AZAL-ın turizm şəhərlərinə aviabiletləri 200-300 bahalaşdırması xeyirli, ya ziyanlı olacaq...
Elxan Əliyev: "Quru yolları bağlı olduğu üçün AZAL bundan istifadə edir"
Yay fəslində bir qisim insanlar istirahət üçün xarici ölkələrə üz tutur. Ancaq turistik şəhərlərə gediş üçün biletin qiyməti son zamanlar artıb. Məlumata görə, AZAL turzim şəhərlərinə uçuşların biletlərini yenidən bahalaşdırıb.
Əksər şəhərlərə təşkil olunmuş aviauçuşlar üzrə biletlərdə 200-300 manat bahalaşma müşahidə olunur. Məlumat üçün bildirək ki, hazırda Bakı-Antalya reysləri üzrə ekonom uçuşların qiymətləri gediş-gəliş daxil 1000 manata qalxıb. Bundan başqa, Bakı-Tbilisi uçuşlarında gediş-gəliş qiyməti ekonom klass üçün 700 manata qədər yüksəlib.
"Mövsum vaxtı tələbatın çox olduğunu görən AZAL turizm şəhərlərinə qiyməti qaldırır"
Sosial sahə üzrə ekspert Elxan Əliyev "Bakı-Xəbər"ə açıqlamasında bildirdi ki, adətən tələbat çox olanda şirkətlər qiyməti endirir: "Ancaq bizdə fərqlidir. Mövsum vaxtı tələbatın çox olduğunu görən AZAL turizm şəhərlərinə qiyməti qaldırır. Tələbat artırsa, əlavə reyslər açılmalı və qiymət endirilməlidir. Xarici ölkələrdə qayda belədir. Hazırda AZAL quru sərhədin bağlı qalmasından istifadə edir. Quru sərhədlər açıq olsa vətəndaşlarımız Gürcüstana qatarla və yaxud avtomobillə gedər və oradan da çox ucuz səfər edərlər və yaxud Naxçıvandan keçib Sədərəkdən Türkiyəyə gedə bilər, oradan da rahatlıqla səfərlərini edə bilərlər. Ancaq quru yolları bağlı olduğu üçün AZAL bundan istifadə edir".
Həmsöhbətimiz onu da əlavə etdi ki, bəzi insanlar turistik şəhərlərə bileti bir neçə ay öncədən alır ki, mövsum vaxtı ikiqat ödəniş etməsin. Bu hal isə AZAL-a sərf etmir: "Biletlərin baha olması yerli vətəndaşlarla yanaşı, turistlərə də sərf etmir. Turist baxıb görür ki, 1000 manata Bakıya getməkdənsə, o vəsaitlə bir neçə ölkəyə gedər. AZAL təyyarə biletlərini ən azı 30-40 faiz ucuzlaşdırsa həm şirkət qazanar, həm də ölkə iqtisadiyyatı".
Günel CƏLİLOVA
