Qərb raketlərinin Rusiya Federasiyasına hücumundan sonra Ukraynada münaqişə qlobal xarakter alıb. Bunu Rusiya prezidenti Vladimir Putin xalqa müraciətində bildirib. Putin onu da vurğulayıb ki, ABŞ və onun NATO müttəfiqləri Rusiya ərazisində uzaqmənzilli raketlərdən istifadə etmək qərarı ilə eskalasiya kursunu davam etdirdilər:
"Eskalasiya kursunu davam etdirən ABŞ və onun NATO müttəfiqləri daha əvvəl Rusiya ərazisində uzaqmənzilli dəqiqlikli silahların istifadəsinə icazə verdiklərini açıqlayıblar. Mütəxəssislər yaxşı bilirlər ki, belə silahları istehsal edən ölkələrin hərbi mütəxəssislərinin birbaşa iştirakı olmadan istifadə etmək mümkün deyil". Onun sözlərinə görə, ABŞ 2019-cu ildə Orta Mənzilli Nüvə Qüvvələri haqqında Sazişi birtərəfli qaydada xitam verməklə səhvə yol verib.
Putin əlavə edib ki, Rusiya münaqişənin gərginləşməsinə qəti cavab verəcək, ona qarşı hərbi kontingentini yaradan ölkələrin hakim elitaları bu barədə düşünməlidirlər: "Təcavüzkar hərəkətlərin eskalasiyası halında biz də qətiyyətlə və qarşılıqlı şəkildə cavab verəcəyik. Mən tövsiyə edirəm ki, öz hərbi kontingentindən Rusiyaya qarşı istifadə etmək planlarını həyata keçirən ölkələrin hakim elitaları bu barədə ciddi düşünsünlər". O, Rusiya ərazisində Amerika və İngiltərənin uzaqmənzilli silahlarından istifadə olunduğunu bəyan edib: "Noyabrın 19-da Ukrayna silahlı qüvvələri Bryansk vilayətində altı ATACMS raketi ilə, noyabrın 21-də isə Kursk vilayətində "Storm Shadow" sistemləri ilə hədəflərə hücum edib. Hava hücumundan müdafiə sistemləri hücumu dəf edib, itki və ciddi dağıntı olmayıb. Rusiya Ukraynanın "Yujmaş" raket-kosmik texnikasını istehsal edən müəssisəsinə nüvəsiz hipersəs ballistik raket zərbəsi endirib". Putin qeyd edib ki, Rusiyaya qarşı uzaqmənzilli silahlardan istifadə edilməsi xüsusi əməliyyatın gedişinə təsir göstərə bilməz. O əlavə edib ki, Moskva eskalasiyaya qəti və güzgü şəkildə cavab verəcək. Rusiyanın "Oreşnik" raketindən istifadə etməsi ABŞ-ın orta və qısamənzilli raketlərin istehsalı və yerləşdirilməsi planlarına cavabdır. Putin Rusiyanın ukraynalı mülki şəxslərə raketlərdən istifadə olunduğu zaman təhlükə zonasını tərk etməyi əvvəlcədən təklif edəcəyini vurğulayıb və əlavə edib ki, Moskva dinc vasitələrə üstünlük verir, eyni zamanda hadisələrin istənilən inkişafına hazırdır. Qeyd edək ki, Avropa və ABŞ aylarla Ukraynanın Kiyevə ötürülən uzaqmənzilli ATACMS və "Storm Shadow" raketləri ilə Rusiya ərazisinin dərinliklərindəki hədəfləri vurmasına icazə verib-vermədiyini müzakirə edərkən, rus siyasətçiləri Moskvanın bu cür hücumlara necə cavab verə biləcəyini açıqlayan kəskin bəyanatlar veriblər. Ona görə də Rusiya Müdafiə Nazirliyi noyabrın 19-da bu Qərb silahlarının Rusiya Federasiyasındakı hədəflərə hücumda istifadə edildiyini təsdiqlədikdən sonra ölkə və dünya Rusiyanın cavabının necə olacağını gözləyirdi. Bu fonda "Yujmaş" raket-kosmik texnikasını istehsal edən müəssisəyə qeyri-adi güclü zərbənin vurulduğu dünyanın xüsusi diqqət mərkəzində yer alır. Bu müəssisədə Ukraynanın "Qrom-2" ballistik raketləri və "Leleka-100" pilotsuz təyyarələri yığılır. Ukrayna Hərbi Hava Qüvvələri və daha sonra Vladimir Zelenski Dnepr obyektinin "qitələrarası ballistik raketlə vurulduğunu" bildirib. Raketin adı açıqlanmayıb. Bəzi "Telegram" kanallarının məlumatına görə, Rusiya Silahlı Qüvvələri "Yujmaş"ı eksperimental RS-26 "Rubej" raketi ilə nüvə silahı olmayan döyüş başlığı ilə vura bilər.
Açıq məlumata görə, bu kompleks "Yars" tipli qitələrarası ballistik raket layihəsinin raketdən müdafiəni yarmaq üçün yeni idarə olunan döyüş başlıqları ilə daha da inkişaf etdirilməsidir. Videoya əsasən, raketlər hədəflərinə çatıb. Bir sıra Qərb mediası Ağ Evdəki mənbələrə istinadən xəbər verib ki, Rusiyanın Dneprdə buraxdığı raket ballistik raketdir, lakin qitələrarası deyil, orta mənzillidir.Bu raketlər hədəflərə saniyədə 2,5-3 km sürətlə hücum edir və onların döyüş şəraitində sınaqları NATO ölkələrinin hərəkətlərinə cavab olaraq həyata keçirilir. Qeyd edək ki, Dövlət Dumasının Müdafiə Komitəsinin rəhbəri general-polkovnik Andrey Kartapolov Moskvanın Rusiya Federasiyası ərazisinə hücumları ilə bağlı Ukraynaya qarşı görünməmiş cavab zərbəsi hazırladığını bildirmişdi: "Zərbə, həmişəki kimi gözlənilməz olub. Qoy çuxurlarda otursunlar və qorxsunlar". Qeyd edək ki, nə Vaşinqton, nə də London rəsmi Kiyevə Rusiya Federasiyasına uzaqmənzilli raketlər atmağa icazə verdiklərini təsdiqləməyib. Bu, müəyyən dərəcədə onların bu yaxınlarda Vladimir Putin tərəfindən imzalanmış "Rusiya Federasiyasının nüvə silahından çəkindirmə sahəsində Dövlət Siyasətinin Əsaslarında" göstərilən cavaba oxşar cavab almaq istəmədiklərini göstərir. Eyni zamanda, ABŞ-ın müdafiə naziri Lloyd Austin mediaya deyib ki, Birləşmiş Ştatlar Rusiya Federasiyasının yeni nüvə doktrinasından xəbərdardır və "bu baxımdan sayıq olmağa davam edir". Bunun fonunda Pentaqon və bir sıra digər NATO ölkələri Kiyevə yeni yardım paketləri elan ediblər ki, bu da təbii ki, münaqişənin daha da genişlənməsinə töhfə verəcək. Ostin təsdiqləyib ki, Birləşmiş Ştatlar ilk dəfə olaraq Ukraynaya beynəlxalq müqavilələrdə istifadəsi qadağan edilən piyada əleyhinə minalar göndərib. Amerika mediası bu qərarını Rusiya qoşunlarının yavaş-yavaş və davamlı şəkildə irəliləməsi ilə izah edib. Ostinin sözlərinə görə, Ukrayna ordusuna bu səyləri ləngitməyə kömək edəcək vasitələr lazımdır. ABŞ Müdafiə Nazirliyi, həmçinin 275 milyon dollar məbləğində əlavə maliyyələşmənin bir hissəsi olaraq Ukrayna üçün daha bir silah paketi elan edib. Bura raketlər, mühəndis avadanlıqları, silahlar üçün ehtiyat hissələri və sair daxidir. Almaniya hökumətinin saytı hərbi yardımın növbəti tranşını açıqlayıb. Buraya, əsasən, Ukrayna Silahlı Qüvvələrinin hücum əməliyyatlarını dəstəkləyən vasitələr daxil edilib. Qərb mətbuatı bu yaxınlarda Polşada Ukrayna Silahlı Qüvvələrinin hərbçilərinin alman "Leopard 2A4" tanklarında yenidən təlim keçdiyini yazıb. Onların ekipajları norveçli təlimatçıların rəhbərliyi altında Polşanın 10-cu Zirehli Briqadasının zirehli maşınlarından istifadə edirlər. Belə dəstək və alman tanklarının tədarükü sayəsində Ukrayna Silahlı Qüvvələrinin beş ayrı piyada briqadası mexanikləşdirilmiş briqadalara çevrilib. Ukrayna Silahlı Qüvvələrinin Fransada təlim keçmiş və təchiz edilmiş "ən güclü" mexanikləşdirilmiş briqadası da tezliklə savaşa qatılacaq. Hollandiya Ukrayna Hərbi Hava Qüvvələrinə dəstək üçün F-16 qırıcıları tədarük etdiyini açıqlayıb. Bütün bunlar Rusiya-Ukrayna savaşının daha da kəskinləşəcəyini, nüvə müharibəsi həddinə yaxınlaşmaqda olduğunu göstərir.
Tahir TAĞIYEV
