Lavrov Ermənistana istədiyi ölkədən silah almağa icazə verdi - Fransa barədə narazılığını da bildirdi...
Akif Nağı: “Lavrov Ermənistana eyham vurdu ki, bizimlə müttəfiqsinizsə bu silahları düşmənlərimizdən almayın”
Rusiyanın xarici işlər naziri Sergey Lavrov erməni həmkarı Ararat Mirzoyanla keçirdiyi mətbuat konfransında deyib ki, Ermənistana verilməyən Rusiya silahları məsələsi həll olunub və İrəvanın istənilən ölkədən silah almaq hüququ var. S.Lavrov qeyd edib ki, Rusiya əvvəllər bağlanmış müqavilələr əsasında Ermənistana silah ötürməkdə davam edir.
"Çatdırılmalara görə ödəniş və uğursuz çatdırılma ilə bağlı qeyd etdiyiniz epizodları bu gün müzakirə edib həll etdik. Bu ödənişlər başqa məqsədlər üçün hesablanıb və burada heç bir ziddiyyət yoxdur", - Lavrov bildirib.
Onun sözlərinə görə, indiki vəziyyətdə Rusiya bütün Avropaya qarşı vuruşmağa məcburdur.
"Avropa növbəti dəfə nasist şüarları altında Zelenski rejimini irəli sürərək Rusiyaya qarşı döyüşür. Demək olar ki, bütün Avropa ölkələri. Və başa düşdüyünüz kimi, bu vəziyyətdə Ukraynaya gələn silahlar çoxdur, onlar müasirdir, bizim cavabımızı tələb edir", - Rusiya XİN rəhbəri qeyd edib.
O, Ermənistan tərəfdən anlayış istəyib və bildirib ki, bu şərtlər altında Moskva bütün öhdəliklərini vaxtında yerinə yetirə bilməz.
O, həmçinin qeyd edib ki, Ermənistanın başqa ölkələrdən silah alması məsələsində heç bir problem görmür. "Bu bizim erməni dostlarımızın seçimidir. Əgər onlar əlavə tədarük üçün Fransa bazasına sahib olmaq istəyirlərsə, biz heç nə tətbiq etməyəcəyik", - rusiyalı nazir vurğulayıb. Eyni zamanda o, Ermənistanın müttəfiq kimi Fransa silahlarına arxalandığını nəzərə almasına diqqət çəkib. Beləliklə, Rusiyanın müttəfiqləri haradan silah alacaqlarına özləri qərar verməlidirlər.
Bundan əvvəl Ermənistanın maliyyə naziri Vahe Hovhannisyan bəyan etmişdi ki, Ermənistan tam çatdırılmamış silahların alınması üçün əvvəllər köçürülmüş vəsaitlərdən istifadə etməklə Rusiyaya dövlət borcunu qismən ödəmək imkanını nəzərdən keçirir.
Məlumata görə, daha əvvəl Ermənistan hakimiyyəti bəyan etmişdi ki, Rusiya silah tədarükü ilə bağlı müqavilələrin maliyyə vəsaiti köçürüldüyü bir hissəsini yerinə yetirməyib. Müxtəlif hesablamalara görə, yerinə yetirilməmiş tədarüklərin məbləği 250 milyon dollardan 400 milyon dollara qədərdir. Ermənistanın baş naziri Nikol Paşinyan da bu vəsaitlər çərçivəsində borcun bir hissəsinin mümkün silinməsi ilə bağlı danışıqların aparıldığını təsdiqləyib.
Lavrov açıq dedi ki, biz Ukraynada müharibə edirik və Ermənistanla bütün öhdəliklərimizi icra edə bilmirik. Ancaq bur eyham da vurdu ki, ermənilər silahı əsasən Fransadan alırlar, Ermənistanın müttəfiqi Fransa da Rusiyanın düşmənidir .
Rusiya Ermənistana həm silah almağa icazə verir, həm də onun Fransadan silah almağına mənfi yanaşır. Halbuki, Lavrov Ermənistanın başqa ölkələrdən silah almasına narazılığını da bildirə bilərdi və deyə bilərdi ki, bizim müttəfiqimizdirsə vəziyyətimizi nəzərə almalıdır, bu gün Ermənistana silah almaq, müharibəyə hazırlaşmaq lazım deyil. Məsələ budur ki, Azərbaycandan da hücum gözlənilmir. Lavrov bilmir ki, Azərbaycan Ermənistana hücum etməyəcək? Bunu da deyə bilərdi ki, Ermənistana Azərbaycanın hücumu gözlənilmir və Ermənistanın da hansısa bir müharibəyə hazırlaşmasında bir məntiq yoxdur. Amma pis odur ki, Lavrov bunu da demədi.
“Rusiya Ermənistana silah almaqda sərbəstlik versə də, “istədiyiniz ölkədən silah ala bilərsiniz” desə də, eyni zamanda Ermənistan qarşısına şərt də qoydu ki...”
Azad Vətən Partiyasının sədri Akif Nağı “Bakı-Xəbər”ə bildirdi ki, əslində Lavrov bu sadalanan amilləri vurğulayaraq Ermənistanı silah almaqdan çəkindirməli idi, amma deməyib.
A.Nağı vurğuladı ki, Lavrovun Ermənistana səfəri regionda yeni bir situasiyanın yaranmasından xəbər verir. “Belə görünür ki, Ermənistan əli hər yerdən üzüldüyünə, Qərbdən istədiyi dəstəyi ala bilmədiyinə görə yenidən Rusiyaya yaxınlaşmağa çalışır, Rusiyanın çətiri altına keçir. Bu da Rusiyanın maraqlarına cavab verir. Lavrovun səfəri zamanı çox məsələlər üzrə, o cümlədən də Rusiyanın təhdid mövqeyi ortaya qoyuldu. Ermənistanın təhlükəsizliyinə Rusiyanın qarant olduğu fikri yenidən səsləndirildi. Əvvəllər də bu fikir səslənirdi və Ermənistan da bu mövqeyi qəbul edirdi. O dövrdə Rusiyanın hərbi bazasının Ermənistandan çıxarılması, münasibətlərin yenidən qurulması ilə bağlı söhbətlər gedirdi. Amma bu məsələlərin üzərinə nöqtə qoyuldu, eyni zamanda Qafqazda Rusiyanın baş konsulluğunun açılması ilə bağlı da məsələlərin getdiyi və yaxın vaxtlarda nəticəsinin olacağı fikri səsləndirildi. Azərbaycan da orda gedən prosesləri diqqətlə izləyir.
Silah məsələsi ilə bağlı zaman-zaman bu ortaya çıxır və Ermənistan çalışır ki, Rusiya ilə münasibətlərdə silah müqaviləsi amilindən müəyyən təzyiq vasitəsi kimi istifadə etsin. Rusiyaya müəyyən dövlət borcları var, çalışırlar ki, o borcların silinməsi məsələsini gündəmə gətirsinlər. O da elə böyük rəqəm deyil, hardasa 400 milyon dollara yaxındır. Yəni Ermənistanın böyük borclarının aradan qalxması üçün o qədər də təsirli deyil.
Rusiya burda Ukrayna cəbhəsində ağır vəziyyətdə olduğunu bildirdi və bütün güclərini, resurslarını ora yönəldirlər. Lavrov bütün Avropaya qarşı vuruşduqlarını dedi. Özlərinin hərəkətlərinə bəraət qazandırmağa çalışırlar.
Rusiya Ermənistana silah almaqda sərbəstlik versə də, “istədiyiniz ölkədən silah ala bilərsiniz” desə də, amma eyni zamanda Ermənistan qarşısına şərt də qoydu ki, Fransadan silah almayın...
Ordan Rusiyaya qarşı belə bir fikir də səsləndirildi ki, siz Azərbaycana silah satırsınız, guya Azərbaycan Rusiya silahı ilə onların üstünə “hücuma” keçib. Əslində, İkinci Qarabağ müharibəsi Rusiya silahının uğursuzluğunu göstərdi.
Lavrov Ermənistanı silah məsələsində sərbəst buraxdı ki, bizim sizə o silahları vermək imkanımız yoxdur, gedin hansı ölkədən istəyirsinizsə ordan silah alın. Lakin həm də Ermənistana eyham vurdu ki, bizimlə müttəfiqsinizsə bu silahları bizim düşmənlərimizdən almayın. Rusiyanın xarici işlər naziri Fransının adını düşmən cəbhəsinə başçılıq edən ölkə olaraq çəkdi və Ermənistanı o ölkədən silah almamağa çağırdı. Əslində bu, Ermənistana qarşı açıq bir təhdid kimi başa düşülməlidir”.
Lavrovun Avropanın Rusiyaya qarşı olduğunu açıq vurğuladığını, onların Ukraynaya silah göndərdiklərini, digər istiqamətlərdə də dəstək verdiklərini qeyd etdiyini deyən A.Nağının sözlərinə görə, o, Ermənistanı Fransa ilə münsibətdə ehtiyatlı olmağa çalışıb: “Burda məsələ Ermənistanı Fransadan silah almaqdan çəkindirməkdir. Əgər Fransadan silah alınmırsa bu da onun regiondakı mövqeyinə mənfi təsir göstərir, Avropanın mövqeyini zəiflədir. Bu, eyni zamanda Rusiyanın ona qarşı olan Qərb koalisiyasına qarşı bir addımı, bir taktiki cəhdidir ki, Fransaya bu şəkildə zərbə vurmaqla bütövlükdə o koalisiyanın mövqeyni zəiflədir. Rusiyanın o istiqamətdə addımlar atması göstərir ki, Avropanın təhlükəsizliyi hələ də tam şəkildə sığortalanmayıb. Bu cür eyhamlarla, işarələrlə münasibətləri qurmağa çalışırlar. Amma görsənən odur ki, Ermənistan Rusiyanın silahını alsa da, almasa da yenidən o, Rusiyanın təsir dairəsinə qayıdacaq” - deyə A.Nağı bildirdi.
İradə SARIYEVA
