Azər Həsrət: “Azərbaycan qlobal problemlərin həllinə töhfə verən bir dövlətə çevrilib”
Məlum olduğu kimi, Macarıstanın paytaxtı Budapeştdə Türk Dövlətləri Təşkilatının (TDT) Dövlət başçılarının qeyri-rəsmi Zirvə görüşü baş tutub. Görüşdə iştirak edən Prezident İlham Əliyev buradakı çıxışında bir sıra məsələlərə toxunub.
O cümlədən qeyd edib ki, Azərbaycan COP29-da qlobal Cənubla qlobal Şimal arasında körpü qurmağa müvəffəq oldu. Bakıda qlobal iqlim gündəliyi ilə bağlı ciddi qərarlar qəbul edildi.
Maraqlıdır, bu körpünün rəvan işləməsi üçün nə etmək lazımdır? Ümumiyyətlə, qlobal inkişaf üçün bu körpü nə verəcək?
“Azərbaycan dövləti sadəcə öz problemlərini deyil, qlobal əhəmiyyətli məsələlərin həllini də öz üzərinə götürür”
Siyasi şərhçi Azər Həsrət “Bakı-Xəbər”ə şərhində bildirdi ki, Azərbaycan qlobal problemlərin həllinə töhfə verən bir dövlətə çevrilib. Dünyanın taleyini həll edən məsələlərdə Azərbaycan söz sahibidir: “Elə məsələlər var ki, böyük dövlətlər onu görməzdən gəlir, kiçik dövlətlər həmin problemlərlə bağlı səslərini dünayaya çatdıra bilmirlər. Belə bir şəraitdə üçüncü bir tərəfin məsələyə müdaxiləsinə ehtiyac yaranır. Azərbaycan həmin boşluğu uğurlu şəkildə doldurmaqdadır. İstər qlobal Cənub, qlobal Şimal, istərsə də dünyanın hər tərəfindəki problemlərin dilə gətirilməsi, həll olunması üçün yolların göstərilməsində önəmli rol oynayır. “Azərbaycan bundan sonra nə edər” sualı verilərsə, əlbəttə, ölkəmiz həm öz təcrübəsini, həm də dünyada olan təcrübələri bir araya toplayıb, bu işlərə lazımi töhfə verəcək. Əsas məsələ odur ki, Azərbaycan dövlətinin iradı, istəyi var. Dövlətimiz bu kimi məsələlərdə yaxasını geri çəkmir. “Bizim problemlərimiz həll olunub, başqalarının işinə qarışmırıq” deyə bir fikrimiz yoxdur. Azərbaycan dövləti sadəcə öz problemlərini deyil, qlobal əhəmiyyətli məsələlərin həllini də öz üzərinə götürür. Bu vaxta qədər yetərincə böyük işlərə imza ata bilmişik. Ona görə də ölkəmiz beynəlxalq platformalarda daim irəli olacaq. Eyni zamanda, qlobal məsələlərin həllinə töhfə vermək üçün özünü platforma olaraq da təqdim etməyə davam edəcək. Azərbaycanın edəcəyi işlər çoxdur”.
Günel CƏLİLOVA
