Dmitri Medvedev işğal edilmiş Ukrayna vilayətlərinin rəsmən Rusiyaya “birləşdirilməsi” günü münasibətilə paylaşım edib.
Rusiya Təhlükəsizlik Şurası katibinin müavini Dmitri Medvedev növbəti paylaşımında Ukrayna dövlətini məhv edəcəkləri ilə hədələyib: “Xüsusi hərbi əməliyyat nasist Kiyev rejiminin tam məhv edilməsinə və qədim rus ərazilərinin düşməndən təmizlənməsinə qədər davam edəcək”. Medvedev bildirib ki, yaxın gələcəkdə Ukraynanın daha geniş ərazilərini ələ keçirəcəklər. O, hətta bildirib ki, Ukraynada olan Avropa ölkələrinə məxsus zavodları da vuracaqlar.
Xatırladaq ki, Medvedev paylaşımlarında tez-tez Qərbi nüvə silahı ilə hədələyir.
Rusiya Təhlükəsizlik Şurası katibinin müavini Dmitri Medvedev növbəti paylaşımında Ukrayna dövlətini məhv edəcəkləri ilə hədələyib: “Xüsusi hərbi əməliyyat nasist Kiyev rejiminin tam məhv edilməsinə və qədim rus ərazilərinin düşməndən təmizlənməsinə qədər davam edəcək”.
Medvedyev niyə belə aqressiv danışır, doğrudanmı Rusiya onun dediklərini etməyə qadirdi? Yoxsa bununla Qərbə Putindən sonra hakimiyyətə yenə özünün gələcəyi ilə bağlı mesaj verir?
Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, hazırda Rusiyadanın tək Ukraynaya münasibətində deyil, bütün dünyaya münasibətində ciddi bir aqressivlik var: “Əslinə qalsa, bu gün Medvedyev Ukraynanı əzəli rus torpaqları kimi təqdim edir. Amma onların fikrində tamam başqa şeylər vardı. Bu kimi başqa şeylərə nəzər yetirsək, Ukraynanın Rusiya torpağı olması iddiası çox gülünc gəlir. Çünki onların düşüncəsinə görə, tək Ukrayna yox, Azərbaycan da Rusiya torpağıdır. Bu, bir qrup adamın nə tarixə, nə siyasətə, nə hüquqa sığmayan iddiasıdır. Bu, şovinizmdir, beynəlxalq terrordur. Ukrayna məsələsində Rusiyanın fiaskoya uğraması, axsaması onun üçün çox ciddi problemə çevrildi. Səbəb nədir? Çünki Rusiya-Belarus duetindən sonra üçüncü Ukrayna triosu olacaqdı. Bunlar keçmiş sovetlər birliyində üç aparıcı dövlət sayılırdı. Ukrayna ilə Belarus qardaş xalqlardı. Onların triosundan sonra digər ərazilərin də ilhaqı problemsiz başa çatacaqdı. Bugünkü Rusiya hakimiyyətində təmsil olunan insanların, demək olar ki, böyük əksəriyyətinin beynində, fikrində keçmiş sovetlər ittifaqını yenidən bərpa etməkdir. Amma Ukrayna məsələsində belə böyük təhdid və təzyiqlə rastlaşandan sonra, bu ideya fiaskoya uğradı. Mən sizi tam əmin edirəm ki, Ukraynanı asanlıqla məğlub edə bilsəydi, Rusiya növbəti mərhələlərdə digər respublikalara keçəcəkdi. Məsələn, Qaxaxıstana, Azərbaycana, Gürcüstana da keçə bilərdi. Hətta Gürcüstanı parçalamağa da çalışmışdı. Yəni aqressiya ondan irəli gəlir ki, Ukrayna Rusiyaya çox ciddi müqavimət göstərir, Rusiyanın Ukrayna ilə bağlı planları alt - üst olub, onlar öz arzularına çata bilməyiblər. Nüvə silahı ilə bağlı deyilənlərə mən inanmıram. Belə götürsək, Rusiya çox ciddi nüvə silahına malik bir dövlətdir. Onun nüvə silahı ehtiyatları həddindən artıq çoxdur. Onların biri, ikisi partlasa bəs edər ki, dünya öz məvhərindən çıxsın. Ancaq mən məsələnin nüvə silahına qədər gedib çıxacağını düşünmürəm. Məqsəd burada tam başqadır. Qərb, demək olar ki, öz məqsədinə çatıb. Ukrayna ilə Rusiya arasında dəhşətli bir problem yaranıb və bu genetik problemdir. Bu problemin arxasında hər şey var. Necə ki, azərbaycanlılarla ermənilər arasında konflikt yaratdılar, bu konflikti dərinləşdirdilər, bu konfliktin yaddan çıxmaması üçün hər şey etdilər. İndi də Ukrayna ilə münasibətdə onların başlarına bu oyunu açdılar. Ukraynaya qarşı təcavüz, uşaq ölümü, oğurluq var. Həmin ssenaridi. Ermənilərin Qarabağda azərbaycanlılara qarşı törətdiklərinin eynisini etdilər ukraynalılara qarşı. Bu artıq genetikaya oturulmuş bir düşmənçilikdir, müharibədir. Mən inanmıram ki, bu müharibə yaxın gələcəkdə aradan qalxsın. Bütün bunlar Ukraynanı Rusiyadan mənəvi cəhətdən də ayırdı. Qardaş xalq olaraq onlar bir-birinə düşmən xalq kimi baxırlar artıq. İndi Rusiyanın özündə də qətiyyətlə bildirirlər ki, Ukrayna heç vaxt bizə qardaş, dost deməyəcək. Bütün bunların arxasında da Medvedyev kimi yabanı siyasətçilər dayanır. Bu siyasətçilər də özbaşına olsaydı, bəlkə də nüvə silahından istifadə edə bilərdi. Amma özbaşına deyil. Vəziyyət tam başqadır. Nüvə silahı ilə bağlı qərar qəbul etmək asan məsələ deyil. Bu birbaşa Putinin qərarından asılı deyil. Ona görə də, Ukraynada başı daşa dəyən Medvedyev kimilər hələ çox şeylər danışacaqlar”.
Məhəmmədəli QƏRİBLİ
