Tural İsmayılov: “Macarıstanın müstəqil siyasətinə qarşı tətbiq olunan təzyiqlər, əslində, Avropa İttifaqının demokratik prinsiplərindən uzaqlaşmasının göstəricisidir”
Mayın 27-də Avropa İttifaqının (Aİ) Ümumi Məsələlər Şurası Macarıstanın Aİ-də səsvermə hüququndan məhrum edilməsi məsələsini müzakirə edəcək və qərar verəcək.
Onlar ölkəyə Aİ müqaviləsinin 7-ci maddəsini tətbiq etmək istəyirlər.
Qeyd edilir ki, aprel ayında Estoniyanın xarici işlər naziri Marqus Tsahkna Budapeştin səsvermə hüququnun ləğv edilməsini təklif edib.
O iddia edib ki, ki, Macarıstanın baş naziri Viktor Orban Aİ-nin qərarlarını əngəlləməklə “parçalanmaya gətirib çıxarır və bütün blokun təhlükəsizliyini təhdid edir”.
Aydın məsələdir ki, bu, Macarıstanın apardığı müstəqil siyasətə görə Avropa İttifaqı Şurası tərəfindən cəzalandırılması prosesidir.
Qeyd edək ki, Prezident İlham Əliyev Budapeşt səfərində Macarıstanın baş naziri Viktor Orbanın müstəqil siyasət yürütdüyünü xüsusi vurğuladı, onu qəhrəman adlandırdı, müstəqil siyasət apardığını qeyd etdi.
Aİ-də isə Orbanı müstəqil siyasətinə görə vurmağa başlayırlar.
Bunu həqiqətən də Macarıstanın apardığı müstəqil siyasətə görə cəzalandırma saymaq olarmı?
Siyasi ekspert Tural İsmayılov baki-xeber.com-a “Macarıstanın Avropa İttifaqı daxilində müstəqil siyasət aparması onun milli maraqlarını qorumaq və regional geosiyasi reallıqları nəzərə almaq baxımından böyük cəsarət və prinsipiallıq nümunəsidir. Bu, Avropa İttifaqının vahid siyasətinə meydan oxuyan və öz suverenliyini ön planda tutan nadir hallardan biridir. Viktor Orban hökumətinin mövqeyi, xüsusilə enerji təhlükəsizliyi və xarici siyasət sahəsində, Avropa İttifaqının qərarlarına tənqidi yanaşması ilə seçilir”-deyə bildirdi.
T.İsmayılovun sözlərinə görə, Avropa İttifaqının Macarıstanın səsvermə hüququndan məhrum edilməsi kimi addımları isə qurumun daxilində ikili standartların və mərkəzləşdirilmiş idarəetmə tələblərinin nəticəsidir: “Bu cür yanaşmalar Avropa İttifaqının vahidliyini sarsıdır və üzv dövlətlərin müxtəlif siyasi və tarixi reallıqlarını nəzərə almamağa gətirib çıxarır. Macarıstanın müstəqil siyasətinə qarşı tətbiq olunan təzyiqlər, əslində, Avropa İttifaqının demokratik prinsiplərdən uzaqlaşmasının göstəricisidir.
Macarıstanın apardığı siyasət regional sabitlik və balanslı münasibətlər baxımından da əhəmiyyətlidir. O, öz milli maraqlarını qoruyaraq, Avropa daxilində çoxqütblü və mürəkkəb geosiyasi mühiti düzgün qiymətləndirir. Bu baxımdan, Macarıstanın mövqeyi tərifəlayiqdir və Avropa İttifaqının sərt və bəzən qeyri-adekvat siyasətinə sağlam alternativ təqdim edir.
Qısacası, Macarıstanın müstəqil siyasəti onun siyasi iradəsinin və milli maraqlarının ifadəsidir, Avropa İttifaqının isə bu siyasətə qarşı təzyiqləri qurumun idarəetmə problemlərini və ikili standartlarını göstərir. Bu, Avropa İttifaqının gələcəkdə daha ədalətli və real siyasi yanaşmalar formalaşdırması üçün ciddi çağırışdır”.
İradə SARIYEVA
