"Urmiya gölünün bərpası layihələrini planlaşdırarkən, Urmiya gölünü Canlandırma Mərkəzi gölə su köçürmək üçün 4 təklif irəli sürmüşdü". Baki-xeber.com “Amerikanın səsi”nə istinadən xəbər verir ki, bu sözləri Ətraf Mühitin Mühafizəsi Təşkilatının müavini Məsud Təcrişi YJC xəbər agentliyinə deyib.
"Araz çayından Urmiya gölünə su kanalı çəkmək layihəsi bu təkliflərdən biridir, ancaq bu layihə maliyyə baxımdan xeyli baha başa gəlirdi," - o bildirib.
Təcrişi nəzərdən keçirilən potensial su mənbələri arasında Xəzər dənizinin də olduğunu lakin Xəzərin kimyəvi xüsusiyyətinin Urmiya gölünə uyğun gəlmədiyi qənaətinə gəlinib.
"Əgər Xəzər dənizindən Urmiya gölünə su çəkilərsə, bu, gölün ömrünü 50 ilə qədər azalda bilər ancaq heç bir su çəkilmədiyi halda bu gölün ömrü 500 ilə qədər uzana bilər" - deyə o əlavə edib.
"Digər bir təklif, suyun başqa bir ölkədən çəkilməsi idi. Van gölündən Urmiya gölünə su çəkilməsi variantlardan biri idi. Van gölü orta dərinliyi 500-600 metr olan bir göldür və son illər ərzində dərinliyində böyük fərq müşahidə olunmur" - Təcrişi deyib.
İranın Ətraf Mühitin Mühafizəsi Təşkilatının müavini təklifin rəsmi Ankaradan qaynaqlandığını deyib. Belə ki, İrandan fərqli olaraq Türkiyədə su bolluğu mövcuddur.
O deyib ki, gölün gələcəyi ilə bağlı məlumatımız yoxdur və tədqiqat nəticələrinə görə, 2050-ci ildə gölə axan su miqdarı 25% azalacaq. Temperaturun 2 dərəcəyə qədər yüksəldiyi təqdirdə yağış azalacaq və su köçürmənin bütün variantlarını nəzərə almalıyıq.
İran rəsmisi Vandan Urmiya gölünə su köçürülməsinin hələlik araşdırma mərhələsində olduğunu və hələlik konkret əməliyyat proqramının olmadığını söyləyib.
