Dekabrın 18-də MDB Dövlət Başçıları Şurasının videokonfrans formatında keçirilmiş sammitində Prezident İlham Əliyevin çıxışı Rusiya KİV-inin diqqət mərkəzindədir.
Bu ölkənin aparıcı nəşrlərindən olan “Kommersant” qəzetinin “Kreml pulu” deyilən jurnalistlər qrupuna daxil olan müxbiri Andrey Kolesnikov ali tədbirə həsr olunmuş məqaləsində Azərbaycan Prezidentinin çıxışını qələbə nitqi kimi qiymətləndirib.
Jurnalist yazır ki, Özbəkistan Prezidenti Şavkat Mirziyoyevin sədrliyi ilə təşkil olunmuş tədbirdə Ermənistan baş nazirindən başqa MDB-yə daxil olan bütün dövlətlərin başçıları iştirak edirdi.
A.Kolesnikov xatırladıb ki, Azərbaycan Prezidenti sammitdə ilk çıxışçı idi. Onun bir saat davam edən, demək olar, bütövlükdə Azərbaycan xalqının düşmənlə mübarizəsinə və düşmən üzərində qəti qələbəsinə həsr olunmuş nitqinin məğzi belə idi: “Biz Ermənistanı məğlub etdiyimiz kimi, koronavirusa da qalib gələcəyik”.
Jurnalist yazır ki, MDB üzrə həmkarları Prezident İlham Əliyevi müəyyən gərginliklə dinləyirdilər. Azərbaycan Prezidenti onlara Ermənistanın işğalçı dövlət olduğunu, danışıqların davam etdiyi 28 il ərzində dünya birliyini aldatdığını, bir santimetr də olsun torpaq qaytarılmayacağı barədə bəyanatları, işğal olunmuş ərazilərin qeyri-qanuni məskunlaşdırılmasını, ATƏT-in Minsk Qrupunun isə danışıqlar prosesinə yeni heç bir töhfə verməyə qadir olmadığını xatırladıb. A.Kolesnikov Azərbaycan liderinin “Ermənistanın hərbi-siyasi rəhbərliyinin belə bir bəyanatı da olmuşdu ki, bizi qorxutmağa çalışırdılar, əgər Azərbaycan, necə deyərlər, münaqişənin nizamlanmasına dair öz mövqeyində bundan sonra da israr edərsə, tezliklə erməni tankları Bakının küçələrində olacaq. Nəticədə belə də oldu, amma erməni tankları bizim küçələrdə dekabrın 10-da Azərbaycanın bu müharibədə Zəfərinə həsr edilmiş hərbi paradda hərbi qənimətlər kimi göründü” sözlərini xüsusi diqqətə çatdıraraq yazır: “İlham Əliyev rahat və inamla danışırdı. Onun nitqində bir kəlmə də olsun artıq söz yox idi, dəqiq formalaşdırdığı fikirləri, heç şübhəsiz, Azərbaycan PUA-ları erməni tanklarını vurduğu kimi, birbaşa hədəfə dəyirdi. Qarşımızda Azərbaycan xalqının liderini görürdük. Tarix boyu bu xalqın hələ belə lideri olmamışdı və xalq özü də indi buna əmindir”.
Göründüyü kimi, uğurlu döyüş əməliyyatlarından sonra Azərbaycana, Prezident İlham Əliyevə dünyada maraq daha da artıb. Ölkə başçısının beynəlxalq arenada reytinqi bir qədər də yüksəlib. Bütün bunların nəticəsidir ki, İlham Əliyevin məlum çıxışı qələbə nitqi kimi təqdim edilir.
“O üzdən, Prezidentin məlum çıxışı böyük marağa səbəb olub”
Sözügedən məsələ ilə bağlı fikirlərini “Bakı-Xəbər”lə bölüşən siyasi ekspert Ramil Hüseynovun sözlərinə görə, Rusiya mətbuatı bununla Prezident İlham Əliyevin tarix yazdığını etiraf etdi: “Əlbəttə ki, sözügedən tədbirdə Prezident İlham Əliyev qalib bir dövləti təmsil etdiyi üçün onun çıxışına maraq böyük idi. Ölkələrin əlifba sırasına uyğun olaraq birinci Azərbaycan Prezidenti çıxış etdi. MDB dövlət başçıları böyük maraqla Prezidentin çıxışını dinlədilər. O cümlədən, Rusiya mətbuatında onun səsləndirdiyi fikirlərə xüsusi yer ayrıldı. Nəzərə alsaq ki, sözügedən tədbir bizim qələbəmizin əldə edilməsindən bir ay sonra keçirildi, o zaman bunun nə demək olduğunu geniş izah etməyə ehtiyac yoxdur. Nəinki Rusiya mətbuatı, bütün dünya mediası ölkə başçısını qalib ölkənin lideri kimi qəbul edir. O üzdən, Prezidentin məlum çıxışı böyük marağa səbəb olub”.
Siyasi ekspert hesab edir ki, Azərbaycan qalib ölkə olduğuna görə bundan sonra bizə münasibət fərqli olacaq.
Vidadi ORDAHALLI
