Media savadlılığı niyə vacibdir?..
Azər Həsrət: "Media savadlılığı olan şəraitdə bu gərginliyi aradan qaldırmaq üçün də imkanlar yaranır"
Müasir dövrdə yalnız media mənsubları deyil, hər bir insan media savadılığına malik olmalıdır. Bu, günümüzün zəruri məsələlərindən biridir.
Azərbaycanda media savadlılığının təbliği üçün ardıcıl olaraq işlər görülür. Yeri gəlmişkən,
2022-ci ildən qüvvəyə minmiş "Media haqqında" Azərbaycan Respublikasının Qanunu ölkəmizdə media savadlılığının artırılmasını zəruri tələb kimi irəli sürür. Həmçinin, Medianın İnkişafı Agentliyi media savadlılığının artırılması yönündə işlərin səməriliyini təmin etmək üçün xüsusi proqramlar icra edir. 2023-cü ildə Agentlik tərəfindən "Medialiteracy.media.gov.az" portalı yaradılaraq istifadəyə verilib. Bu portal media savadlılığı istiqamətdə məlumat almaq istəyənlər üçün mühüm töhfəyə çevrilib.
Qeyd edək ki, dekabrın 16-dan 22-dək Medianın İnkişafı Agentliyinin təşkilatçılığı ilə Azərbaycanda Media Savadlılığı Həftəsi elan edilib və hazırda bu istiqamətdə maarifləndirici tədbirlər həyata keçirilir.
Media savadlılığı niyə vacibdir? Niyə biz, cəmiyyət, hər kəs media savadlılığına malik olmalıdır?
"Yeni informasiya texnologiyalarının baş alıb getdiyi vəziyyətdə media savadlılığı birmənalı olaraq hər kəs üçün gərəklidir"
Media eksperti Azər Həsrət "Bakı-Xəbər"ə şərhində "Media savadlılığı, özəlliklə də indiki zamanda, çox vacibdir. Çünki artıq informasiya texnologiyaları o qədər sürətlə inkişaf edib ki, hər kəsin əlində kiçik bir cihaz və ya qurğu var, onun üzərindən media fəaliyyəti ilə məşğul ola bilir. Əlbəttə ki, media məşğuliyyəti həm də məsuliyyət tələb edir. Təəssüflər olsun ki, çox adam bu məsuliyyətdən xəbərsiz olur. Bax, media savadlılığı məhz bu məsələnin həllinə böyük töhfə verə bilər" - deyə bildirdi.
A.Həsrətin sözlərinə görə, yəni insanların ümumiyyətlə media ilə bağlı bilgiləndirilməsi, onların bu ortamda davranış qaydalarını mənimsəməsi qaçılmaz, vazkeçilməz bir şeydi. "Yəni media savadlılığı cəmiyyəti gərəksiz müzakirə və mübahisələrdən çəkindirmək üçün faydalı ola bilər. Eyni zamanda, bütövlükdə cəmiyyətlərdə kataklizmlərin qarşısını almaqda faydalı ola bilər. Bilirsiz ki, indi dezinformasiya, bilərəkdən və ya bilməyərəkdən yanlış informasiyaların yayılması, bütün bunlar cəmiyyətlərdə bir qarşıdurma, gərginlik yaradır. Bax, media savadlılığı olan şəraitdə bu gərginliyi aradan qaldırmaq üçün də imkanlar yaranır. Yəni mediadan necə istifadə etməsini bilən savadlı toplum artıq o kataklizmlərə yol vermir. Bir növ qarşısına çıxan istənilən informasiya ilə bağlı bir araşdırma aparır, şübhəli yanaşır, yəni hər şeyə gözüyumulu, kor-koranə inanmır, informasiyanı yayan mənbələrə, təsdiqlənib-təsdiqlənməməsinə diqqət yetirir. Yəni media savadlılığı bunun üçün vacibdir. Demək istədiyim odur ki, indiki şəraitdə, yeni informasiya texnologiyalarının baş alıb getdiyi vəziyyətdə media savadlılığı birmənalı olaraq hər kəs üçün gərəklidir. Burda söhbət təkcə jurnalistlərdən, media işçilərindən getmir. Əlbəttə ki, istənilən şəxs bu məsələdə bir subyektdir və o subyektin də savadlılığı şərtdir. Əgər savadlılıq olmazsa, dediyim kimi, cəmiyyət kataklizmlərə sürüklənə bilər" - deyə A.Həsrət qeyd etdi.
İradə SARIYEVA
Media savadlılığının artırılması və təşviqi məqsədilə Media savadlılığı platforması da fəaliyyət göstərir. Media savadlılığı platforması ilə aşağıdakı linkdə tanış olmaq olar:
https://medialiteracy.media.gov.az/
