Xaqani Cəfərli: "Təəssüf ki, ABŞ kimi dünyanın yeganə hiper gücü olan bir dövlətin başçısı belə ucuz populizmi özünə rəva görə bilir”
Rusiya xarici işlər naziri Sergey Lavrov və prezidentin köməkçisi Yuri Uşakov prezident Vladimir Putinin göstərişi ilə ABŞ nümayəndələri ilə danışıqlar aparmaq üçün Səudiyyə Ərəbistanının paytaxtı Ər-Riyada gedib.
Rusiya prezidentinin mətbuat katibi Dmitri Peskov görüşün Moskva ilə Vaşinqton arasında münasibətlərin bərpasına həsr olunacağını bildirib.
Bundan əvvəl “Axios” xəbər platforması ABŞ və Rusiya nümayəndə heyətlərinin Səudiyyə Ərəbistanında görüşünün Rusiya-Ukrayna münaqişəsinin həllinə həsr olunacağını bildirmişdi. Bundan əlavə, ABŞ və Rusiya nümayəndələri iki ölkənin prezidentləri Donald Tramp və Vladimir Putin arasında danışıqlara hazırlığı müzakirə edəcəklər.
ABŞ nümayəndə heyətinə dövlət katibi Marko Rubio, Ağ Evin milli təhlükəsizlik üzrə müşaviri Mayk Vals və ABŞ prezidentinin Yaxın Şərq üzrə xüsusi nümayəndəsi Stiven Uittok daxildir. Bu görüşdə Ukraynasız Ukrayna məsələsinin müzakirəsinə Zelenski də etiraz edib. Görüşdən hansı nəticələri gözləmək olar?
Baki-xeber.com saytına bu barədə açıqlamasında politoloq Xaqani Cəfərli bildirdi ki, Donald Tramp Ukraynada müharibəni 24 saata dayandıra biləcəyi iddiasında olsa da, hələlik bu istiqamətdə ən kiçik bir addım da ata bilməyib: "Çünki nə Rusiya, nə də Ukrayna ABŞ-dan yüz faiz asılı dövlətlərdir. Üstəlik, hər iki dövlət də müharibəni davam etdirmək imkanlarına malikdir. Belə bir şəraitdə müharibəni bir çağırışla, bir görüşlə dayandıracağını bəyan etmək ucuz populizmdən başqa bir şey deyil. Təəssüf ki, ABŞ kimi dünyanın yeganə hiper gücü olan bir dövlətin başçısı belə ucuz populizmi özünə rəva görə bilir.
Avropa liderlərinin qərarları, Çin rəsmilərinin açıqlamaları onu göstərir ki, sülh üçün münbit şərait mövcud deyil. Sülhə ilk öncə müharibə edən ölkələrin xalqları, sonra dövlətləri və daha sonra müttəfiqləri razı olmalıdır. Ukraynadakı müharibə ilə bağlı hələlik bunların heç biri yoxdur.
Səudiyyə Ərəbistanının paytaxtı Ər-Riyadda Rusiya və ABŞ təmsilçiləri arasında görüş hələlik “kəşfiyyat” xarakteri daşıyır və daha çox Trampın “təcili sülh” istəyinə xidmət edir. Ciddi nəticəsi olacağını düşünmürəm. Ciddi nəticələr üçün Ukrayna, Böyük Britaniya, Avropa İttifaqı və Çinin maraqları, fikirləri nəzərə alınmalıdır. Rusiya isə yalnız Trampla anlaşa biləcəyini, digər tərəflərin maraq və mənafelərini nəzərə almayacağını düşünür. Belə yanaşma ilə sülh ola bilməz. Moskva anlamalıdır ki, Rusiya Sovet İttifaqı deyil və Soyuq Müharibə illərində olduğu kimi dünya iki qütbdən ibarət də deyil. Həmin illərdə dünyada və ayrı-ayrı regionlarda baş verən münaqişələr əsasən Moskva və Vaşinqton arasında əldə edilən razılaşma ilə tənzimlənirdi. İndi daha həmin dövr deyil. Rusiya bu gün yalnız ABŞ-la müqayisədə kiçik iqtisadiyyatlı dövlət deyil, o, Çin, Avropa İttifaqı və Böyük Britaniyadan çox kiçik iqtisadiyyata malikdir. Çin, Avropa İttifaqı və Böyük Britaniyanın təsir gücü Rusiyadan daha çoxdur. Nüvə silahı arqumenti çox da keçərli deyil. Şimali Koreya və Pakistan da nüvə silahına malikdir. Ancaq bu onların böyük dövlət sayılmasına səbəb olmur. Dünyada gedən proseslərə Səudiyyə Ərəbistanının təsiri Pakistanın təsirindən, Cənubi Koreyanın və ya Şimali Koreyanın təsirindən dəfələrlə, bəlkə də on dəfələrlə çoxdur. Təəssüf ki, Moskvada belə gerçəklikləri anlamırlar və bu bütün dünyada gedən proseslərə mənfi təsir edir".
Dəniz NƏSİRLİ
