Tural İsmayılov: "Bu gün Türkiyədəki iqtidarda təmsil olunan Cumhur İttifaqı terrorun tam yoxa çıxması üçün artıq ardıcıl və prinsipial bir xətt ortaya qoyub"
Bildiyimiz kimi, Türkiyə Cumhuriyyəti uzun illərdir, terrorla mübarizə aparır və bu istiqamətdə böyük irəliləyişlərə nail olub da. Bu yöndə qardaş ölkənin həyata keçirdiyi tədbirlər nəticələr verir.
Türkiyə Prezidenti Rəcəb Tayyib Ərdoğan terrorla bağlı mühüm açıqlamalarla çıxış edib. Türkiyə lideri, həm ölkə daxilində, həm də xaricdə antiterror əməliyyatlarını davam etdirmək əzmində olduğunu bildirib.
Hakim Ədalət və İnkişaf Partiyasının Trabzon vilayətində funksionerləri qarşısında çıxış edən dövlət başçısı terror probleminin Türkiyənin gündəmindən çıxarılacağına əminliyini ifadə edib. "Rəsmi Ankara ölkədə sabitliyin pozulması, qarşıdurma və gərginliyin artırılması cəhdlərinə qarşı yaxşı düşünülmüş siyasət yürüdür. Terrorun mənbəyində məhv edilməsi strategiyası öz bəhrəsini verir" deyə Ərdoğan vurğulayıb.
Türkiyədə terrorun kökünü kəsmək mümkün olacaqmı?
"...müvəffəq olacaq"
Siyasi ekspert Tural İsmayılov "Bakı-Xəbər"ə şərhində "Türkiyə artıq terrora qarşı mübarizədə çox böyük irəliləyişlər əldə edib. Özəlliklə Türkiyədə cənab Ərdoğanın son 10 il ərzində antiterror siyasətində qətiyyətli addımları, prinsipial mövqeləri təkcə Türkiyəni daxildən çökdürmək üçün hesablanmış xain terror hucumlarına qarşı uğurlu əməliyyatlar ilə nəticələnmir, eyni zamanda Türkiyə qlobal terrorizmə çox böyük zərbələr endirən mərkəz halına gəlib"-deyə bildirdi.
T.İsmayılov qeyd etdi ki, R.T.Ərdoğanın qətiyyətli və ardıcıl siyasəti nəticəsində Türkiyə türk dünyasına və Türkiyə dövlətçiliyinə qarşı terror vasitəsilə xain hucumlar həyata keçirmək istəyən şəbəkələri çökdürməyi müvəfəqqiyyətlə bacarıb. "Bu gün Türkiyəni zəiflətmək üçün PKK, PYD-YPG kimi ünsürlərdən istifadə edən qlobal imperializm və onun maşalarının məkrli planları fiaskoya düçar olub. Eyni zamanda Türkiyə uğurlu əməliyyatlarla təkcə xain FETO şəbəkəsini süqut etdirməyib, təkcə PKK-ya qarşı çox ağır zərbələr endirməyib, həm də indi Türkiyə ardıcıl siyasi mövqe ortaya qoyur. Bu gün Türkiyədəki iqtidarda təmsil olunan Cumhur İttifaqı terrorun tam yoxa çıxması üçün artıq ardıcıl və prinsipial bir xətt ortaya qoyub. Daxildəki bəzi çətin situasiyalara və siyasi polemikalara baxmayaraq, Türkiyə dövləti hazırda PKK-nı tamamilə sıradan çıxarmağı hədəfləyib. Hörmətli Ərdoğanın açıqlamaları da buna fokuslanıb"-deyə T.İsmayılov vurğuladı.
O, bu baxımdan hesab edir ki, Türkiyə terrorun kökünü kəsməyə nail olacaq: "İndiyə qədər həyata keçirilən ardıcıl və qətiyyətli siyasət onu deməyə əsas verir ki, Türkiyə terrorun kökünü kəsməyə müvəffəq olacaq".
İradə SARIYEVA
