Hindistan Pakistanla vəziyyəti daha da gərginləşdirəcək yeni qərar verib. Baki-xeber.com xarici mediaya istinadən xəbər verir ki, Yeni Dehli Cammu Kəşmirin xüsusi statusunu ləğv edib.
Hindistan hökuməti Cammu Kəşmirə digər əyalətlərdən daha çox muxtariyyət tanıyan konstitusiyanın 370-ci maddəsində dəyişiklik edilməsi üçün parlamentə təklif göndərib və təklif qəbul edilib.
Bu barədə daxili işlər naziri Amit Şah açıqlama verib. Təklif müxalif deputatların etirazı ilə qarşılanıb. Parlamentdəki etirazların şiddətlənməsindən sonra Amit Şah bildirib: "Bu ilk dəfə deyil, 1952 və 1962-ci illərdə bənzər hadisələr baş verdi və parlament 370-ci maddəni dəyişdirdi. Buna görə etiraz etmək əvəzinə, xahiş edirəm danışmağa icazə verin, bütün şübhələriniz və yanlış bilgiləriniz həll ediləcək və bütün suallarınıza cavab verməyə hazıram".
Bu arada, Cammu Kəşmirə günlərdir hərbiləşmiş qüvvələrinin yığılmasından sonra gecə bölgədəki siyasətçilər ev dustağı edilib. Bölgədə, həmçinin toplantılar qadağan edilib, məktəblər bağlanıb, mobil şəbəkələrə və internetə məhdudiyyət qoyulub.
Kəşmirdə komendant saatı elan edən Hindistan bölgədəki turistlərə və hindu zəvvarlara bölgəni tərk etmək, xalqa isə ərzaq tədarükü görmək çağırışı edib. Kəşmirin iki keçmiş baş naziri Ömər Abdullah və Mehbooba Müfti isə həbs edilib. Hindistan son həftələrdə bölgəyə 35 min əsgər göndərib.
Pakistan isə Kəşmir bölgəsinə Hindistan tərəfindən hər hansı bir müdaxilənin müharibə səbəbi kimi qəbul ediləcəyini bəyan edib.
Qeyd edək ki, İngiltərə 1947-ci ildə Hindistandan çəkilərkən Kəşmiri Hindistan və ya Pakistanla birləşmək məsələsində sərbəst buraxdı. Bu ölkələr müstəqillik qazandıqdan sonra Kəşmirin ərazisi Hindistanın və Pakistanın idarəsi altında olan zonalara bölünüb. Kəşmir ərazisinin bir parçası da Çinin nəzarəti altına keçib.
Əhalisinin 90 faizini müsəlman olan Kəşmir xalqı 1947-ci ildə Pakistana qoşulmaq istəsə də, dövrün hökmdarı Hindistanla birləşməyə qərar verdi.
Müsəlman Kəşmir xalqının bu qərara qarşı çıxmasından sonra Pakistan və Hindistan bölgəyə qoşun göndərdi və iki ölkə arasında ilk dəfə 1947-ci ildə Kəşmir uğrunda müharibə başladı. İki ölkə arasında yenə eyni səbəbə görə 1965 və 1999-cu illərdə də müharibə baş verdi.
Hazırda Kəşmirin 45 faizi Hindistanın, 35 faizi Pakistanın, 20 faizi isə Çinin nəzarətindədir. Hindistan ələ keçirdiyi bölgəni "Cammu Kəşmir" əyaləti adı altında öz ərazilərinə birləşdirdi. Cammu Kəşmir hazırda Hindistanda müsəlman əhalinin çoxluq təşkil etdiyi yeganə əyalət sayılır.
Pakistan isə öz nəzarətində olan Kəşmirə "Azad Kəşmir" (Müstəqil Kəşmir) və "Gilgit Baltistan" kimi iki muxtar bölgə statusu verdi.
BMT TŞ 1948-ci ildən bəri qəbul edilən qərarlarla Kəşmirin silahsızlaşdırılması və gələcəyinin referendumla müəyyən edilməsini nəzərdə tuturdu.
Hindistan xalq səsverməsini dəstəkləməsə də, Pakistan BMT TŞ qərarlarının icra edilməsini istəyir.
