Beynəlxalq Olimpiadada ermənilərdən də pis yer tutduq - təhsilin problemi, ya şagird marağının zəifliyi?..

img

İndoneziyada keçirilən 34-cü Beynəlxalq İnformatika Olimpiadasında şagirdlərimizin nəticələri qənaətbəxş olmayıb. Bu haqda xəbəri Elm və Təhsil Nazirliyi yanında İctimai Şuranın üzvü, millət vəkili Etibar Əliyev yayıb.

O bildirib ki, ən yüksək nəticə göstərən şagirdimiz, Müasir Lisey Təhsil Kompleksinin şagirdi Səid Nəsibov 163 balla bürünc medal qazanıb: “Bu dəyərli şagirdimiz etiraf edir ki, özü sərbəst hazırlaşıb. Digər şagirdlərimiz 600 baldan 92, 56, 22 bal toplayıb. Keçən ilin nəticələri: Əziz Hüseynov 213, Səid Nəsibov 195 balla bürünc medal qazanıblar. Digər 2 şagirdimiz 195, 174 bal toplayıb. 2020-ci ildə bürünc medalçılarımız 303, 272 və 239 bal toplayıb. Qaydalar həm də sadədir. Medallar Ümumi iştirakçıların 50 faizinə verilir”.

Etibar Əliyev qeyd edib ki, bu il keçirilən Olimpiadaya yeni qoşulan ölkələr olduğundan bir bürünc medal qazana bilmişik: “Olimpiada Mərkəzinin yaradıldığı Riyaziyyat- İnformatika liseyinin şagirdlərinin nəticələri acınacaqlıdır. Bu layihəni də puç elədilər. Fuad Qarayev və Muxtar Məmmədov mifi karton evcik kimi dağıldı. Milyonlar hara xərclənib? Digər bir neçə ölkənin nəticələri məni xeyli düşündürdü. Ukraynalı şagirdlər 2 qızıl, 1 gümüş, 1 bürünc medal qazanmaqla 8-ci yeri tutublar. Gürcüstan 1 gümüş, 2 bürünc. Qırğızıstan 3 bürünc, 1 həvəsləndirici. Beləliklə, Azərbaycan 88 ölkə arasında 69-cu yerdə. İran 9-cu, Türkiyə 18-ci, Qazaxıstan 23-cü, Gürcüstan 33-cü, Qırğızıstan 37-ci yerdədir. Bədnam qonşularımızın bizdən kəskin şəkildə öndə olması isə yalnız əsəb yaradır. Bu gedişlə İnformasiya Texnologiyaları sahəsində mütəxəssis hazırlamaqda bədgüman olaraq qalacağıq. Bu sahəyə cavabdeh adamlar təcili kənarlaşdırılmalıdır. Qalib ölkənin imicinə zərbə vurmayın. İstedadlı uşaqların potensialını artırmağı bacarmırsınızsa, çəkilin bu yoldan!”.

Maraqlıdır, informatika ilə bağlı şagirdlərin uğur əldə edə bilməməsi təhsilin səviyyəsinin aşağı olması, yoxsa şagirdlərin bu fənnə marağının olmaması ilə bağlıdır?

  • Osman Gündüz: “Olimpiadaya hazırlıqla bağlı xüsusi Mərkəz formalaşdırılmasına baxmayaraq, nəticələrin zəifləməsinin səbəbi nə ilə bağlı olub?”

Azərbaycan İnternet Forumunun Prezidenti, ekspert Osman Gündüz bildirdi ki, İndoneziyada keçirilən 34-cü Beylnəlxalq İnformatika Olimpiadası başa çatıb. 90 ölkənin nümayəndələrinin qatıldığı bu nüfuzlu olimpiadanın bağlanış mərasimi keçirilib: “Yogyakarta şəhərində təşkil olunan bu mötəbər tədbirdə bir neçə gün öncə dünyasını dəyişən, Beynəlxalq İnformatika Olimpiadasında xeyli müddət Azərbaycanı təmsil edən, informatikanın inkişafına ciddi töhfə verən Ramin Mahmudzadənin də xatirəsi ehtiramla anılıb. Ötən olimpiadalardan fərqli olaraq, Azərbaycan məktəbliləri bu olimpiadada cəmi bir bürünc medal qazanıb. Məktəblimiz Səid Nəsibov 163 bal toplamaqla 168-ci yeri qazanaraq bürünc əldə edə bilib. Ölkəmizin informatika komandasının bu nəticəsini elə də uğurlu hesab etmək olmaz. Ötən il komandamız iki bürünc, 2020-ci ildə isə üç bürünc medal qazanmışdılar. Komanda hesabı üzrə toplanan balları illər üzrə müqayisə etdikdə nəticələrin ilbəil aşağı düşdüyünü müşahidə edirik. Maraqlıdır ki, bu il, hətta 600 mümkün baldan olduqca az nəticə göstərənlərimiz də ( cəmi 20 bal) olub. Görəsən, Təhsil Nazirliyi  tərəfindən bir il ərzində xeyli resurslar ayrılmasına, olimpiadaya hazırlıqla bağlı xüsusi Mərkəz formalaşdırılmasına baxmayaraq nəticələrin zəifləməsinin səbəbi nə ilə bağlı olub? Nə üçün qalib gələn şagirdimiz adı çəkilən Olimpiada Hazırlıq Mərkəzinin hazırlaşdırdığı məktəbli deyil, tam fərqli bir məktəbin, Müasir Təhsil Kompleksinin müstəqil hazırlaşan məktəblisi olub?

Əgər belədirsə, onda aidiyyəti qurumun və sponsorun bu qədər resurslar ayırmasının nə mənası olur?”.

Ekspert onu da əlavə etdi ki, Azərbaycanın 90 ölkə içərisində ümumi hazırlıq göstəricisi də 69-cu yerdə olmaqla elə də uğurlu hesab oluna bilməz. Beynəlxalq İnformatika Olimpiadasının budəfəki qalibləri də, həmişə olduğu kimi, Çin, Yaponiya, ABŞ və Kanada məktəbliləri olub. Ukrayna məktəbliləri də bu dəfə xeyli fərqləniblər: “Əslində ən yüksək bal toplayanların elə hamısının Çin ölkəsi olduğunu da demək olar, çünki başqa ölkələr qeyd olunsa da siyahıdan görünür ki, qaliblər elə çinlilər olub. Məlumdur ki, artıq ölkəmizdə informatikaya münasibət dəyişib. Yeni informatika mühiti formalaşmaqdadır. Gələn il İT ixtisas seçənlər Kimyadan deyil, ilk dəfə olaraq İnformatikadan qəbul imtahanı verəcəklər. Odur ki, məktəblərdə, valideynlərdə və uşaqlarda informatikaya diqqətin artdığını müşahidə edirik. Ümid edirəm ki, Elm və Təhsil Nazirliyi informatika üzrə talantlı və qabiliyyətli uşaqların seçilməsi və olimpiadaya hazırlaşması üçün, olimpiadaya hazırlıq Mərkəzinin işinin təkmilləşdirilməsi üçün diqqəti daha da artıracaq”.

  • Elşən Qafarov: “Düşünmürəm ki… təhsilin səviyyəsinin aşağı olması ilə bağlıdır”

Təhsil üzrə ekspert Elşən Qafarov bildirdi ki, ölkədə uzun illərdir beynəlxalq olimpiadalarda yer qazanan yox idi: “İki il öncə ilk dəfə biz bürünc medal əldə etdik. Bu sahədə istedadlı uşaqlarla işin təşkili ilə bağlı Təhsil İnstitutu tərəfindən müəyyən işlər görülür və yaxın gələcəkdə həmin işlər öz nəticəsini verəcək. Düşünmürəm ki, informatika ilə bağlı olimpiadada şagirdlərin yüksək nəticə göstərməməsi təhsilin səviyyəsinin aşağı olması ilə bağlıdır. Olimpiadanın fəlsəfəsi tamamilə başqa anlayışdır. Olimpiada ən istedadlı uşaqların iştirak etdiyi bir müsabiqədir. Bu sahədə aparılan işlərin nəticəsi olaraq, informatika fənni üzrə də şagirdlərin daha yüksək nəticə göstərəcəyinə inanırıq. İnanıram ki, növbəti illərdə digər fənnlərdə olduğu kimi informatikada da yenə medalların şahidi olacağıq. Ümumiyyətlə, informatika sahəsində olimpiada yeni sahədir. 2020-ci ildə şagirdlərimiz ilk medal qazanıblar. Olimpiadaya hazırlıq ən yaxşı halda 3-5 il vaxt aparır. Düşünürəm ki, növbəti illərdə yenə uğurlarımız olacaq”.

Günel CƏLİLOVA

Peşə etikası

Son xəbərlər