Səudiyyə Ərəbistanının paytaxtı Ər-Riyadda ABŞ və Rusiya nümayəndə heyətləri Ukraynadakı müharibənin sülh yolu ilə həlli və iki ölkə arasında münasibətlərin normallaşdırılması məqsədi ilə bir araya gəlib. Görüşdə iştirak edən Rusiya nümayəndə heyətinə xarici işlər naziri Sergey Lavrov, ABŞ nümayəndə heyətinə isə dövlət katibi Marko Rubio rəhbərlik edib.
Görüş heç bir ön söz və ya əl sıxışmadan gərgin atmosferdə keçib. Danışıqların ən mühüm gündəm bəndlərindən biri də Rusiya prezidenti Putin və ABŞ prezidenti Tramp arasında mümkün sammitə hazırlıq məsələlərinin müzakirəsi olub.
Görüşün ardından jurnalistlərə açıqlama verən ABŞ dövlət katibi Rubio Rusiya nümayəndə heyəti ilə sülh danışıqlarının aparılması və iqtisadi əməkdaşlığın təşviqi üçün yüksək səviyyəli komandanın formalaşdırılması ilə bağlı razılığın əldə edildiyini bildirib. Rubio həmçinin səfirlik işçilərinin yenidən işə götürülməsi barədə də razılaşdıqlarını bildirib.
Rusiya kanalına danışan Rusiya vitse-prezidenti Yuri Uşakov isə Rusiya-Amerika danışıqlarından sonra verdiyi açıqlamada tərəflərin hərtərəfli və ciddi müzakirələr apardıqlarını, lakin tam razılığa gələ bilmədiklərini deyib.
Danışıqların əsas nəticələri arasında Rusiya və ABŞ müzakirəçilərinin Ukrayna üzrə birbaşa dialoqa başlamaq qərarı önə çıxır. Belə ki, 4,5 saat davam edən görüşdə Rubio və Lavrov Ukraynada müharibəyə son qoymaq üçün müzakirələr aparacaq yüksək səviyyəli heyətlərin formalaşdırılması barədə razılığa gəliblər.
Uşakov bildirib ki, hər iki tərəf öz nümayəndələrini təyin etməlidir və bu addım atılandan sonra “proses yəqin ki, irəliləyəcək”. O, həmçinin bildirib ki, Rusiya prezidenti Putin Ukrayna ilə bağlı ABŞ-la təmasların nə vaxt başlayacağına özü qərar verəcək.
Uşakov gələn həftə Rusiya və ABŞ liderləri arasında görüş ehtimalının isə az olduğunu deyib: “İki ölkənin nümayəndə heyətləri intensiv işləməlidir, biz buna hazırıq, lakin liderlər arasında görüş üçün dəqiq tarix təyin etmək hələ tezdir”.
Danışıqların bütövlükdə yaxşı keçdiyini deyən Uşakov tərəflərin bütün məsələlərlə bağlı ciddi danışıq apardığını və bir-birinin maraqlarını nəzərə almağa razılaşdıqlarını bildirib.
Danışıqlardan sonra açıqlama verən ABŞ Dövlət Departamentinin sözçüsü Tammi Bryus isə bildirib ki, tərəflər Ukraynada münaqişəni uzunmüddətli, davamlı və bütün tərəflər üçün məqbul bir şəkildə bitirməyi hədəfləyirlər.
"Ukraynadakı münaqişəyə mümkün qədər tez son qoymaq üçün müvafiq yüksək səviyyəli heyətlərin təyin edilməsi razılaşdırılıb", - deyə Bryus “Reuters” agentliyinə bildirib.
O, qeyd edib ki, tərəflər qarşılıqlı geosiyasi maraq doğuran məsələlər üzrə gələcək əməkdaşlığın əsaslarını qoymağı və Ukraynada münaqişə bitdikdən sonra yarana biləcək iqtisadi və investisiya imkanlarını dəyərləndirməyi planlaşdırırlar.
TAHİR
