Xirtdəyə qədər rüşvət və korrupsiyaya bulaşmış Avropa eyni məsələ ilə Azərbaycanı şantaj edir
Belçika prokurorluğu Avropa Parlamentində korrupsiyada şübhəli bilinən bir neçə nəfəri dindirmək üçün saxlayıb. Bu barədə “Reuters” Belçika prokurorluğuna istinadən məlumat yayıb.
Qurumun məlumatına görə, federal polis Brüssel regionunda, həmçinin Flandriya, Valloniya və Portuqaliyada 21 axtarış əməliyyatı keçirib. İstintaq hesab edir ki, korrupsiya sxemləri, sənədlərin saxtalaşdırılması və saxta sənədlərdən istifadə 2021-ci ildən etibarən müntəzəm əsasda və "tamamilə gizli şəkildə" həyata keçirilib.
İttihamlar Belçika prokurorlarının martın 13-də Avropa Parlamentində rüşvətxorluqda şübhəli bilinərək Çinin Huawei şirkətinin xeyrinə olan bir neçə nəfəri saxladıqlarını söylədikdən sonra irəli sürülüb.
Hazırda Belçika polisi 5 deputatın həbsibə icazə istəyir.
Avropa Parlamentində bu cür korrupsiya qalmaqalları mütəmadi baş verir.
Məsələn, 2022-ci ildə həbs edilən Eva Kaili 2014-cü ildən Avropa Parlamentinin (AP) üzvü olan yunan siyasətçisidir. O, Avropa Parlamentində Qətər korrupsiya qalmaqalının bir hissəsi kimi korrupsiyada ittiham olunub. 2022-ci ilin yanvarından 2022-ci ilin dekabrında həbs olunana qədər Avropa Parlamentinin on dörd vitse-prezidentindən biri kimi vəzifədə çalışıb. Onun atası da eyni ittihamla həbs edilib.
Eva Kaili ilə birlikdə Belçika məhkəməsi AP-nin keçmiş deputatı Pyer Antonio Pantzeri (İtaliya), Luka Vizantini (İtaliya) və digər məmurlar barəsində də həbs qətimkan tədbiri seçib.
2022-ci ilin dekabr ayında Belçika polisi Avropa Parlamentində korrupsiya işi üzrə aparılan axtarışlar zamanı 1,5 milyon avro vəsaiti müsadirə edib.
Təkcə Brüsseldə Avropa Parlamentinin keçmiş deputatı Pyer Antonio Panzerinin evində aparılan axtarış zamanı polis təxminən 600 min avro ələ keçirib.
Bundan əlavə, ötən il Avropa Parlamenti yenidən rüşvət qalmaqalı ilə üz-üzə qaldı. Belçika polisi "Russiagate" işi ilə əlaqədar olaraq Avropa Parlamentində axtarış aparıb. Bu qalmaqalda Avropa Parlamentinin bəzi deputatlarının Rusiya təbliğatını "Avropanın səsi" saytı vasitəsilə yayımlamaları üçün rüşvət aldıqları iddia olunurdu.
Bununla yanası, Belçika polisi 2023-cü ilin aprelində Avropa Parlamentinə 2019-cu il seçkilərində korrupsiya faktları ilə bağlı araşdırma çərçivəsində xüsusi əməliyyat keçirib.
Polis AB-nin ən böyük millətüstü partiyası sayılan Avropa Xalq Partiyasının Brüsseldəki qərargahına basqın edib.
Reyd partiyanın Rü dü Kommers küçəsindəki qərargahının birinci və üçüncü mərtəbələrində keçirilir. Polis kompüterlərə əl qoyub. Təhqiqat Avropa Komissiyasının sədri Ursula fon der Layenə də təsir edib. Çünki Avropa Xalq Partiyasının rəqəmsal kampaniyasının aparılmasına cavabdeh olan şəxs alman deputat Mario Voytdur. O, Angela Merkel və Ursula fon der Layenin üzv olduğu Xristian-Demokrat İttifaqının Türingiya əyalətindəki təşkilatının lideridir.
Bütün bu faktlar onu göstərir ki, Azərbaycanı rüşvətxorluqda və korrupsiyada günahlandıran Avropada rüşvətxorluq və korrupsiya daha çox vüsət alıb.
Bu danılmaz faktdır ki, rüşvət və korrupsiya dünyanın ən inkişaf etmiş ölkələrində belə mövcuddur. Hətta təcrübə göstərir ki, inkişaf etmiş ölkələrdə rüşvət və korrupsiya mexanizmi daha mürəkkəb və daha "ağıllı" sxemlər üzərindən həyata keçirilir. Ona görə də inkişaf etmiş ölkələrdə verilən rüşvətin və korrupsiyaya uğradılan vəsaitin məbləği ən azı milyon dollarlarla ölçülür. Sadəcə olaraq, Avropa təsisatları Azərbaycan hökumətini qaralamaq, onu tənqid etmək üçün rüşvət və korrupsiya hallarından sui-istifadə edir.
Məsələn, Azərbaycanda 2020-ci ilə qədər idarəetmədə daha çox əyintilər var idi, hökumət ilbəil bu əyintiləri aradan qaldırmaq üçün bacardığı islahatları aparırdı. Həmin islahatlar indi də davam edir. Amma nədənsə, Avropanın tənqidləri 2020-ci ildən sonra, yəni Azərbaycan torpaqlarını işğaldan azad edən kimi kəskinləşdi. 2023-cu ilin sentiyabr ayındakı antiterror əməliyyatından sonra - 2024-cu ilin yanvar ayında isə ən kəskin qərar qəbul edilərək, AŞPA-da Azərbaycan nümayəndə heyəti səsvermə hüququndan məhrum edildi. Yəni Avropanın təzyiqlari ilə Azərbaycanın ərazi bütövlüyü və suverenliyinin təmin edilməsi tərs-mütənasiblik təşkil edir.
Azərbaycan ərazi bütövlüyünü və suverenliyini təmin etdikcə Avropa ona qarşı təzyiqləri şiddətləndirdi. Bu da onun göstəricisidir ki, Avropanın Azərbaycanda nə demokratiya, nə də rüşvət və korrupsiya problemləri qayğısı var. Avropanın əsas məqsədi Azərbaycanın imkanlarından daha sərfəli şərtlərlə bəhrələnməkdir. Azərbaycan hökuməti Avropaya ədalətli mənfəət bölgüsü təklif edir. Onlar isə bununla razılaşmaq istəmir və yuxarıda qeyd etdiyimiz məsələlərlə rəsmi Bakını şantaj etmək yolunu tutub. Lakin bu heç bir fayda verməyəcək, enində-sonunda Avropa Azərbaycanla ədalətli şəkildə hesablaşmalı olacaq.
Dəniz NƏSİRLİ
