli strateji müttəfiqlik sazişi olmasa da, reallıqda belə bir strateji müttəfiqlik mövcuddur. Türkiyə ilə Azərbaycan arasında münasibətlər artıq rəsmən strateji səviyyəyə qaldırılıb. Pakistanla Hindistan arasındakı qısamüddətli müharibə zamanı Azərbaycan ictimaiyyətinin davranışları göstərdi ki, Pakistanla da strateji müttəfiqlik sazişinin imzalanması artıq sosial sifarişə çevrilib. Lakin bunun üçtərəfli qaydada - Azərbaycan-Türkiyə-Pakistan səviyyəsində reallaşdırılması artıq dünyada yeni presedent yarada bilər.
Azərbaycan-Türkiyə-Pakistan üçtərəfli müttəfiqlik sazişi imzalana bilər?
Baki-xeber.com saytının sualını cavablandıran siyasi şərhçi Azər Həsrət bildirdi ki, Azərbaycan-Türkiyə-Pakistan işbirliyi zatən mövcuddur, həmişə bu ölkələr həm ikili formatda, həm də üçlü formatda hərbi sahədə əməkdaşlıq edirlər, özü də bu əməkdaşlıq kifayət qədər uğurlu və faydalıdır: "Azərbaycan hərbiçiləri ilə Pakistan hərbçiləri, eyni zamanda Türkiyə və Azərbaycan hərbçiləri, digər tərəfdən üç ölkənin hərbçilərinin birlikdə təlimləri, seminarlar və digər işbirlikləri müşahidə edilməkdədir. Haqqında danışdıqlarımız işin görünən tərəfidi, yəqin ki, bu birliyin görünməyən tərəfləri də var.
Pakistanın baş naziri, Turkiyə və Azərbaycan prezidentilərinin Laçındakı çıxışlarında buna işarə edildi ki, bu üç ölkə arasında hərbi əməkdaşlıq daha da dərinləşdirilməlidir. Bu təsadüfi deyil, çünki Pakistan İslam aləminin nüvə silahına malik olan yeganə dövlətidir. Qardaş Türkiyə Avropanın birinci sırada dayanan ordusuna sahibdir, üstəgəl, NATO-nun ABŞ-dən sonra ikinci ordusuna malikdir.
Əlbəttə, Azərbaycan da 44 günlük savaşdakı müharibə təcrübəsi ilə dünyaya səs salıb. Dünyanın tanınmış hərbi ekspertləri hələ də bu müharibəni incələməkdə davam edir. Bu baxımdan düşünürəm ki, bu üçlüyün belə bir saziş imzalaması real görünür. Amma məsələ ondadır ki, təkcə hərbi sahədə deyil, bütün sahələrdə işbirliyi daha da dərinləşdiriləcək. Prezident İlham Əliyev elə üçlük zirvə toplantısındakı çıxısında xüsusi olaraq vurğuladı ki, Azərbaycan qardaş Türkiyəyə 20 milyard dollardan çox, Pakistana isə 2 milyard dollar sərmayə yatırıb. Əlbəttə, bu istiqamətdə irəliləyişlər nəzərdə tutulur. Yəni bu üç ölkə arasında hərtərəfli tərəfdaşlığa gedən yolun gəlişməsi sürətlə irəliləyir. Ona görə də bu dövlətlərin münasibətlərinin rəsmən strateji tərəfdaşlıq səviyyəsinə çatdırılması zamanın tələbinə çevrilir".
Dəniz NƏSİRLİ
