“Bu təşkilatın Pakistanda məktəb tikintisinə ayırdığı vəsaitin sonradan yoxa çıxması onu göstərir ki, USAİD bu pulu başqa istiqamətlərə yönəldib”
ABŞ Beynəlxalq İnkişaf Agentliyinin (USAİD) qanunazidd əməlləri o qədər genişmiqyaslıdır ki, saymaqla bitmək bilmir. “Humanitar yardım” adı altında fəaliyyət göstərdiyi bütün ölkələrdə öz cinayətkar izlərini qoyub. Terrorçuluğu maliyyələşdirməkdən tutmuş narkotik istehsalına, Əfqanıstanda narkotik becərilməsinə dəstək göstərib, vəsait ayırıb. Bundan başqa da USAİD-in qanundankənar fəaliyyətləri çoxdur.
Prezident Donald Trampa yaxınlığı ilə tanınan Respublikaçılar Partiyasının üzvü Perri çıxışında ilginc açıqlamalar verib. Perri USAİD-in Pakistanda təhsil proqramlarına 840 milyon dollar xərclədiyini deyib, buraya 120 məktəbin tikintisi üçün ayrılan 136 milyon dollar da daxildir. Bildirib ki, pulların çox böyük hissəsi yoxa çıxıb, məktəblərdən hər hansı birinin tikildiyinə dair isə heç bir sübut yoxdur.
Açıq görsənir ki, USAİD Pakistanda məktəb tikintisi üçün sözdə ayırdığı vəsaitin bir hissəsini başqa istiqamətlərə yönəldib. Bu təşkilatın yalnız şər işlərlə məşğul olduğu məlumdur.
“USAİD-in Pakistanda məktəblərin tikintisinə ayırdığı və yoxa çıxan vəsaitin taleyi ciddi şəkildə araşdırılmalıdır”
Tarix elmləri doktoru, professor Məhərrəm Zülfüqarlı “Bakı-Xəbər”ə şərhində bildirdi ki, Tramp hakimiyyətə gələndən sonra USAİD təşkilatı gündəmdədir, onun fəaliyyətin diqqət yetirilir, araşdırılır. “USAİD-in müxtəlif dövlətlərin daxilində həyata keçirdiyi qanundankənar fəaliyyət tək-tək ifşa olunur. Bu təşkilatın Pakistanda məktəb tikintisinə ayırdığı vəsaitin sonradan yoxa çıxması onu göstərir ki, USAİD bu pulu başqa istiqamətlərə yönəldib.
Təhsil proqramlarının icrası üçün 840 milyon dolların ayrılması böyük rəqəmdir və birdən-birə bu vəsaitin yoxa çıxması ortaya şübhəli məqamlar çıxarır. 120 məktəbin tikintisi üçün 136 milyon dollar ayrıldığı elan olunsa da, nəzərdə tutulan məktəblərin heç biri tikilməyib. Hesab edirəm ki, USAİD-in Pakistanda məktəblərin tikintisinə ayırdığı və yoxa çıxan vəsaitin taleyi ciddi şəkildə araşdırılmalıdır. Bu araşdırma nəticəsində bütün suallara cavab tapmaq mümkün olacaq”-deyə M.Zülfüqarlı bildirdi.
M.Zülfüqarlının sözlərinə görə, USAİD və başqa Qərb təşkilatlarının fəaliyyətində ciddi nöqsanların olduğu məlumdur. USAİD və başqa onun kimi qurumlar ayırdıqları qrantlar, pullar, yardımlar vasitəsilə müxtəlif dövlətlərin daxilinə nüfuz etmək, o ölkələrdə söz sahibi olmaq, müxtəlif çirkin əməllərini həyata keçirmək niyyətində olub.
“Qərb ölkələrindəki bütün fondların məqsədi öz dövlət maraqlarını həyata keçirməkdir. Vəsait sərf etdikləri, qrant verdikləri təşkilatlar vasitəsilə dövlətin siyasətinə təsir etmək məqsədi güdürlər. Azərbaycanda da belə təşkilatlar uzun müddət fəaliyyət göstərib, həm müxalifətdən, həm də iqtidardan olan QHT nümayəndələrinə, digər qurumlara maliyyə ayırıblar. Ona görə də, USAİD-in də, başqa qrant verən xarici təşkilatların da Azərbaycandakı fəaliyyəti də geniş araşdırılmalıdır. Onların Azərbaycan əleyhinə gördüyü işlər aşkarlanıb üzə çıxarılmalıdır. Mənə belə gəlir ki, hazırda bu barədə bilənin və bilməyənin danışmasına ehtiyac yoxdur. Azərbaycanda mütəxəssislər var ki, bu işlə məşğuldurlar. Hətta Qərb təşkilatları ilə əməkdaşlıq edənlərin içində Milli Məclisin deputatları da olub. Bu məsələ ətraflı araşdırılmalıdır. Bu bizə çox lazımdır, bu, Azərbaycan dövlətçiliyinin gələcəkdə möhkəmləndirilməsinə xidmət edə bilər”-deyə M.Zülfüqarlı bildirdi.
İradə SARIYEVA
