Ermənistanın baş nazirinin müavini Mqer Qriqoryan Avrasiya Konqresinin kluarlarında jurnalistlərə təzadlı açıqlama verib.
O, qeyd edib ki, nəqliyyat xətlərinin açılması sülh müqaviləsi ilə bağlı deyil: “Nəqliyyat kommunikasiyalarının blokadadan qaldırılması Ermənistan və Azərbaycan arasında olacaq sülh müqaviləsi ilə bağlı deyil. 9 noyabr bəyanatının strukturundan siz də hiss etməlisiniz ki, bu, müstəqil bənddir və məncə, bu, yalnız iqtisadi və nəqliyyat əlaqələrinin açılmasına aiddir”.
Baş nazir müavinlərinin kommunikasiyaların bərpası məsələsi ilə bağlı yeni üçtərəfli görüşünün tarixinin müzakirə olunub-olunmaması ilə bağlı suala Qriqoryan belə cavab verib: “Hələlik heç bir razılaşma yoxdur, lakin baş nazirin müavini Overçukla növbəti görüşümün yaxın günlərdə olacağını istisna etmirəm. Üçtərəfli görüşü də istisna etmirəm”.
Burada tipik erməni hiyləgərliyi diqqəti cəlb edir. Yəni, kommunikasiyaları açaq, sülh sazişi neçə ildən sonra imzalanır-imzalansın. Daha konkret desək, biz ermənilərə yol verək, onlar da süh sazişi imzalamasınlar. Bu, əslində Rusiyadan gələn xəttdir. Qərb sülh sazişinin imzalanmasına önəm verir. Bunu kommunikasiyalardan daha vacib hesab edir və qabağa çəkirlər. Ancaq Moskva sülh sazişini, sərhədlərin delimitasiyasını sonraya saxlayır.
Sözügedən məsələ ilə bağlı baki-xeber.com-a açıqlama verən siyasi şərhçi Azər Həsrət hesab edir ki, Ermənistan müxtəlif bəhanələrlə sülh sazişini uzatmaq istəyir: “Yəni, mümkün qədər bunu gecikdirməyə çalışırlar. Bu da səbəbsiz deyil. Çünki hesab edirlər ki, bunu yubatsalar haçansa geosiyasi vəziyyət onların xeyrinə dəyişə bilər. Bu proseslər fonunda onlar Qarabağla bağlı öz niyyətlərini gerçəkləşdirə bilərlər. Ona görə də bu və ya digər bəhanələri ortaya atırlar, dövriyyəyə buraxırlar və arxasına sığınaraq öz təbliğatlarını qururlar. Ancaq bütün bunlar Azərbaycana o qədər də təsir etmir və etməyəcək də. Çünki Azərbaycan sözünü bir dəfə deyib və ona uyğun da davranacaq. Yəni, söhbət ondan gedir ki, Azərbaycan dövləti həm sülh sazişinin imzalanması, həm də kommunikasiyaların açılması ilə bağlı birmənalı mövqeyə malikdir. Yəni, sülh sazişi əslində Azərbaycanla Ermənistan arasında məsələlərin kompleks həllinə xidmət edir. Bu, o deməkdir ki, bütün məsələlər kökündən və birdəfəlik həll olunacaq. Bundan nə Azərbaycan, nə də Ermənistan ziyan çəkməyəcək. Ancaq ermənilər düşünür ki, sülh sazişini bir qədər ertələyib kommunikasiyaların açılması və digər məsələlərin qabağa salınması onlar üçün daha məqbuldur. Hesab edirlər ki, bu məsələlərlə məşğul olsalar vaxt qazanacaqlar və zaman onların xeyrinə işləyəcək. Ancaq bütün bunlar boş ümidlərdir. Ən yaxşısı odur ki, sülh sazişi imzalansın və digər məsələlər birdəfəlik həll edilsin. Nəticədə iki dövlət və xalq arasında münasibətlər normallaşsın. Təbii ki, Azərbaycan bunu istəyir və bunun üçün çalışır. Ermənistan isə yenə də manipulyasiya ilə məşğuldur. O cümlədən, Rusiya da kommunikasiyaların açılmasından əvvəl sülh sazişinin imzalanmasını istəmir. Moskva ümumiyyətlə, istəmir ki, iki ölkə arasında sülh sazişi imzalansın. Kremlin siyasəti odur ki, tərəflər arasında daim gərginlik olsun və Rusiya da bundan istifadə edərək regionda mövcudluğunu qorusun. Bu ölkələri təsir altında saxlasın”.
Vidadi ORDAHALLI
