Ölkəmizin sosial-iqtisadi inkişafının əsas göstəricilərindən biri dövlət büdcəsidir. Hazırkı dövrdə ölkə mətbuatında əsas müzakirə mövzularından biri üçüncü oxunuşda qəbul olunan "Azərbaycan Respublikasının 2025-ci il dövlət büdcəsi haqqında" qanun layihəsi və büdcə zərfinə daxil olan qanun layihələridir.
Dövlət büdcəsinin həm gəlirləri, həm də xərcləri üzrə 40 milyon manat məbləğində artım istiqamətində dəyişiklik edilir. Dövlət büdcəsinin gəlirləri növbəti il üçün 38 milyard 356 milyon manat, xərcləri isə 41 milyard 407 milyon 600 min manat nəzərdə tutulur. Gələn ilin büdcəsi də sosialyönümlülüyü ilə diqqəti cəlb edir. Dövlət büdcəsindən ayırmalara diqqət yetirdikdə ölkəmizin hərtərəfli inkişafının prioritetliyinin özünü aydın şəkildə nümayiş etdirdiyini görgmək mümkündür. Şübhəsiz, dayanıqlı inkişafın təmin edilməsində əsas faktorlardan biri də demokratik və iqtisadi islahatların vəhdətinin qorunmasıdır. Demokratik inkişafın göstəricilərindən biri isə siyasi partiyaların fəaliyyəti üçün zəruri addımların atılmasıdır.
Siyasi sistemin möhkəmləndirilməsi, siyasi münasibətlərin sağlam zəmində gücləndirilməsi bu gün Azərbaycanda dövlət siyasətinin əsas istiqamətlərindən biridir. Tarixi Zəfərimizin reallıqları həyatımızın bütün sahələrində yeniləşməni, təkmilləşməni qaçılmaz etdi. Ötən ildən qüvvəyə minən yeni "Siyasi partiyalar haqqında" Qanun da bunun təsdiqidir. Hər yeni sənəd təbii ki, qarşıdakı dövr üçün hədəfləri, çağırışları özündə ehtiva edir. Bu baxımdan hər bir ölkənin inkişafında, beynəlxalq əməkdaşlığın möhkəmlənməsində mühüm rol oynayan siyasi partiyaların fəaliyyətinin təkmilləşdirilməsi Azərbaycan iqtidarının diqqət göstərdiyi əsas məsələlər sırasındadır. Azərbaycanda 50-dən artıq siyasi partiyanın qeydiyyatdan keçməsi, onların fəaliyyətləri üçün normal şəraitin yaradılması da demokratik inkişafın təqdimatında öz sözünü deyir. Yeni Qanunun tələblərinə uyğun olaraq hər kəs bərabər şəkildə siyasi partiya yaratmaq və ya mövcud siyasi partiyaya daxil olmaq hüququna malikdir. Bu hüquq yalnız qanunla müəyyən edilmiş hallarda məhdudlaşdırıla bilər. Ölkəmizdə dövlət qeydiyyatından keçmiş bütün siyasi partiyaların sərbəst fəaliyyətinə təminat verilir. Dövlət büdcəsinin vəsaiti hesabına siyasi partiyalara maliyyə yardımı göstərilir. Ümumilikdə yeni Qanun müasir dövrün bütün reallıqlarını, tələblərini özündə əks etdirir.
Bu fikirləri Milli Məclisin deputatı Vüqar Rəhimzadə KİV-ə açıqlamasında bildirib.
Vüqar Rəhimzadə qeyd edib ki, gələn ilin dövlət büdcəsindən siyasi partiyalara ayrılan vəsait artırılıb. Siyasi partiyalara maliyyə yardımının ayrılması üçün ilkin proqnozlaşdırılan vəsait bir milyon manat və ya 20 faiz artırılır. Bu ilin sentyabr ayında müstəqillik tariximizdə ilk dəfə olaraq bütün ölkə ərazisində keçirilən parlament seçkilərində qeydiyyatda olan siyasi partiyaların 25-i iştirak edib. Onların 11-i parlamentdə təmsil olunur. Bu rəqəm Azərbaycanın demokratik inkişafının, eyni zamanda, siyasi partiyaların ölkədə gedən proseslərdə fəal iştirakının mühüm göstəricilərindən biridir. 2024-cü ilin büdcəsindən partiyalar üçün 5 milyon manat vəsait ayrılmışdı. Gələn il üçün bu vəsaitin 6 milyon manata çatdırılması müsbət addımdır. Ümumilikdə siyasi partiyaların maliyyə imkanlarının artırılması onların fəaliyyət istiqamətlərinin genişləndirilməsinə stimul verir. Dövlət büdcəsindən maliyyələşmə şəffaflığın təminatında da öz sözünü deyir.
Milli Məclisin deputatı bildirib ki, partiyaların maliyyə imkanlarının artırılması ölkədə siyasi sistemin təkmilləşdirilməsinə öz müsbət təsirini göstərəcək. Dövlətə, dövlətçiliyə xidməti fəaliyyətinin önündə saxlayan siyasi partiyalar tarixi Zəfərimizin, ərazi bütövlüyümüzün və suverenliyimizin tam bərpa edilməsinin yaratdığı reallıqlar əsasında qarşıya qoyulan hədəflərin gerçəkləşdirilməsinə öz töhfələrini verməyə səy göstərirlər. 44 günlük İkinci Qarabağ müharibəsi zamanı bu birlik, həmrəylik özünü aydın şəkildə nümayiş etdirdi. Həmin vaxt 50-dən artıq siyasi partiyanın dövlətimizin başçısı İlham Əliyevin yürütdüyü siyasətə dəstəklərini özündə ehtiva edən bəyanatı imzalaması diqqətdən kənarda qalmadı. Bunun ardınca 2021-ci ilin 5 mart tarixində keçirilən Yeni Azərbaycan Partiyasının VII qurultayında 6 siyasi partiya YAP-a qoşulmaq barədə qərar qəbul etdi.
Millət vəkili onu da əlavə edib ki, dövlət büdcəsindən maliyyələşmədə əsas hədəflərdən biri də siyasi partiyaların maliyyəsində şəffaflğın təmin edilməsidir. Çoxpartiyalı parlamentin formalaşması da özündə əsas məqamları açıqlayır. Azərbaycanın yeni siyasi konfiqurasiyası formalaşır. Qanunvericilik sahəsində də siyasi sistemin təkmilləşdirilməsi üçün Milli Məclis tərəfindən lazımi addımlar atılır və bu proses davamlıdır.
