Elşad Həsənov: "Görünür, Moskva daha əlavə nələrsə qoparmaq istəyir"
Məlum olduğu kimi, Gürcüstan neçə vaxtdır Qərbin təsir dairəsindən çıxmağa çalışır. Tərəflər arasında son aylar münasibətlər xeyli soyuqlaşıb. Xüsusən də ötən il Gürcüstanda keçirilən seçkilərdən sonra bütün körpülər yandırıldı. Bir sözlə, Gürcüstan Qərblə tam üzülüşmək istəyir.
Faktiki olaraq Qərbə açıq müharibə elan edib. Nəticədə Gürcüstan Avropa İttifaqına üzvlük prosesini dayandırdı. AŞPA-da fəaliyyətini dayandırdı. NATO ilə əməkdaşlıq dayandırıldı. Aİ-nin müəyyən maliyyə layihələrindən çıxarıldı, qrantlar dayandırıldı və s. Qərbə bağlı olan siyasilər sıxışdırılır, həbs edilir.
Bütün bunların fonunda Rusiya Gürcüstanın işğal etdiyi əraziləri niyə geri qaytarmır, bunun zamanı deyilmi? Bundan artıq Rusiyanın maraqlarına uyğun daha hansı xidmət göstərməlidir ki? Rusiya bütün bunları nə vaxt qiymətləndirəcək? Rusiya nə zaman Gürcüstana bir jest edəcək ki, bu ölkənin ərazi bütövlüyü təmin edilsin? Nəzərə almaq lazımdır ki, Gürcüstanın Qərblə bağlı atdığı kəskin addımlar təkcə bu ölkəyə lazım deyil, bunu həm də Rusiyanın xatirinə edir. Yəni Rusiyanın cənubunda Qərbin bazaları olmasın. O zaman Rusiya bütün bunların əvəzini Gürcüstana nə vaxt verəcək?
"Bütün bunlar onu göstərir ki, Rusiya yaxın dövrlərdə Gürcüstana hansısa güzəştlərə getməyə hazırlaşmır"
Sözügedən məsələ ilə bağlı fikirlərini "Bakı-Xəbər"lə bölüşən siyasi ekspert Elşad Həsənov buna bir neçə aspektdən yanaşdı: "Həqiqətən də ötən ilin mayında Gürcüstanın Aİ və ABŞ-la münasibətlərində soyuqlaşma baş verdi. Buna da səbəb "Xarici agentlər" haqqında qanunun qəbul edilməsi idi. Həmin qanun qəbul ediləndən sonra həm ABŞ, həm Aİ Gürcüstana təzyiq göstərməyə çalışdı. Ancaq Gürcüstan parlamenti sona qədər gedərək qanunu təsdiqlədi. Bundan sonra vəziyyət daha da gərginləşdi. Qərb müxalifətin etiraz aksiyalarına dəstək verməyə başladı. Məqsəd o idi ki, növbəti rəngli inqilab hesabına hakimiyyəti devirsinlər. Bütün cəhdlərə baxmayaraq, Gürcüstan əhalisi ötən ilin oktyabrında keçirilən parlament seçkilərində "Gürcü arzusu"na səs verdi. Gürcü hakimiyyəti açıq bəyan etdi ki, ölkə üzərindən Rusiyaya qarşı ikinci cəbhə açılmayacaq. Çünki Gürcüstan kiçik dövlətdir və ərazisi müharibə arenasına çevrilsə, bu, ölkə üçün fəlakət olacaq. Bu ideyanı da əhalinin böyük əksəriyyəti dəstəklədi. Ona görə də onlar seçkidə "Gürcü arzusu"na səs verdilər. Bütün bunların fonunda, Rusiyanın işğal etdiyi əraziləri Gürcüstana qaytarmaması təəssüf doğurur. Halbuki, rəsmi Tbilisidə bununla bağlı gözləntilər var. Üstəlik, Cənubi Qafqaz ölkəsi olan Ermənistanda Rusiyanın mövqeləri hər keçən gün zəifləməyə doğru gedir. Bütün bunlar onu göstərir ki, Rusiya yaxın dövrlərdə Gürcüstana hansısa güzəştlərə getməyə hazırlaşmır. Görünür, Moskva daha əlavə nələrsə qoparmaq istəyir. Çünki Rusiya qonşu dövlətlərə münasibətdə imperiya xislətindən çıxış edir. Ancaq hesab edirəm ki, Gürcüstan sona qədər suverenliyini təmin etməyə çalışacaq. Ən başlıcası isə, Azərbaycan təcrübəsindən yararlanacaqlar".
Vidadi ORDAHALLI
