Rusiya Federasiyası Müdafiə Nazirliyinin saytında 25 mart 2023-cü il tarixində “Dağlıq Qarabağ “ münaqişəsinin monitorinqi zonasında Rusiya sülhməramlı kontingentinin fəaliyyəti haqqında məlumat bülleteni dərc edilib:
Bülletendə bildirilir: “Otuz ictimai rəy müşahidə məntəqəsində müşahidəçilər ictimai rəyin monitorinqinə və yanğın vəziyyətinə nəzarət rejiminə riayət olunmasına nəzarət edirlər.
“Martuni” rayonunda Azərbaycanın irəliləməsi qeydə alınıb. Ölən və yaralananlar olmayıb.
25 mart 2023-cü il tarixində Azərbaycan Silahlı Qüvvələrinin bir qrupu Azərbaycan Respublikasının Prezidentinin, Ermənistan Respublikasının Baş nazirinin və Rusiya Federasiyasının Prezidentinin 2020-ci il noyabrın 9-da imzaladığı bəyanatının müfdəalarını pozaraq, mövqe irəliləyişi həyata keçirib”.
Göründüyü kimi, Rusiya MN bizim öz ərazimizdə ermənilərin qanunsuz silah daşımasının qarşısını almağımızı üçtərəfli bəyanatın pozulması kimi qələmə verir. Halbuki, həmin bəyanatın bir neçə bəndini elə sülhməramlıların özləri və onlara arxayın olan ermənilər pozur.
Politoloq Əhəd Məmmədli “Bakı-Xəbər”ə bildirdi ki, həmin razılaşmanı dəfələrlə həm Rusiya, həm də Ermənistan pozub: “Dəfələrlə rus sülhməramlılarının müşayiətilə Erməmistandan Qarabağa silah daşınmasına dair faktlar ortaya qoyulub. Həmin hadisənin vudeogörüntüləri də yayılıb. Halbuki, Rusiya sülhməramlıları Qarabağda olan erməni silahlılarını özü zərərsizləşdirməliydi. Onlar atdıqları imzaya riayət etmirlərsə, biz özümüz bunun öhdəsindən gələ bilirik. Rusiyanın bu mövqeyinə iftiradan başqa nəsə deyə bilmərik. Artıq bizim xəbərdarlıq limitimiz də bitib. Ölkə başçısı deyir ki, orada 10 min silahlı var. Bu, az rəqəm deyil. Bunun məsuliyyəti elə rus sülhməramlıların üzərinə düşür. Biz hələ gecikmişik. Təcili şəkildə Xankəndiyə nəzarəti bərpa etməliyik. Həm ermənilər, həm də sülhməramlı kontingent de-fakto vəziyyətin saxlanılmasına deyil, bölgədə dayanıqlı sülhə çalışmalı və hər bir dövlət kimi Azərbaycanın da ərazi bütövlüyünə olan həssaslığını anlamağa borcludur.
30 il ərzində istehkamlar inşa edərək, müdafiə sədləri çəkərək möhkəmlənməyə çalışan ermənilərə Azərbaycan Ordusu 44 günə alçaldıcı məğlubiyyət yaşatdı. İndi Xankəndini ovcunun içində görən, Laçını, Kəlbəcəri nəzarətə götürmüş, müasir müharibə təcrübəsi olan Azərbaycan Ordusunun bu qanunsuz silahlı dəstələri tam zərərsizləşdirməsi üçün kiçik bir antiterror əməliyyatı kifayət edir.
Əvvəllər əbədi işğala inanan ermənilərin indi əbədi sülhməramlı fəaliyyətə inanması gələcək gərginliklərin toxumunu əkməkdən başqa bir şeyə xidmət etmir. Ermənilərin Azərbaycan ərazisindəki bundan sonrakı mövcudluğu yalnız Azərbaycanın ərazi bütövlüyü çərçivəsində əldə edilmiş dayanıqlı sülhlə mümkündür. Yaxşı olar ki, Rusiya sülhməramlıları da bunu anlasın və fəaliyyətlərini bu istiqamətdə qurub, müddətləri bitəndə ölkələrinə dönsünlər”.
Azərbaycan ərazilərində müvəqqəti yerləşdirilmiş Rusiya sülhməramlılarından başlıca gözlənti 10 Noyabr bəyanatının müddəalarının həyata keçirilməsinə dəstək vermələriydi. Təəssüf ki, əvvəllər olduğu kimi, Rusiya və onun Ordusu Azərbaycan xalqını bu dəfə də yanıltmadı. Məramı sülh sayılan Rusiya hərbçiləri daha çox Qarabağda sülhü əngəlləyən addımlara yol verməklə diqqət çəkirlər.
Əsas məqam odur ki, üçtərəfli bəyanatın 4-cü bəndinə əsasən, sülhməramlı kontingent Azərbaycanın Qarabağ bölgəsinə yerləşdiriləndə paralel olaraq qanunsuz erməni silahlı qüvvələrinin çıxarılması təmin edilməli idi. Lakin iki il keçməsinə baxmayaraq, ortada hələ də konkret nəticə yoxdur.
Məhəmmədəli QƏRİBLİ
