Akif Nəsirli: “Bu istiqamətdə dövlət tərəfindən yeni ödəniş növlərinin təsis edilməsi müsbətdir”
Dövlətin həyata keçirdiyi sosial siyasətin istiqaməti vaxtaşırı genişlənir, daha əhatəli olur. Sosial ödəniş sahəsində həyata keçirilən yeniliklər də bu qəbildəndir. Əmək və Əhalinin Sosial Müdafiəsi Nazirliyinin yaydığı məlumata görə, son 4 ildə 10-dan çox yeni sosial ödəniş növü təsis olunub.
Məlumata görə, Prezident İlham Əliyevin tapşırığına əsasən son illər sosial ödənişlərin ciddi şəkildə artırılması ilə bərabər, yeni sosial ödəniş növləri də təsis olunmaqla sosial təminat sisteminin əhatə dairəsi xeyli genişləndirilib.
2019-cu ildə müharibə veteranlarına, birinci dərəcə əlilliyi olanlara qulluq edənlərə, əlilliyi olan 18 yaşadək uşaqlara qulluq edənlərə Prezidentin aylıq təqaüdü təsis olunub.
2021-ci ildə daha bir sıra yeni sosial ödənişlər təqdim edilib. Bura Vətən Müharibəsi Qəhrəmanlarına (onlardan vəfat edənlərin ailə üzvlərinə), işləməyən pensiyaçı elmlər doktorlarına, işləməyən pensiyaçı fəlsəfə doktorlarına
Prezidentin aylıq təqaüdünün, valideynlərini itirmiş və ya valideyn himayəsindən məhrum olmuş uşaqları övladlığa götürən şəxslərə, sağlamlıq imkanları məhdud uşaqları övladlığa götürən şəxslərə hər uşaq üçün aylıq müavinətin təyin edilməsinə başlanıb.
2022-ci ilin əvvəlindən isə Vətən müharibəsinin iştirakçılarına “Müharibə veteranı” adı verilərək Prezidentin aylıq təqaüdü təyin olunub.
Həmçinin 2019-2020-ci illərdə 1997-ci il avqustun 2-dək olan dövr üzrə şəhid hərbi qulluqçuların və daxili işlər orqanları əməkdaşlarının vərəsələri birdəfəlik ödəmə ilə təmin edilib. Bu günlərdə isə Birinci Qarabağ müharibəsi əlillərinin birdəfəlik ödəmə ilə təminatına başlanılıb.
Bütün bunlar ölkəmizdə sosial təminat sisteminin gücləndirilməsində mühüm addımlar olmaqla, xüsusilə həssas qruplara dövlət qayğısının daha da artmasına imkan verib.
- “...Son zamanlar ölkədə sosial ödənişlərin siyahısının artırılması istiqamətində irəliləyişlər...”
Liberal İqtisadçılar Mərkəzinin sədri Akif Nəsirli “Bakı-Xəbər”ə şərhində bildirdi ki, Azərbaycanda əhalinin sosial müdafiəsinin təmin edilməsi məqsədilə son illər xeyli addımlar atılıb. “Xüsuilə həssas qruplar var ki, onların sırasına 44 günlük müharibədən sonra yeniləri də əlavə olunub. Qazilərimiz, yeni müharibə veteranlarımız, şəhid ailələrimiz də həssas qrupa aiddir. Bu fonda hökumət müəyyən addımlar atdır. Bu istiqamətdə dövlət tərəfindən yeni ödəniş növlərinin təsis edilməsi müsbətdir. Bunların arasında adları dəyişdirilib yenidən təqdim edilənlər də, yeni təsis edilənlər də var. Məsələn, əvvəllər də şəhid ailələrinə, Birinci Qarabağ müharibəsi veteranlarına sosial müavinətlər verilirdi, onlara 80 manat ödənilirdi. 44 günlük müharibə başa çatdıqdan sonra heç bir əlilliyi olmayan şəxslərə müharibə veteranı status verdi. Bu ilin yanvar ayından onların hər birinə 80 manat ödənişlərə başlanıldı. Əslində, bu yeni sosial ödəniş deyil. Amma valideynlərini itirmiş və ya valideyn himayəsindən məhrum olmuş uşaqları övladlığa götürən şəxslərə ödənişlərin verilməsi yenilikdir. Bu yeni ödəniş növünə aiddir. Kim uşaq götürüb onu saxlayırsa, himayə edirsə, əlbəttə, hökumət ona müəyyən köməkliklər etməlidir. Demək istədiyim odur ki, son zamanlar ölkədə sosial ödənişlərin siyahısının artırılması istiqamətində irəliləyişlər də var. Amma Əmək və Əhalinin Sosial Müdafiəsi Nazirliyinin açıqlamalarında bu məsələdə, bu istiqamətdə monipulyasiyalar da yox deyil. Hesab edirəm ki, Azərbaycanda əhalinin sosial müdafiəyə ehtiyacı olan qrupların sosial müdafiəsinin səmərəliliyinin artırılması üçün heç də ödənişlərin çeşidirin artırılmasına ehtiyac yoxdur. Müəyyən ehtiyaclar yaranarsa, müəyyən sosial həssas qruplar meydana çıxarsa, bəli, onlar üçün sosial ödənişlərin formalaşdırılması mümkündür. Amma sosial müdafiənin səmərəliliyinin artırılması üçün verilən ödənişlərin məbləğləri artırılmalıdır”.
A.Nəsirlinin sözlərinə görə, bu sahədə ödənişlərin məbləği artırılmalıdır ki, həssas qruplara aid olan şəxslərin aldığı müavinətlərin alıcılıq qabiliyyəti aşağı olmasın. Mərkəz rəhbəri bildirir ki, bu daha məqsədəuyğun olardı.
İradə SARIYEVA
.jpg)
