Paşinyan Lavrovla KTMT-yə qayıdışı müzakirə etməkdən imtina etdi...
Ramil Hüseynov: “KTMT məsələsini gündəliyə daxil etməyəcəyi hardasa gözlənilən idi”
Məlum olduğu kimi, Rusiyanın xarici işlər naziri Sergey Lavrov mayın 20-21-də İrəvana işgüzar səfərdə olub. İrəvanda Ermənistan və Rusiya xarici işlər nazirlərinin görüşü keçirilib. Görüşdə və keçirilən mətbuat konfransında xarici işlər naziri Ararat Mirzoyan bildirib ki, Ermənistan bütün istiqamətlərdə Rusiya ilə uzunmüddətli və qarşılıqlı faydalı əməkdaşlığa köklənib.
Baş nazir Nikol Paşinyan da Lavrovun başçılıq etdiyi nümayəndə heyətini qəbul edib. Tərəflər iki ölkə arasında münasibətlərin hazırkı vəziyyətini müzakirə edib. O cümlədən, Ermənistan-Rusiya ikitərəfli gündəliyi, Aİİ çərçivəsində əməkdaşlıq, həmçinin regional və beynəlxalq təhlükəsizlik məsələləri müzakirə edilib.
Ümumi olaraq görünür ki, Lavrovla İrəvanda bir sıra ikitərəfli münasibətlərə aid məsələlər, habelə Avrasiya İqtisadi İttifaqında fəaliyyət məsələsi müzakirə olunub. Lakin Ermənistanın KTMT-də fəaliyyətə qayıtması müzakirə olunmayıb. Sadəcə Lavrov 2022-ci ilin sentyabrında Ermənistan sərhədlərinə KTMT-nin müşahidəçilərinin göndərilməsi barədə bəyanatın İrəvan tərəfindən rədd edilməsini xatırladıb.
Maraqlıdır, tərəflər arasında KTMT mövzusu niyə müzakirə olunmadı?
“Ona görə ki, Ermənistan məqsədyönlü şəkildə bu təşkilatda fəaliyyətini dondurub”
Sözügedən məsələni “Bakı-Xəbər”ə şərh edən “Yeni Xətt” Siyasi Tədqiqatlar Mərkəzinin rəhbəri Ramil Hüseynovun fikrincə, bilavasitə Ermənistan maraqlı olmadığı üçün KTMT məsələsi müzakirə predmeti olmayıb: “Ermənistan rəhbərliyinin KTMT məsələsini gündəliyə daxil etməyəcəyi hardasa gözlənilən idi. Ona görə ki, Ermənistan məqsədyönlü şəkildə KTMT-də fəaliyyətini dondurub. Erməni hakimiyyəti hesab edir ki, Rusiya gərək 2023-cü ilin sentyabrında Azərbaycan Ordusunun Qarabağda antiterror əməliyyatına imkan verməyəydi. KTMT gərək buna müdaxilə edəydi. Halbuki, bunun heç bir hüquqi və siyasi əsası yoxdur. Qarabağ Azərbaycana məxsus ərazi olduğu üçün nə Rusiyanın, nə də KTMT-nin belə bir səlahiyyəti yox idi. Ermənistanın KTMT ilə bağlı ikinci bəhanəsi isə Azərbaycan Ordusunun şərti sərhəddə mövqelərini möhkəmləndirməsi ilə əlaqədardır. Paşinyan hakimiyyəti iddia edir ki, guya Azərbaycan Ermənistan ərazisinə daxil olub, orada mövqe tutub, amma KTMT bunun qarşısını almayıb. Hesab edirəm ki, bu da absurd yanaşmadır. Ən azından ona görə ki, Azərbaycan-Ermənistan sərhədi delimitasiya olunmayıb. Digər tərəfdən, Ermənistan sərhədə KTMT müşahidəçilərini yox, Avropa İttifaqı müşahidəçilərini gətirdi. Çünki Qərblə yaxınlaşma yolunu tutub. Ermənistan Avrasiya İqtisadi İttifaqından yararlandığı üçün bu qurumu oyundankənar vəziyyətə salmır. KTMT ilə bağlı atdığı addımları Aİİ-yə yönəlik atmır”.
Vidadi ORDAHALLI
