İbrahim Rüstəmli: "Ermənistan tərəfindən atəşkəs pozulursa, burda da əsas rolu hazırda Ermənistanda yerləşən məlum güclər - Fransa, ABŞ oynayır"
Ermənistanın yürütdüyü antisülh siyasəti özünü günü-gündən daha qabarıq formada göstərir. Bir yandan Azərbaycanla sülh müqaviləsi imzalamaqda maraqlı olduqlarını rəsmi səviyyədə bəyan edirlər, o biri tərəfdən isə həm silahlanırlar, həm də sərhəddə təxribat törətməyə cəhd edirlər.
Bu da onu göstərir ki, bədnam qonşularımız revanşizmdən və işğalçılıq siyasətindən bir addım da olsa geri çəkilmək niyyətində deyillər. Təbii, bu məkrli niyyətlərini öz başlarına ifadə etmirlər, burda onların havadarları olan məlum Qərb dövlətlərinin də əli yox deyil.
Bildiyimiz kimi, yanvarın 6-sı saat 14:10 radələrində Ermənistan silahlı qüvvələrinin bölmələri Gorus rayonunun Dığ istiqamətində yerləşən mövqelərindən Ordumuzun Laçın rayonunun Zabux yaşayış məntəqəsi istiqamətindəki mövqelərini atıcı silahlardan yenidən atəşə tutub.
Qeyd edək ki, bundan əvvəl yanvarın 5-i saat 22:00-dan 22:10-dək də Ermənistan silahlı qüvvələrinin bölmələri Gorus rayonunun Dığ və Xanazax istiqamətlərində yerləşən mövqelərindən Ordumuzun Laçın rayonunun Zabux və Cağazur yaşayış məntəqələri istiqamətlərindəki mövqelərini atıcı silahlardan fasilələrlə atəşə tutub.
Sərhəddə atəş açan Ermənistan kimlərə güvənir? Bu niyə baş verdi?
"Ermənistanın bu məsələdə öz havadarlarına arxalandığı gizlin deyil"
Hərbi ekspert İbrahim Rüstəmli "Bakı-Xəbər"ə şərhində bildirdi ki, hazırda Cənubi Qafqazda ən strateji ölkə Azərbaycandır və Azərbaycan öz vahid siyasi xəttinə, eyni zamanda istər regionda, istərsə də beynəlxalq aləmdə mövqeyinə görə seçilən, öndə gedən ölkədir. "Azərbaycanın asayişinə, dincliyinə, inkişafına mane olmaq məqsədilə burda maraqları toqquşan çox ciddi güclər fəlaiyyət göstərir. Mən dəfələrlə bu barədə öz fikrimi bildirmişəm, yenə də təkrar edirəm ki, 44 günlük Vətən savaşından sonra yeni geosiyasi reallıqlar fonunda Cənubi Qafqazda həm də yeni mövqe savaşları başlayıb. Bu savaşların harda, necə həyata keçirilməsini artıq həyat bizə göstərib. Yəni Ermənistan Cənubi Qafqazın ən morionet dövlətidir, bunun üçün həm də zəif bəndidir. Bütün projelər, bütün planlar, bütün məkrli niyyətlər məhz Ermənistan üzərindən həyata keçirilir. Yəni biz burda əgər Gürcüstanı da müqayisə predmetinə çevirsək, deməliyik ki, Gürcüstan ümumiyyətlə bu baxımdan strateji xarakter daşımır. Bu gün Ermənistanda fəaliyyət göstərən güclərin, eyni zamanda Ermənistana gəlib-gedən xarici nümayəndələrin, emissarların əsas məqsədi bu ölkə vasitəsilə Cənubi Qafqazda nəzarət mexanizmini tam şəkildə həyata keçirməkdən ibarətdir. Ermənistan tərəfindən atəşkəs pozulursa, burda da əsas rolu hazırda Ermənistanda yerləşən məlum güclər - Fransa, ABŞ oynayır. Bu məsələ ilə bağlı Rusiyanın proyektləri var. Amma hələ başı Ukrayna savaşına qarışdığı üçün bunları həyata keçirə bilmir. Rusiya artıq bu və digər şəkildə açıq tribunalardan ideoloqlarının dili ilə bəyanat yayır ki, Ukrayna savaşından sonra Azərbaycanla da bizim işimiz olacaq.
Bütün bunları Azərbaycana, Azərbaycanın bugünkü vahid siyasi durumuna, eyni zamanda artan iqtisadi və hərbi gücünə qarşı bir təhdid kimi qarşılayıram, qəbul edirəm. Bu mənada Ermənistanın atəşkəsi pozması həm Azərbaycan, həm də ümumiyyətlə Cənubi Qafqaz üçün növbəti mesajlardan biridir. Yəni "münaqişə hələ bitməyib, münaqişənin davamı olacaq, münaqişə hələ uzun sürəcək" mesajını verirlər. Ona görə də, Azərbaycanla Ermənistan arasında sülh danışıqlarının aparılmasına, sülh sazişinin bağlanmasına mane olan güclər var. o güclər var qüvvələri ilə çalışırlar ki, Azərbaycanla Ermənistan arasında sülh sazişi imzalanmasın".
İ.Rüstəmlinin fikrincə, burda da əsas məqsəd Cənubi Qafqazda bir qədər öləziyən, sönən, bir qədər zəif közərən münaqişə ocaqlarını yenidən körükləməkdir, Cənubi Qafqaza nəfəs almağa imkan verməməkdir. O vurğuladı ki, onların əsas istəklərindən biri Cənubi Qafqazın iki ölkəsini - Azərbaycanı və Gürcüstanı asılı vəziyyətə salmaqdır. "Mən Ermənistandan danışmıram, çünki o, vassal dövlətdir. Sərhəddə atəşkəsin pozulması bir mesajdır və bu mesajın arxasında Fransa, ABŞ, Rusiya dayanır".
İ.Rüstəmlinin sözlərinə görə, təyyarə qəzasından sonra Rusiya ictimai-siyasi, KİV poliqonunda Azərbaycana qarşı təhdid dolu bəyanatlar səsləndirilməkdədir, bu, ideoloqların çıxışlarında da açıq şəkildə görsənir. "Rusiya Azərbaycandan incik düşüb. Azərbaycan öz haqqını tələb edəndə "pis" dövlət olur, amma Azərbaycanın haqqı tapdananda bunlar "yaxşı" dövlət olub bizə kömək göstərirlər. Vəziyyət bundan ibarətdir".
İ.Rüstəmli qeyd etdi ki, Ermənistan sərhəddə atəşkəsi pozmaqla və ərazilıərimizi atəşə tutmaqla öz havadarlarına arxalanır: "Ermənistanın bu məsələdə öz havadarlarına arxalandığı gizlin deyil".
İ.Rüstəmli hesab edir ki, Ermənistan onların göstərişi ilə hərəkət edir. "Belə bir vəziyyətdə də Ermənistan tərəfindən atəşkəsin pozulması təbii qarşılanmalıdır. Çünki Ermənistan həmişə böyük güclərin əlində vasitə olub və vasitəçi kimi çıxış edir. Başda Amerika, Fransa, Rusiya olmaqla Ermənistanı və Ermənistanın timsalında erməni xalqını (əgər onlara xalq demək mümkündürsə-İ.R) poliqona və o poliqonun təliminin iştirakçılarına çeviriblər. Təkcə Ermənistan dövləti deyil, erməni cəmiyyəti də bu məsələdə vasitəyə çevrilib. Nəticədə onları yaxşı heç nə gözləmir. Bu işlər uzun müddət davam edə bilməz".
İ.Rüstəmli qeyd etdi ki, dünyada çoxlu münaqişə ocaqları var, yeni münaqişə ocaqları da yaradılır, yaradılacaq da, bu planlar fonunda, əlbəttə, Cənubi Qafqazda münaqişənin öləziməsi heç bir super gücə sərf etmir. "Buna görə də fikrimi cənab Prezidentinin söylədiyi mühüm bir məntiqlə yekunlaşdırıram. Cənab Prezident çıxışlarından birində demişdi ki, biz nəinki XXI əsrin, hətta XXII əsrin müharibəsinə hazır olmalıyıq. Təbii, bu ciddi bir mesaj idi, ciddi bir çatdırılma idi. Bunun arxasında da ciddi faktlar dayanır. Fakt ondan ibarətdir ki, Ermənistan gündən-günə daha çox silahlandırılır. Ermənistana verilən silahların, təqdim edilən hərbi cəbbəxananın böyük bir hissəsi Azərbaycanla sərhəddə yerləşdirilir. Bütün da kökündə sönmüş münaqişəni körükləmək məqsədi dayanır. Amma Ermənistan bununla heç nəyə nail ola bilməyəcək"-deyə İ.Rüstəmli qeyd etdi.
İradə SARIYEVA
