Ermənistan Azərbaycanla tezliklə sülh müqaviləsi imzalamağa çalışır, lakin əsas fikir ayrılığı Qarabağ məsələsi ətrafında qalır. Bunu Ermənistan prezidenti Vaaqn Xaçaturyan İrəvan Ağsaqqallar Şurasına seçkilərdəki səsvermədən sonra deyib.
Dövlət başçısı Ermənistan hakimiyyətinin Qarabağdan uzaqlaşdığına inanmadığını bəyan edib. Onun sözlərinə görə, problem həqiqəti söyləmək və onu dinləməyə hazır olmaqdır.
Xaçaturyanın fikrincə, İrəvanın Qarabağ ermənilərinin təhlükəsizliyi məsələsini həll edə bilməsi üçün atmosfer yetişib. O deyib ki, hakimiyyət orqanlarının bu məsələ ilə bağlı səslənən hər hansı bəyanat və ya şərhlərin reallıqla heç bir əlaqəsi yoxdur. Bildirib ki, çox çətin danışıqlar prosesi gedir. Prezident bu halı nəzərə almağa çağırıb.
O, eyni zamanda qeyd edib ki, sülh müqaviləsinin tezliklə imzalanması Ermənistanda gələcəyə inam, etimad mühiti yaradacaq, sərhədlərin və suverenliyin toxunulmazlığını təmin edəcək.
Son vaxtlar erməni rəsmiləri Qarabağ ermənilərinin təhlükəsizliyi ilə yanaşı, sərhədlərin və suverenliyin toxunulmazlığını da hallandırırlar. Əslində bununla nə demək istəyirlər? Burada Azərbaycanı işğalla meyilli bir ölkə kimi təqdim etmək cəhdi varmı?
Azad Vətən Partiyasının sədri Akif Nağı “Bakı-Xəbər”ə açıqlamasında bildirdi ki, bu çox maraqlı və vacib bir məsələdir: “Belə görüntü yaratmağa çalışırlar ki, guya hökumətlə prezident arasında nəsə fərqli yanaşma var. Amma əslində eyni məsələni ortaya qoymaq istəyirlər. Azacıq da olsa, reallıqla hesablaşırlar. Başa düşürlər ki, başqa yol yoxdur, Azərbaycanla dil tapmaq və sülh müqaviləsini imzalamaq lazımdır. İmzalamasalar, Ermənistanın regionda gələcəyi yoxdur. Ona görə də, onların prezidenti də bu məsələ ilə bağlı belə mövqe sargiləyirlər. Digər tərəfdən də, yenə də erməni hiyləgərliyini işə salırlar. Məkrli niyyətlərini ortaya qoyurlar ki, guya onların süverenliyinə nəsə təhlükə var Azərbaycan tərəfindən. Azərbaycanın belə bir iddiası yoxdur. Əksinə, bütün danışıqları hər zaman onlar pozublar. Yaxud da, dünyada belə bir rəy yaratmağa çalışırlar ki, guya Azərbaycan onlara qarşı sərhədlə bağlı hansısa təhlükə yaratmaq istəyir. Bu mövqedən çəkinməlidirlər. Azərbaycanın mövqeyi konkretdir. Regionda sülh sazişinin imzalanması üçün, Azərbaycanın şərtlərini qəbul etməlidirlər və həmin şərtlər də hesablaşmalıdırlar”.
Doğrudan da, Azərbaycanın suveren torpaqlarını 30 ilə yaxın müddətdə işğal altında saxlayan, 2020-ci il Vətən müharibəsinin nəticələrinə baxmayaraq, Azərbaycana məxsus 8 kəndi Azərbaycana təhvil verməyən, üçtərəfli bəyanata zidd olaraq, erməni silahlı qüvvələrini Azərbaycan ərazilərindən hələ də çıxarmayan, davamlı hərbi təxribatlar törədən məhz Ermənistandır.
Azərbaycanın Qarabağ bölgəsinə istinadlarında Azərbaycanın suverenliyi və ərazi bütövlüyünü şübhə altına alan biz yox, məhz Ermənistandır. Maraqlıdır ki, öz adlarını bizə qoymaq istəyirlər.
Məhəmmədəli QƏRİBLİ
