Xəyal Bəşirov: “Makron hökumətinin başqa Avropa ölkələrindən icarəyə həbsxana götürməsi o ölkədəki vəziyyəti açıq şəkildə ortaya qoyur”
Emmanuel Makron hakimiyyətinin vətəndaşlara qarşı irticaçı siyasət yürütdüyü, vaxtilə “demokratiya beşiyi” kimi tanınan ölkələrdən biri olan Fransanın imicini yerdən-yerə vurduğu məlumdur. Bu ölkədə dustaqların sayı da həddən artıq çoxdur.
“Euronews” televiziyasının araşdırmasından məlum olur ki, dustaqların sayına görə Fransa Ruminya və Kiprdən sonra Avropada üçüncü yerdədir.
Qeyd edək ki, Fransa ilə bağlı “Euronews” televiziyası diqqət çəkən bir məlumat yayımlayıb. Məlumatda qeyd edilir ki, Fransada məhbusların sayı həddindən artıq çoxdur və həbsxanalar ağzına qədər dustaqla doludur. İş o yerə çatıb ki, hətta Makron özü deyib ki, Avropanın başqa ölkələrində həbsxanalar icarəyə götürüblər və fransız dustaqları başqa ölkələrdə icarəyə götürdükləri türmələrdə saxlayırlar. Görün, nə qədər dəhşətli vəziyyət yaranıb ki, Makron hökuməti başqa Avropa ölkələrindən türmələr icarəyə götürüb və dustaqları orada yerləşdirib.
“Bu, insan hüquq və azadlıqlarından, demokratik dəyərlərdən danışan dövlət üçün mənfi bir haldır”
Siyasi və Hüquqi Araşdırmalar Mərkəzinin rəhbəri Xəyal Bəşirov “Bakı-Xəbər”ə bildirdi ki, E.Makron hakimiyyətə gəldikdən sonra insanların intensiv etirazlarının şahidi olmuşuq və bu etirazlar qısa müddətli də olsa insanların istintaq təcridxanalarına, həbsxanalara yerləşdirilməsi ilə nəticələnib. X.Bəşirov qeyd etdi ki, əgər cəzaçəkmə müəssisələrinin sayı artırılırsa, bu, uzunmüddətli azadlıqdan məhrumetmə cəzasına məhkum edilmiş şəxslərə göstərilən münasibətdir. “Düşünürəm ki, insanların Makron hakimiyyətinə etirazlarının qarşısı həmişə amansızlıqla alınır. Bu baxımdan, Fransada hökumətin siyasətinə etiraz edən aksiya iştirakçılarının həbsləri reallaşdırıla bilər. Bu da, təbii ki, Fransa hakimiyyətini hər an “istənilən vəziyyətə hazır olmağa” vadar edir.
Eyni zamanda bilirik ki, Fransa kaloniyalarında müstəmləkəçilik siyasətini hələ də davam etdirir, müxtılf ərazilərdə öz azadlıqlarını tələb edən, ona etiraz edən insanların etirazlarını da müxtəlif yollarla boğmağa çalşır. Biz zaman-zaman bunun şahidi olmuşuq. Ola bilər Korsikada, Yeni Kaledoniyada və digər ərazilərdə, yaxud Fransanın özündə insanların etirazlara qalxacağı gözlənilir və onlar aksiyalara çıxacağı təqdirdə onların “yerləşdirilməsi” baxımından başqa ölkələrdən icarəyə türmə götürürlər, yaxud götürmək istəyirlər. Burda miqranlarla bağlı preventiv tədbirlərin görülməsi də ehtimal edilir ki, onlara görə bunu edirlər. Bütün hallarda Makronun bu siyasətinə müsbət yanaşmaq olmaz, bütövlükdə bu yaxşı hal deyil. Fransada həbsxanalarda sıxlığın olması səbəbindən Makron hökumətinin başqa Avropa ölkələrindən icarəyə həbsxana götürməsi o ölkədəki vəziyyəti açıq şəkildə ortaya qoyur.
Halbuki, müasir dünyada hüquq institutlarının, hüquq alimlərinin araşdırmaları göstərib ki, cəzaların sərtləşdirilməsi və yaxud da cəzaçəkmə yerlərinin sayının artırılması heç də kriminogen duruma müsbət təsir göstərmir. Yəni cinayətkarlığı azaltmır. Cəzalar nə qədər sərtləşdirilsə də, azadlıqdan məhrumetmə cəzasına məhkum olan şəxslərin sayı nə qədər artsa da, onların sayına uyğun həbsxanaların sayı artırılısa da bu cinayətkarlığın səviyyəsini aşağı salmır. Əksinə bu mənfi təsir göstərir. Bütün dünyada belədir. Cəzaçəkmə müəssisələrinin, həbsxanaların, yaxud müvəqqəti təcridxanaların sayının artırılması mənfi haldır. Bu gün Fransa dövləti o siyasəti davam etdirmək istəyir. Bu cinayətkarlığın səviyyəsini aşağı salmırsa, demək burda başqa məqsədlər var. Bu məqsədlər də bayaq adını çəkdiyim məsələlərlə bağlıdır. Ya Fransada hansısa radikal addımlar gözlənilir, bu addımlara etirazlar olacaq və bunun nəticəsində kimlərsə cinayət məsuliyyətinə, kimlərsə inzibati məsuliyyətə cəlb ediləcək. Hər bir halda uzun müddət azadlıqdan məhrumetmə, yaxud qısa müddətli azadlıqdan məhrumetmə tədbirlərinin tətbiq edilməsi üçün bu müəssisələrin sayı artırılacaq. Yaxud ayrı-ayrı dövlətlərdə icarəyə həbsxanalar götürüb həbs edilən şəxsləri ora göndərə bilərlər. Hər bir halda bu, insan hüquq və azadlıqlarından, demokratik dəyərlərdən danışan dövlət üçün mənfi bir haldır. Bu inzibati resursların, güc tətbiqetmənin, dəyənəyin sayının artırılmasına xidmət edən bir addım kimi nəzərə alınmalıdır. Belə siyasətdən yana olan dövlət hər bir halda anlamalıdır ki, bu siyasətin sonu yoxdur. İnsanları həbs etməklə, səslərini boğmaqla, xalqı inzibati resurslarla susmağa məcbur etməklə məqsədə nail olmaq olmaz. Bu birmənalıdır. Ona görə də düşünürəm ki, Fransa fərqli siyasət düşünməlidir. Bu yolla vəziyyətdən çıxmaq, yaxud hansısa planları həyata keçirmək mümkün olmayacaq”-deyə X.Bəşirov qeyd etdi.
İradə SARIYEVA
