İspaniyada bir müddətdir müşahidə edilən Kataloniya böhranı ilə bağlı fırtına qopdu. Madrid və Barselona kritik qərarlarını açıqladı. İlk olaraq Kataloniya parlamenti regionun İspaniyadan ayrılaraq, müstəqillik elan edilməsi barədə Bəyannaməni müzakirəyə çıxarıb və səs çoxluğu ilə bölgənin bitərəfli müstəqilliyini elan edib.
Baki-xeber.com xəbər verir ki, bəyannamə müxalifətçi deputatlar məclisdə səsverməni boykot etməsinə baxmayaraq, 70-10 səs fərqi ilə qəbul edilib. Bir partiyadan baqşa müxalifətdə olan bütün partiyalar isə buna etiraz olaraq zalı tərk edib. Xalq partiyasının nümayəndələri isə oturacaqlara İspaniya və Kataloniya bayraqları qoyaraq məclisi tərk ediblər. İclas keçirilən zaman minlərlə katalon, məclis binası qarşısına toplanıb. Barselona küçələrinə çıxan müstəqillik tərəfdarı bələdiyyə başçıları isə əllərində kralın əsaları ilə bölgənin lideri Karles Puçdemona dəstək veriblər.
Kataloniyanın müstəqillik qərarından bir neçə dəqiqə sonra isə paytaxt Madrid buna cavab olaraq qərarını açıqlayıb. Belə ki, İspaniya Senatı böhran zamanı hökumətə "bütün lazımı tədbirlərin görülməsinə" imkan yaradan İspaniya Konstitusiyasının 155-ci maddəsinin tətbiqinin lehinə səs verib. Bu isə Kataloniyanın muxtariyyətinin müvəqqəti ləğvi və bölgənin mərkəzi hökumətin birbaşa idarəçliyinə keçməsi anlamına gəlir. Bu maddə həmçinin, Madridə Kataloniya liderlərini vəzifədən kənarlaşdırmaq və regionun maliyyə, polis və ictimai mediasını nəzarət altına keçirməyə icazə verir.
İspaniya baş naziri Mariano Rajoy isə Katalonyanın addımına dərhal reaksiya verib. Hər kəsi səbrli olmağa çağıran Rajoy, Kataloniyada hüququn üstünlüyünun bərpa ediləcəyini söz verib.
Kataloniyanın müstəqillik qərarına münasibət bildirən Avropa İttifaqı isə bunun təşkilat üçün heç nəyi dəyişdirməyəcəyini bəyan edib. Aİ Şurasının prezidenti Donald Tusk Aİ-nin yalnız İspaniya mərkəzi hökuməti ilə əlaqələri davam etdirəcəyini söyləyib: “Bizim tərəfdaşımız İspaniya olaraq qalacaq”.
Qeyd edək ki, oktyabrın 1-də İspaniyanın Kataloniya Muxtar Vilayətində bölgənin müstəqilliyi haqqında qalmaqallı referendum keçirilib və səsverməyə qatılanların əksəriyyəti müstəqilliyin tərəfdarı olduğunu bəyan edib.
İspaniya Nazirlər Kabinetinin oktyabrın 21-də keçirilən təcili iclasında Kataloniya ilə bağlı ölkə Konstitusiyasının indiyə qədər istifadə olunmayan 155-ci maddəsini işə salmaq qərara alınıb. Bu maddə Kataloniyanın muxtariyyət statusunun ləğvini nəzərdə tutur.
