Ermənistanın diasporla iş üzrə səlahiyyətli nümayəndəsi Zare Sinanyan Paşinyan-Ərdoğan görüşü barədə danışarkən deyib ki, diplomatiyada standart işlənən protokol və ifadələr var, buna aludə olub böyük əhəmiyyət vermək vaxt itkisidir:
“Niyə bu görüş vacibdir, çünki səhər yuxudan duranda bu reallığı görürük: 85 milyon əhalisi olan Türkiyə adlı qonşumuz və onun yenidən seçilmiş prezidenti var. Biz isə yaşamaq uğrunda mübarizə aparan dövlətik. Bu da o deməkdir ki, bizim rəhbərliyimiz Türkiyənin lideri ilə danışmalıdır. Tarix sübut edib ki, biz danışmayanda bunu başqaları edir”.
Zare Sinanyan “Qarabağın Azərbaycanın tərkib hissəsi kimi tanınması ilə bağlı Paşinyanın mövqeyini bölüşürsünüzmü” sualına ikibaşlı cavab verib: “Mən başa düşürəm ki, iki dövlət ərazi iddiaları qalmaması üçün bir-birinin ərazi bütövlüyünü tanıyır, lakin bu, faktı dəyişmir. Ermənilər burada yaşayırlar və sözügedən insanların öz müqəddəratını təyinetmə problemi mövcuddur”.
Ermənistanın diasporla iş üzrə baş komissarı bildirib ki, səslənən bəyanatlar 2020-ci il müharibəsinin nəticələri ilə bağlıdır.
Sinanyan Köçəryan-Sərkisyan hakimiyyətinin Ermənistanın son savaşda məğlub olmasında əli olması barədə verilən sualı müsbət cavablandırıb: “Əlbəttə, ölkəni zəif vəziyyətə salaraq...”
Ermənistanda diasporu kurasiya edən bir adamın bu etirafı onların Azərbaycanın yaratdığı mövcud reallıqları qəbul etməsi anlamına gəlirmi?
Politoloq Elşən Mustafayev “Bakı-Xəbər”ə açıqlamasında bildirdi ki, Ermənistanın baş naziri Nikol Paşinyan Çexiyanın “Respekt” nəşrinə müsahibəsində bunları deyib:
“Ermənistan Gürcüstan və İranla yaxşı münasibətlər saxlayır. Eyni zamanda, İrəvanın Türkiyə və Azərbaycanla, demək olar ki, heç bir əlaqəsi yoxdur. Bunu dəyişdirmək lazımdır".
Ekspertin sözlərinə görə, Paşinyan qonşularla dostluğu ölkənin xarici siyasətinin əsas məqsədi adlandırıb. O əlavə edib ki, bir sıra praktik və psixoloji problemlər üzündən Ermənistan cəmiyyəti üçün bu ismarışı həzm etmək asan deyil:
“Ermənistan əgər doğrudan da qonşuları ilə normal əlaqələr qurmaq istəyirsə, buna getməyə məcbur olacaq və onların qanunvericiliyindən ərazi iddiaları ilə bağlı maddələr çıxarılacaq. Ermənistan Ağrı dağını öz əraziləri hesab etdiyindən, bunu guya qanuniləşdirmək üçün öz gerblərində ona yer veriblər. Əgər Paşinyan hakimiyyəti sözlərində səmimidirsə, ilk olaraq bu məsələyə diqqət etməlidir. Zare Sinanyan əslində diasporun təmsilçisi deyil. Sadəcə, Paşinyan hakimiyyətində diasporu kurasiya edir. Əslində, xaricdəki diaspor Türkiyə ilə gərginliyin qalmasının tərəfdarıdır ki, onlara ehtiyac olsun. Saxta soyqırım iddialarını təbliğ etmək adı ilə külli miqdarda pul silirlər. Münasibət normallaşanda buna ehtiyac olmur. Erməni diasporunun sıravi üzvləri isə bu reallığı qəbul edir. Ən başlıcası isə, yeni reallıqları Ermənistan rəhbərliyi görür. Təəssüflər olsun ki, Ermənistanın bundan əvvəlki hakimiyyətləri 1915-ci il hadisələri ilə bağlı müstəqil olaraq, erməni diasporunun diqtəsindən kənar hərəkət edə bilmir.
Erməni diasporunun hələ də tarixin isbat olunmamış dərinliyində qurdalanması ciddi problemdir. Bu, cəmiyyətin müasir və mədəni dünyaya inteqrasiyasına ciddi əngəldir. Bunu da ən gözəl dərk edən Paşinyandır. Bu səbəbdən də, dünya erməni diasporu ilə onun arasında ciddi uçurum var”.
Məhəmmədəli QƏRİBLİ
