Qasım Hacıyev: "Qədim dövlətlər arasında heç zaman "Ermənistan" adlı dövlət olmayıb"
Hay Qriqoryan kilsəsi və hay tarixçiləri hayların (ermənilərin) başını nağıllarla, uydurmalarla elə qatıb ki, onlar hələ də reallığın, tarixi gerçəkliyin həndəvərinə belə yaxınlaşa bilmirlər.
Vaxtilə xaricdəki ağalarından tapşırıq alan hay tarixçiləri saxta tarix yazıblar, "qədim erməni dövlətləri" "kəşf" ediblər. Təbii, onlara bu saxta tarixi düzüb-qoşmaqda bəzi rus Sovet tarixçiləri də əməlli-başlı kömək edib.
Hayların dövlətçilik tarixinin başlanğıc nöqtəsi XX əsrin əvvəllərinə təsadüf etsə də, onlar bununla razılaşmaq istəmirlər və iddia edirlər ki, guya Ermənistan dünyanın "hələ də mövcud olan 6 ən qədim dövlətindən biridir".
Çox qəribədir ki, tarixi gerçəkliyi, həqiqəti görmək istəməyən hayların iddiasına görə, guya erməni dövlətçiliyinin tarixi təxminən 2500 il əvvələ gedib çıxır (?). Erməni mediası "Rus Seven" portalına "istinadən" yazır ki, "ilk dövlətlər təxminən 6000 il əvvəl meydana çıxıb, lakin onların hamısı bugünə qədər yaşaya bilməyib. Bəziləri əbədi olaraq yoxa çıxıb, digərlərindən yalnız adı qalıb. Lakin qədim dünya ilə əlaqələrini qoruyanlar da var".
Erməni mediası iddia edir ki, guya Ermənistan Misir, İran, Çin, Yunanıstan və Yaponiya ilə birlikdə hələ də mövcud olan 6 qədim dövlətdən biridir. Erməni dövlətçiliyinin tarixi guya təqribən "2500 il əvvələ" gedib çıxır.
Haylar bu cəfəng iddiaları səsləndirərkən tarixçi akademik Boris Piotrovskinin
"Arme-Şubriya krallığında" əsərinə istinad edirlər. Tarixçi Boris Piotrovski ermənilərin saxta tarixinin yaradılmasında xüsusi canfəşanlıq göstərən rus alimidir. O, öz əsərlərində tarixi gerçəkliyi təhrif edərək ermənilərin tarixini qədimləşdirirdi. O yazırdı ki, guya e.ə. "skif-erməni birliyi" "mövcud olub". Guya qədim dövrlərdə mövcud olan Tabal, Melid, Muş çarlığı, Hurri, Luvi və Urartu dövlətlərinin sakinləri sonda "erməni xalqına birləşiblər". Guya "Ermənistan" termininə ilk dəfə yoxa çıxmış Urartu ərazisində fars satraplığını təyin edən Fars kralı I Daranın Behustin kitabəsində (e.ə. 521) rast gəlinir (?). Guya daha sonra Araz çayı vadisində "Ararat krallığı" yaranıb (?). Guya bu da "üç ölkənin - Sofen, Kiçik Ermənistan və Böyük Ermənistanın yaranması üçün əsas olub". İddia edirlər ki, guya təxminən eramızdan əvvəl III əsrdə "erməni xalqının siyasi və mədəni həyatının mərkəzi Ararat vadisinə köçür". Təbii, bütün bunlar cəfəngiyatdan başqa bir şey deyil. O çağlarda erməni dövləti mövcud olmayıb. Ermənilərin bu bölgələrə köçürülüb yerləşdirildikləri tarix məlumdur. Bunu dəfələrlə faktlar əsasında qeyd etmişik. Nə yazıq ki, bu bədbəxt toplum hələ də özünə qədim dövlətlər "yaratmaq" həvəsindən əl çəkmək istəmir.
"Akademik Boris Piotrovski saxta erməni tarixinin yaradılmasında yaxından iştirak edib"
AMEA-nın Qafqazşünaslıq İnstitutunun Qafqaz Tarixi şöbəsinin müdiri, professor Qasım Hacıyev "Bakı-Xəbər"ə şərhində bildirdi ki, haylar nə xəyal edirlərsə onu tarixi gerçəklik kimi qələmə verməyə cəhd edirlər. "Tarixlərini o qədər belə lazımsız məsələlərlə doldurublar ki, özləri də uydurduqları yalanlar içində batırlar. İndiyə qədər tanınan qədim dövlətlər Cənubi Qafqaz ərazisinə yaxın olan, yaxud daxil edilən Urartu, Manna, Midiya, Assur dövlətləri idi. Amma bu dövlətlərin də haylarla heç bir əlaqəsi yox idi. Buna baxmayaraq, onlar bu dövlətlərin ən qədimini götürüb onu öz adlarına çıxırlar. Urartu ilə hayların heç bir əlaqəsi olmadığı halda hər yerdə yazırlar ki, guya Urartu hayların ən qədim dövlətidir. Hətta ondan da qədimlərini tapıb özlərini ona yamaq edirlər. Halbuki, o dövlətlərin də bəziləri tarixdə var, bəziləri isə tamamilə uydurmadır. Bu dövlət adlarını onlar özləri uydurublar. Haylar və onların havadarları belə "faktları" yaradırlar və yayırlar. Onların iddia etdiyi dövlətlərin heç birinin onlara aidiyyəti yoxdur. Digər tərəfdən də, bunlar iddia edirlər ki, 6 qədim dövlətdən biri də guya Ermənistandır. Bunların sanki tarixdən xəbərləri yoxdur. Qədim dövlətlər arasında heç zaman "Ermənistan" adlı dövlət olmayıb. Roma və Yunan dövlətlərinin yanında erməni dövlətinin adının çəkilməsi absurddur.
Misirin dünyanın ən qədim dövlətlərdən biri olduğunu dünya tarixçiləri bilir. Eləcə də, yunan və Roma dövlətlərinin tarixi qədimdir. Amma hayların bu gün öz dövlətçilik tarixlərini qədim dövlətlərlə bərabərləşdirməsi gülünc görsənir. O qədim dövlətlər mövcud olarkən heç zaman erməni dövləti olmayıb".
Q.Hacıyevin qeyd etdiyinə görə, haylar əndazəni o qədər aşıblar ki, hətta Misir ehramlarına belə iddia edirlər. "Onlar saxta arqumentlər gətirirdilər ki, Misir ehramlarının, eləcə də Misir dövlətinin yaranmasında guya hayların əcdadlarının da rolu olub. Bu biabırçılıqdır.
Bunlar özlərini Urartuya yamaq edib ətraf dövlətlərə də iddia irəli sürürlər. Burda bunlar skif və erməni əlaqələri haqda yazırlar. Buna birinci dəfədir rast gəlirəm. Erməni və skif əlaqələri necə ola bilər ki? Gülməli və gülüncdür. Bütün dünya tarixçiləri bilir ki, rus tarixşünaslığında skiflər, İran tarixşünaslığında saklar adlandırılan işquzlar türk mənşəlidirlər. Bu barədə tarixi faktlar var. Haylar həm özlərinə saxta tarix yaradırlar, həm də Azərbaycan-türk tarixinə iddia edirlər. Bax, budur bunların uydurması".
Q.Hacıyev bildirdi ki, saxta hay tarixinin yaradılmasında tarixçi akademik Boris Piotrovski xüsusi canfəşanlıq edib. "Akademik Boris Piotrovski saxta erməni tarixinin yaradılmasında yaxından iştirak edib və ermənilərlə bağlı bir neçə kitab yazıb. Hayların olmayan dövlətçilik tarixini qədim dövrlərə aparıb çıxaranlardan biri Piotrovski olub. Yəni hayların saxta tarixinin yaradılmasında, onların "qədim dövlətçilik ənənəsinə malik olduğu" iddiasının irəli sürülməsində Piotrovskinin xüsusi "əməyi" var. Məhz onun sayəsində indiki Ermənistan ərazisində arxeoloji qazıntılar aparıldı və bunun nəticəsində də saxta əsərlər, saxta məqalələr ortaya çıxdı. O bir ermənipərəst idi, arvadının da erməni olduğu gizlin deyildi"-deyə Q.Hacıyev bildirdi.
İradə SARIYEVA
